ਤੁਸੀਂ ਇਕੱਲੇ ਨਹੀਂ ਹੋ
ਇਹ ਮਰੀਜ਼ ਗਾਈਡ-ਪੁਸਤਿਕਾ ਤੁਹਾਡੇ ਹੀ ਵਰਗੇ ਲੋਕਾਂ ਵੱਲੋਂ ਬਣਾਈ ਗਈ ਸੀ – ਯਾਨੀ ਬਲੈਡਰ ਦੇ ਕੈਂਸਰ ਦੇ ਮਰੀਜ਼ਾਂ ਅਤੇ ਉਹਨਾਂ ਦੇ ਦੇਖਭਾਲ-ਕਰਤਾਵਾਂ ਦੁਆਰਾ। ਇਹ ਤੁਹਾਨੂੰ ਸਹਾਇਤਾ, ਉਤਸ਼ਾਹ ਅਤੇ ਇਸ ਬਾਰੇ ਨੁਕਤਿਆਂ ਦੀ ਪੇਸ਼ਕਸ਼ ਕਰਨ ਲਈ ਡਿਜ਼ਾਈਨ ਕੀਤੀ ਗਈ ਹੈ ਕਿ ਤੁਹਾਡੇ ਬਲੈਡਰ ਦੇ ਕੈਂਸਰ ਵਾਸਤੇ ਪ੍ਰਕਿਰਿਆਵਾਂ ਅਤੇ ਇਲਾਜਾਂ ਨਾਲ ਕਿਵੇਂ ਨਜਿੱਠਣਾ ਹੈ। ਇਹ ਤੁਹਾਨੂੰ ਤੁਹਾਡੀ ਬਿਮਾਰੀ ਅਤੇ ਇਹ ਸਮਝਣ ਵਿੱਚ ਮਦਦ ਕਰ ਸਕਦਾ ਹੈ ਕਿ ਕਿਸ ਚੀਜ਼ ਦੀ ਉਮੀਦ ਕਰਨੀ ਹੈ, ਤੁਹਾਨੂੰ ਕਿਹੜੇ ਇਲਾਜਾਂ ਦੀ ਪੇਸ਼ਕਸ਼ ਕੀਤੀ ਜਾ ਸਕਦੀ ਹੈ ਅਤੇ ਆਉਣ ਵਾਲੇ ਸਾਲਾਂ ਵਿੱਚ ਤੁਹਾਡੀ ਬਿਮਾਰੀ ਦਾ ਪ੍ਰਬੰਧਨ ਕਿਵੇਂ ਕਰਨਾ ਹੈ।
ਅਸੀਂ ਡਾਕਟਰੀ ਪੇਸ਼ੇਵਰ ਨਹੀਂ ਹਾਂ ਅਤੇ ਤੁਹਾਨੂੰ ਹਮੇਸ਼ਾ ਸਲਾਹ ਵਾਸਤੇ ਪਹਿਲਾਂ ਆਪਣੀ ਡਾਕਟਰੀ ਟੀਮ ਕੋਲ ਜਾਣਾ ਚਾਹੀਦਾ ਹੈ। ਪਰ ਅਸੀਂ ਉਸ ਥਾਂ ’ਤੇ ਰਹਿ ਚੁੱਕੇ ਹਾਂ ਜਿੱਥੇ ਤੁਸੀਂ ਹੁਣ ਹੋ ਅਤੇ ਅਸੀਂ ਉਹਨਾਂ ਚੀਜ਼ਾਂ ਨੂੰ ਮਹਿਸੂਸ ਕੀਤਾ ਹੈ ਜੋ ਤੁਸੀਂ ਮਹਿਸੂਸ ਕਰ ਰਹੇ ਹੋ। ਸਟੀਕਤਾ ਨੂੰ ਯਕੀਨੀ ਬਣਾਉਣ ਲਈ, ਇਸ ਗਾਈਡ-ਪੁਸਤਿਕਾ ਦੀ ਸਮੀਖਿਆ ਡਾਕਟਰੀ ਪੇਸ਼ੇਵਰਾਂ ਦੀ ਇੱਕ ਟੀਮ ਵੱਲੋਂ ਕੀਤੀ ਗਈ ਹੈ।
ਇਹ ਗਾਈਡ-ਪੁਸਤਿਕਾ ਮਾਸਪੇਸ਼ੀ ਧਾਵਕ ਬਲੈਡਰ ਕੈਂਸਰ (Muscle Invasive Bladder Cancer – MIBC) ਵਾਸਤੇ ਇਲਾਜ ਦੀਆਂ ਪਹੁੰਚਾਂ ਬਾਰੇ ਗੱਲ ਕਰੇਗੀ ਜੋ ਬਲੈਡਰ ਦੀ ਰੱਖਿਆ ਕਰ ਸਕਦੀਆਂ ਹਨ। ਇਹ ਗੱਲ ਦਿਮਾਗ ਵਿੱਚ ਰੱਖੋ ਕਿ ਤੁਹਾਡੀ ਡਾਕਟਰੀ ਟੀਮ ਦੀਆਂ ਪ੍ਰੈਕਟਿਸਾਂ ਅਤੇ ਤੁਹਾਡੀ ਵਿਸ਼ੇਸ਼ ਪ੍ਰਸਥਿਤੀ ’ਤੇ ਨਿਰਭਰ ਕਰਨ ਅਨੁਸਾਰ ਕੁਝ ਅੰਤਰ ਹੋ ਸਕਦੇ ਹਨ। ਅਸੀਂ ਬਹੁਤ ਜ਼ਿਆਦਾ ਡਾਕਟਰੀ ਭਾਸ਼ਾ ਦੀ ਵਰਤੋਂ ਨਹੀਂ ਕਰਾਂਗੇ, ਸਿਵਾਏ ਓਥੇ ਜਿੱਥੇ ਇਹ ਤੁਹਾਡੀ ਡਾਕਟਰੀ ਟੀਮ ਨਾਲ ਬਿਹਤਰ ਸੰਚਾਰ ਕਰਨ ਅਤੇ ਤੁਹਾਡੀ ਬਿਮਾਰੀ ਨੂੰ ਸਮਝਣ ਵਿੱਚ ਮਦਦ ਕਰ ਸਕਦੀ ਹੈ। ਤੁਸੀਂ ਬਲੈਡਰ ਕੈਂਸਰ ਕੈਨੇਡਾ ਦੀ ਵੈੱਬਸਾਈਟ https://bladdercancercanada.org ’ਤੇ ਔਖੇ ਸ਼ਬਦਾਂ ਦੀ ਆਸਾਨੀ ਨਾਲ ਉਪਲਬਧ ਸ਼ਬਦਾਵਲੀ ਦੇਖੋਗੇ।
ਯਾਦ ਰੱਖੋ, ਤੁਸੀਂ ਇਕੱਲੇ ਨਹੀਂ ਹੋ। ਬਲੈਡਰ ਕੈਂਸਰ ਕੈਨੇਡਾ ਵਿਖੇ ਅਸੀਂ ਸਾਰੇ ਤੁਹਾਨੂੰ ਇੱਕ ਭਰਪੂਰ ਅਤੇ ਸੰਤੋਸ਼ਜਨਕ ਜ਼ਿੰਦਗੀ ਜਿਉਣ ਵਿੱਚ ਮਦਦ ਕਰਨ ਨੂੰ ਲੈਕੇ ਜੋਸ਼ ਨਾਲ ਭਰਪੂਰ ਹਾਂ– ਏਥੋਂ ਤੱਕ ਕਿ ਬਲੈਡਰ ਦੇ ਕੈਂਸਰ ਦੀ ਤਸ਼ਖੀਸ ਹੋਣ ਤੋਂ ਬਾਅਦ ਵੀ। ਅਸੀਂ ਇਹ ਕਰ ਰਹੇ ਹਾਂ ਅਤੇ ਤੁਸੀਂ ਵੀ ਇਹ ਕਰ ਸਕਦੇ ਹਾਂ।
ਜਿਵੇਂ ਕਿ ਕੈਂਸਰ ਦੀਆਂ ਕਈ ਕਿਸਮਾਂ ਵਿੱਚ ਹੁੰਦਾ ਹੈ, ਬਿਮਾਰੀ ਦੇ ਮੋਹਰੀ ਜੋਖ਼ਮ ਕਾਰਕਾਂ ਵਿੱਚੋਂ ਇੱਕ ਹੈ ਤੰਬਾਕੂਨੋਸ਼ੀ। ਜਿਹੜੇ ਲੋਕ ਤੰਬਾਕੂਨੋਸ਼ੀ ਕਰਦੇ ਹਨ ਉਹਨਾਂ ਨੂੰ ਬਲੈਡਰ ਦਾ ਕੈਂਸਰ ਹੋਣ ਦੀ ਸੰਭਾਵਨਾ ਚਾਰ ਗੁਣਾਂ ਤੱਕ ਜ਼ਿਆਦਾ ਹੋ ਸਕਦੀ ਹੈ। ਕੁਝ ਵਿਸ਼ੇਸ਼ ਰਾਸਾਇਣਾਂ ਨਾਲ ਕੰਮ ਕਰਨ ਵਾਲੇ ਲੋਕਾਂ ਨੂੰ ਵੀ ਜੋਖ਼ਮ ਹੋ ਸਕਦਾ ਹੈ – ਹੋਰਨਾਂ ਕਿੱਤਿਆਂ ਤੋਂ ਇਲਾਵਾ ਚਮੜੇ ਨਾਲ ਕੰਮ ਕਰਨ ਵਾਲੇ ਵਰਕਰ, ਹੇਅਰਡ੍ਰੈਸਰ, ਮਕੈਨਿਕ ਅਤੇ ਪੇਂਟਰ। ਰੇਡੀਏਸ਼ਨ ਨਾਲ ਸੰਪਰਕ ਨੂੰ ਵੀ ਬਲੈਡਰ ਦੇ ਕੈਂਸਰ ਨਾਲ ਜੋੜਿਆ ਜਾ ਚੁੱਕਾ ਹੈ। ਕਾਕੇਸ਼ੀਅਨ ਪੁਰਸ਼ਾਂ ਨੂੰ ਵੀ ਮੁਕਾਬਲਤਨ ਵਧੇਰੇ ਜੋਖ਼ਮ ਹੋ ਸਕਦਾ ਹੈ।
ਪਰ ਸਰਲ ਸਚਾਈ ਇਹ ਹੈ ਕਿ ਕਈ ਲੋਕਾਂ ਵਿੱਚ ਬਿਨਾਂ ਕਿਸੀ ਗਿਆਤ ਕਾਰਨ ਦੇ ਵੀ ਬਲੈਡਰ ਕੈਂਸਰ ਵਿਕਸਿਤ ਹੋ ਜਾਵੇਗਾ। ਤੁਸੀਂ ਉਹਨਾਂ ਲੋਕਾਂ ਵਿੱਚੋਂ ਇੱਕ ਹੋ ਸਕਦੇ ਹੋ। ਇਸ ਬਿੰਦੂ ’ਤੇ ਆਕੇ, “ਕਿਉਂ” ਪੁੱਛਣਾ ਓਨਾ ਮਦਦਗਾਰੀ ਨਹੀਂ ਹੁੰਦਾ ਜਿਨ੍ਹਾਂ ਇਸ ਚੀਜ਼ ’ਤੇ ਧਿਆਨ-ਕੇਂਦਰਿਤ ਕਰਨਾ ਕਿ “ਹੁਣ ਕੀ”। ਸਾਡੇ ਵਿੱਚੋਂ ਕਈਆਂ ਨੂੰ ਸਾਡੀ ਤਸ਼ਖੀਸ ਤੋਂ ਪਹਿਲਾਂ ਕਦੇ ਇਹ ਪਤਾ ਨਹੀਂ ਸੀ ਕਿ ਬਲੈਡਰ ਕੈਂਸਰ ਮੌਜੂਦ ਸੀ। ਪਰ, ਇਹ ਤੁਹਾਡੇ ਸੋਚਣ ਨਾਲੋਂ ਵਧੇਰੇ ਆਮ ਹੈ, ਕਿਉਂਕਿ ਇਹ ਕੈਨੇਡਾ ਵਿੱਚ 5ਵਾਂ ਸਭ ਤੋਂ ਵੱਧ ਆਮ ਕੈਂਸਰ ਹੈ।
ਲਗਭਗ 25% ਬਲੈਡਰ ਕੈਂਸਰ ਮਾਸਪੇਸ਼ੀ-ਧਾਵਕ ਹੁੰਦੇ ਹਨ। ਇਸ ਦਾ ਮਤਲਬ ਇਹ ਹੈ ਕਿ ਕੈਂਸਰ ਦੀਆਂ ਰਸੌਲੀਆਂ ਵਧਕੇ ਬਲੈਡਰ ਦੀ ਕਿਨਾਰੀ ਜਾਂ ਬਲੈਡਰ ਦੀ ਮਾਸਪੇਸ਼ੀ ਵਿੱਚੋਂ ਦੀ ਪਾਰ ਹੋ ਗਈਆਂ ਹਨ। ਜ਼ਿਆਦਾਤਰ ਕੇਸਾਂ ਵਿੱਚ, ਇਸ ਕਿਸਮ ਦੇ ਕੈਂਸਰ ਦਾ ਇਲਾਜ ਬਲੈਡਰ ਨੂੰ ਪੂਰੀ ਤਰ੍ਹਾਂ ਕੱਢਣ ਲਈ ਸਰਜਰੀ (ਜਿਸ ਨੂੰ “ਰੈਡੀਕਲ ਸਿਸਟੈਕਟਮੀ” ਕਿਹਾ ਜਾਂਦਾ ਹੈ) ਅਤੇ ਪਿਸ਼ਾਬ ਦੇ ਸਰੀਰ ਵਿੱਚੋਂ ਬਾਹਰ ਨਿਕਲਣ ਲਈ ਇੱਕ ਨਵਾਂ ਰਸਤਾ ਬਣਾਉਣ ਦੁਆਰਾ ਕੀਤਾ ਜਾਂਦਾ ਹੈ।
ਹਾਲਾਂਕਿ, ਤੁਸੀਂ ਅਤੇ ਤੁਹਾਡੀ ਡਾਕਟਰੀ ਟੀਮ ਨੇ ਉਹਨਾਂ ਪਹੁੰਚਾਂ ਦੀ ਵਰਤੋਂ ਕਰਕੇ ਤੁਹਾਡੇ ਬਲੈਡਰ ਦੇ ਕੈਂਸਰ ਦਾ ਇਲਾਜ ਕਰਨ ਦਾ ਫੈਸਲਾ ਕੀਤਾ ਹੈ ਜੋ ਬਲੈਡਰ ਦੀ ਰੱਖਿਆ ਕਰ ਸਕਦੀਆਂ ਹਨ। ਮੁਕਾਬਲਤਨ ਛੋਟੀਆਂ ਬਲੈਡਰ ਰਸੌਲੀਆਂ ਵਾਲੇ ਕੁਝ ਮਰੀਜ਼ ਜੋ ਕੁਝ ਵਿਸ਼ੇਸ਼ ਕਸੌਟੀਆਂ ਦੀ ਪੂਰਤੀ ਕਰਦੇ ਹਨ, ਉਹ ਬਲੈਡਰ ਦੇ ਸੰਰੱਖਿਅਣ ਵਾਸਤੇ ਢੁਕਵੇਂ ਹੁੰਦੇ ਹਨ, ਪਰ ਇਹਨਾਂ ਮਰੀਜ਼ਾਂ ਦੀ ਗਿਣਤੀ ਘੱਟ ਹੀ ਹੁੰਦੀ ਹੈ। ਜੇ ਤੁਸੀਂ ਮੁਕਾਬਲਤਨ ਵੱਡੀ ਉਮਰ ਦੇ ਹੋ ਤਾਂ ਵੀ ਬਲੈਡਰ ਦਾ ਬਚਾਅ ਕੀਤਾ ਜਾ ਸਕਦਾ ਹੈ, ਜੇ ਤੁਹਾਡਾ ਯੂਰੋਲੋਜਿਸਟ (ਪਿਸ਼ਾਬ-ਮਾਰਗ ਦਾ ਮਾਹਰ ਡਾਕਟਰ) ਮਹਿਸੂਸ ਕਰਦਾ ਹੈ ਕਿ ਸਰਜਰੀ ਬਹੁਤ ਜੋਖ਼ਮ-ਭਰੀ ਹੈ, ਜਾਂ ਤੁਹਾਨੂੰ ਹੋਰ ਸਿਹਤ ਸਮੱਸਿਆਵਾਂ ਹਨ ਜੋ ਸਰਜਰੀ ਤੋਂ ਹੋਣ ਵਾਲੇ ਜੋਖ਼ਮ ਨੂੰ ਵਧਾਉਂਦੀਆਂ ਹਨ। ਇਸ ਵੱਡੀ ਸਰਜਰੀ ਨੂੰ ਨਾ ਕਰਵਾਉਣਾ ਚਾਹੁਣ ਵਾਸਤੇ ਤੁਹਾਡੇ ਨਿੱਜੀ ਕਾਰਨ ਵੀ ਹੋ ਸਕਦੇ ਹਨ।
ਇਹ ਮਰੀਜ਼ ਗਾਈਡ-ਪੁਸਤਿਕਾ ਰੈਡੀਕਲ ਸਿਸਟੈਕਟਮੀ (radical cystectomy) ਦੇ ਵਿਕਲਪਾਂ ਦੀ ਵਧੇਰੇ ਡੂੰਘਾਈ ਵਿੱਚ ਜਾਕੇ ਪੜਚੋਲ ਕਰੇਗੀ। ਸਭ ਤੋਂ ਪਹਿਲਾਂ, ਇਹ ਅਹਿਮ ਹੈ ਕਿ ਤੁਸੀਂ ਆਪਣੇ ਬਲੈਡਰ ਦੇ ਕੈਂਸਰ ਦੇ ਪੜਾਅ ਅਤੇ ਇਸ ਦੇ ਦਰਜੇ (staging and grading) ਨੂੰ ਸਮਝਦੇ ਹੋਵੋਂ।
ਤੁਹਾਡੇ ਬਲੈਡਰ ਦੀ ਰਸੌਲੀ ਦੇ ਟ੍ਰਾਂਸਯੂਰੇਥਰਾਲ ਰੀਸੈਕਸ਼ਨ (TURBT) ਦੌਰਾਨ ਬਾਹਰ ਕੱਢੇ ਪਦਾਰਥ ਦੇ ਪ੍ਰਯੋਗਸ਼ਾਲਾ ਵਿੱਚ ਕੀਤੇ ਜਾਂਦੇ ਵਿਸ਼ਲੇਸ਼ਣ ਨੂੰ ਕੈਂਸਰ ਦੀ ਕਿਸਮ ਅਤੇ ਇਸ ਦੇ ਪੜਾਅ ਦਾ ਪਤਾ ਲਾਉਣ ਵਿੱਚ ਮਦਦ ਕਰਨ ਲਈ ਵਰਤਿਆ ਜਾਂਦਾ ਹੈ। ਕੈਨੇਡੀਅਨ ਕੈਂਸਰ ਸੋਸਾਇਟੀ ਦੇ ਅਨੁਸਾਰ, ਪੜਾਅ ਤੈਅ ਕਰਨ (staging) ਦੀ ਪ੍ਰਕਿਰਿਆ ਕੈਂਸਰ ਨੂੰ ਸਰੀਰ ਵਿੱਚ ਇਸਦੇ ਵਿਸਤਾਰ ਦੇ ਆਧਾਰ ’ਤੇ ਸ਼੍ਰੇਣੀਬੱਧ ਕਰਦੀ ਹੈ।
Tis – ਕਾਰਸੀਨੋਮਾ ਇਨ ਸੀਟੂ (ਚਪਟੀ ਰਸੌਲੀ), ਜਿਸਨੂੰ ਕਈ ਵਾਰ Cis (ਕਾਰਸੀਨੋਮਾ ਇਨ ਸੀਟੂ) ਵੀ ਕਿਹਾ ਜਾਂਦਾ ਹੈ।
Ta – ਗੈਰ-ਧਾਵਕ ਪੈਪਿਲਰੀ ਕਾਰਸੀਨੋਮਾ।
T1 – ਰਸੌਲੀ ਬਲੈਡਰ ਦੀ ਕਿਨਾਰੀ ਦੀ ਪਹਿਲੀ ਪਰਤ ਵਿੱਚ ਹੈ, ਪਰ ਆਸ-ਪਾਸ ਦੀ ਮਾਸਪੇਸ਼ੀ ਵਿੱਚ ਨਹੀਂ।
T2 – ਰਸੌਲੀ ਵਧਕੇ ਮਾਸਪੇਸ਼ੀ ਵਿੱਚ ਚਲੀ ਗਈ ਹੈ। ਪੜਾਅ T2a ਵਿੱਚ, ਮਾਸਪੇਸ਼ੀ ਦੀ ਪਰਤ ਦੇ ਅੰਦਰੂਨੀ ਅੱਧੇ ਭਾਗ ਵਿੱਚ ਹੁੰਦੀ ਹੈ ਅਤੇ ਪੜਾਅ T2b ਵਿੱਚ ਇਹ ਬਾਹਰਲੇ ਅੱਧੇ ਭਾਗ ਵਿੱਚ ਹੁੰਦੀ ਹੈ।
T3 – ਰਸੌਲੀ ਵਧਕੇ ਬਲੈਡਰ ਦੀ ਮਾਸਪੇਸ਼ੀ ਦੇ ਆਲੇ-ਦੁਆਲੇ ਚਰਬੀਦਾਰ ਪਰਤ ਵਿੱਚ ਫੈਲ ਗਈ ਹੈ। T3a ਇੱਕ ਸੂਖਮ ਆਕਾਰ ਦੀ ਰਸੌਲੀ ਦਾ ਵਰਣਨ ਕਰਦੀ ਹੈ ਅਤੇ T3b ਇੱਕ ਵੱਡੀ ਰਸੌਲੀ ਦਾ ਜਿਸ ਨੂੰ ਦੇਖਿਆ ਜਾਂ ਮਹਿਸੂਸ ਕੀਤਾ ਜਾ ਸਕਦਾ ਹੈ।
T4 – ਰਸੌਲੀ ਬਲੈਡਰ ਤੋਂ ਬਾਹਰੀ ਅੰਗਾਂ ਤੱਕ ਫੈਲ ਗਈ ਹੈ (T4a) ਜਾਂ ਢਿੱਡ ਜਾਂ ਪੇਡੂ (pelvis) ਦੀ ਦੀਵਾਰ ਤੱਕ ਫੈਲ ਗਈ ਹੈ (T4b)।
ਰਸੌਲੀ ਦੇ ਪਾਸਾਰ ਬਾਰੇ ਉਹ ਸਾਰੀ ਜਾਣਕਾਰੀ ਜੋ ਬਲੈਡਰ ਨੂੰ ਬਾਹਰ ਕੱਢੇ ਬਗੈਰ ਇਕੱਤਰ ਕੀਤੀ ਜਾ ਸਕਦੀ ਹੈ ਉਸਨੂੰ “ਕਲੀਨਿਕੀ ਪੜਾਅ” (clinical staging) ਕਿਹਾ ਜਾਂਦਾ ਹੈ। ਕਲੀਨਿਕਲ ਸਟੇਜਿੰਗ ਸਰੀਰਕ ਮੁਆਇਨੇ, TURBT, ਅਤੇ ਸਕੈਨਾਂ ’ਤੇ ਨਿਰਭਰ ਕਰਦੀ ਹੈ। ਰਸੌਲੀ ਦੇ ਅਸਲੀ ਪਾਸਾਰ ਦਾ ਸਹੀ ਪਤਾ ਬਲੈਡਰ ਨੂੰ ਸਰਜਰੀ ਨਾਲ ਬਾਹਰ ਕੱਢਣ ਅਤੇ ਧਿਆਨ ਨਾਲ ਸੂਖਮਦਰਸ਼ੀ ਹੇਠਾਂ ਜਾਂਚ ਕਰਨ ਤੋਂ ਬਾਅਦ ਹੀ ਲਗਦਾ ਹੈ। ਇਸ ਨੂੰ “ਰੋਗ-ਵਿਗਿਆਨਕ ਪੜਾਅ” (pathological staging) ਕਿਹਾ ਜਾਂਦਾ ਹੈ। ਕਿਉਂਕਿ ਤੁਹਾਡੀ ਇਹ ਸਰਜਰੀ ਨਹੀਂ ਹੋਵੇਗੀ, ਇਸ ਲਈ ਤੁਹਾਡੀ ਡਾਕਟਰੀ ਟੀਮ ਕਲੀਨਿਕ ਪੜਾਅ ’ਤੇ ਭਰੋਸਾ ਕਰੇਗੀ।
ਇਹ ਦਿਖਾਉਣ ਤੋਂ ਇਲਾਵਾ ਕਿ ਤੁਹਾਡਾ ਕੈਂਸਰ ਕਿਸ ਪੜਾਅ ’ਤੇ ਹੈ, ਕੀ ਤੁਹਾਡੀ TURBT ਤੋਂ ਬਾਅਦ ਰੋਗ-ਵਿਗਿਆਨਕ ਰਿਪੋਰਟ (pathology report) ਆਮ ਤੌਰ ’ਤੇ ਇਹ ਦਿਖਾਵੇਗੀ ਕਿ ਕੀ ਤੁਹਾਡੀ ਰਸੌਲੀ “ਉੱਚ ਦਰਜੇ” ਦੀ ਹੈ ਜਾਂ “ਨਿਮਨ ਦਰਜੇ” ਦੀ। ਮੁਕਾਬਲਤਨ ਉੱਚ-ਦਰਜੇ ਦਾ ਕੈਂਸਰ ਵਧ ਸਕਦਾ ਹੈ ਅਤੇ ਵਧੇਰੇ ਤੇਜ਼ੀ ਨਾਲ ਫੈਲ ਸਕਦਾ ਹੈ ਅਤੇ ਇਹ ਵਧੇਰੇ ਜਲਦੀ ਜਾਂ ਵਧੇਰੇ ਆਕਰਮਕ ਇਲਾਜ ਲੋੜ ਸਕਦਾ ਹੈ। ਤੁਹਾਡੇ ਵਿੱਚ ਮਾਸਪੇਸ਼ੀ-ਧਾਵਕ ਬਲੈਡਰ ਕੈਂਸਰ ਦੀ ਤਸ਼ਖੀਸ ਹੋਣਾ ਉੱਚ ਦਰਜੇ ਦੀਆਂ ਰਸੌਲੀਆਂ ਦੀ ਲੱਭਤ ’ਤੇ ਆਧਾਰਿਤ ਹੋ ਸਕਦਾ ਹੈ।
ਰੋਗ-ਵਿਗਿਆਨਕ ਰਿਪੋਰਟ ਦੀ ਇੱਕ ਕਾਪੀ ਸਾਂਭ ਕੇ ਰੱਖੋ, ਜੋ ਤੁਹਾਨੂੰ ਤੁਹਾਡੀ ਰਸੌਲੀ ਦੇ ਪੜਾਅ ਅਤੇ ਦਰਜੇ ਬਾਰੇ ਦੱਸੇਗੀ।
ਹਾਲਾਂਕਿ ਮਾਸਪੇਸ਼ੀ-ਧਾਵਕ ਬਲੈਡਰ ਕੈਂਸਰ ਵਾਸਤੇ ਬਲੈਡਰ ਨੂੰ ਪੂਰੀ ਤਰ੍ਹਾਂ ਬਾਹਰ ਕੱਢਣਾ ਕਈ ਦਹਾਕਿਆਂ ਤੋਂ “ਗੋਲਡ ਸਟੈਂਡਰਡ” ਰਿਹਾ ਹੈ, ਪਰ ਹੁਣ ਇਹ ਸਵੀਕਾਰ ਕੀਤਾ ਜਾਂਦਾ ਹੈ ਕਿ ਧਿਆਨ ਨਾਲ ਚੁਣੇ ਗਏ ਮਰੀਜ਼ਾਂ ਵਾਸਤੇ ਬਲੈਡਰ ਨੂੰ ਬਚਾਅ ਕੇ ਰੱਖਣਾ ਸੁਰੱਖਿਅਤ ਵਿਕਲਪ ਹੈ।
ਮਾਸਪੇਸ਼ੀ-ਧਾਵਕ ਬਲੈਡਰ ਕੈਂਸਰ ਦੇ ਇਲਾਜ ਵਾਸਤੇ ਬਲੈਡਰ ਨੂੰ ਬਚਾਅ ਕੇ ਰੱਖਣ ਦੀ ਪਹੁੰਚ ਆਮ ਤੌਰ ’ਤੇ ਤਿੰਨ ਇਲਾਜਾਂ ਦਾ ਸੁਮੇਲ ਹੁੰਦੀ ਹੈ – ਇੱਕ ਰੇਡੀਏਸ਼ਨ ਚਿਕਿਤਸਾ, ਕੀਮੋਥੈਰੇਪੀ ਅਤੇ ਸੰਪੂਰਨ TUBTURBT. ਇਹਨਾਂ ਤਿੰਨ ਇਲਾਜਾਂ ਦੇ ਸੁਮੇਲ ਨੂੰ “ਤ੍ਰੈ-ਵਿਧੀ ਚਿਕਿਤਸਾ” (trimodal therapy) ਕਿਹਾ ਜਾਂਦਾ ਹੈ, ਜਿਸ ਨੂੰ ਇਸ ਗਾਈਡ-ਪੁਸਤਿਕਾ ਦੇ ਬਾਕੀ ਬਚੇ ਭਾਗ ਵਿੱਚ ਅਸੀਂ TMT ਕਹਾਂਗੇ। ਬਲੈਡਰ ਬਚਾਅ ਕੇ ਰੱਖਣ ਦੀ ਇੱਕ ਹੋਰ ਪਹੁੰਚ ਹੈ ਬਲੈਡਰ ਨੂੰ ਸਰਜਰੀ ਨਾਲ ਅੰਸ਼ਕ ਰੂਪ ਵਿੱਚ ਬਾਹਰ ਕੱਢਣਾ।
ਕਿਉਂਕਿ ਤੁਸੀਂ ਸੰਭਾਵੀ ਤੌਰ ’ਤੇ TURBT ਤੋਂ ਜਾਣੂੰ ਹੋ, ਜਿਸ ਨੂੰ ਤੁਸੀਂ ਤਸ਼ਖੀਸ ਦੌਰਾਨ ਕਰਵਾਇਆ ਹੋਵੇਗਾ, ਇਸ ਲਈ ਅਸੀਂ ਇਸ ਇਲਾਜ ਦਾ ਵਰਣਨ ਏਥੇ ਨਹੀਂ ਕਰਾਂਗੇ। ਕੁਝ ਪਲ ਬਾਅਦ, ਅਸੀਂ ਰੇਡੀਏਸ਼ਨ ਅਤੇ ਕੀਮੋਥੈਰੇਪੀ ਬਾਰੇ ਵਧੇਰੇ ਗੱਲਬਾਤ ਕਰਾਂਗੇ, ਪਰ ਚਲੋ ਇਹ ਵਿਚਾਰ-ਵਟਾਂਦਰਾ ਕਰਨ ਤੋਂ ਸ਼ੁਰੂਆਤ ਕਰੀਏ ਕਿ ਕੀ ਤੁਸੀਂ TMT ਵਾਸਤੇ ਜਾਂ ਬਲੈਡਰ ਨੂੰ ਅੰਸ਼ਕ ਤੌਰ ’ਤੇ ਕੱਢੇ ਜਾਣ ਲਈ ਯੋਗਤਾ ਪੂਰੀ ਕਰ ਸਕਦੇ ਹੋ।
ਹਰੇਕ ਬਲੈਡਰ ਦੀ ਰਸੌਲੀ TMT ਵਾਸਤੇ ਢੁਕਵੀਂ ਨਹੀਂ ਹੁੰਦੀ। ਤੁਹਾਡੀ ਡਾਕਟਰੀ ਟੀਮ ਤੁਹਾਨੂੰ ਇਲਾਜ ਬਾਰੇ ਫੈਸਲਾ ਕਰਨ ਵਿੱਚ ਮਦਦ ਕਰੇਗੀ ਤਾਂ ਜੋ ਕਈ ਅਹਿਮ ਕਾਰਕਾਂ ਦੇ ਆਧਾਰ ’ਤੇ ਇਹ ਨਿਰਣਾ ਕੀਤਾ ਜਾ ਸਕੇ ਕਿ ਤੁਹਾਡੇ ਵਾਸਤੇ ਕਿਹੜੀ ਚੀਜ਼ ਸਭ ਤੋਂ ਵਧੀਆ ਹੈ।
ਜੇ ਬਲੈਡਰ ਦੀ ਰਸੌਲੀ ਬਹੁਤ ਜ਼ਿਆਦਾ ਭਾਰੀ ਹੈ ਤਾਂ ਰੇਡੀਏਸ਼ਨ ਘੱਟ ਅਸਰਦਾਰ ਹੁੰਦੀ ਹੈ। ਇਸ ਦਾ ਮਤਲਬ ਇਹ ਹੋਇਆ ਕਿ TMT ਦੀ ਸਿਫਾਰਸ਼ ਨਹੀਂ ਕੀਤੀ ਜਾਂਦੀ ਜੇ ਇਸਦਾ ਮਾਪ 5 ਸੈ.ਮੀ. (ਉਪਰੋਕਤ ਦ੍ਰਿਸ਼ਟਾਂਤ ਦੇਖੋ) ਤੋਂ ਵੱਧ ਹੈ ਜਾਂ ਜੇ ਰਸੌਲੀ ਇੱਕ ਜਾਂ ਦੋਨਾਂ ਗੁਰਦਿਆਂ ਤੋਂ ਪਿਸ਼ਾਬ ਦੇ ਪ੍ਰਵਾਹ ਦੇ ਬੰਦ ਹੋਣ ਦਾ ਕਾਰਨ ਬਣ ਜਾਂਦੀ ਹੈ (ਜਿਸਨੂੰ “ਹਾਈਡ੍ਰੋਨੈਫਰੋਸਿਸ”) ਕਿਹਾ ਜਾਂਦਾ ਹੈ।
ਰੇਡੀਏਸ਼ਨ ਤਾਂ ਵੀ ਘੱਟ ਅਸਰਦਾਰ ਹੁੰਦੀ ਹੈ ਜੇ ਬਲੈਡਰ ਵਿੱਚ ਇੱਕ ਤੋਂ ਵਧੇਰੇ ਰਸੌਲੀਆਂ ਹਨ ਜਾਂ ਜੇ “ਕਾਰਸੀਨੋਮਾ ਇਨ ਸੀਟੂ” (ਕੈਂਸਰ ਦਾ ਇੱਕ ਪੜਾਅ ਜਿਸ ਨੂੰ Cis ਜਾਂ Tis ਕਿਹਾ ਜਾਂਦਾ ਹੈ) ਦੇ ਵਿਸਤਰਿਤ ਖੇਤਰ ਹਨ। ਇਹ ਚਪਟੀਆਂ ਰਸੌਲੀਆਂ ਹੁੰਦੀਆਂ ਹਨ (ਪੰਨਾ 3 ਉੱਤੇ ਚਿੱਤਰ ਦੇਖੋ)। ਅਜਿਹਾ ਕੈਂਸਰ ਦੇ ਮੁੜ ਵਾਪਰਨ ਦੇ ਵਧੇ ਹੋਏ ਜੋਖ਼ਮ ਕਰਕੇ ਹੁੰਦਾ ਹੈ।
ਇਹ ਵੀ ਅਹਿਮ ਹੈ ਕਿ TMT ਸ਼ੁਰੂ ਕਰਨ ਤੋਂ ਪਹਿਲਾਂ ਤੁਹਾਡੇ ਬਲੈਡਰ ਦਾ ਪ੍ਰਕਾਰਜ ਵਧੀਆ ਹੋਵੇ। ਜੇ ਤੁਹਾਨੂੰ ਵਾਰ-ਵਾਰ ਅਤੇ ਤਾਂਘ ਨਾਲ ਪਿਸ਼ਾਬ ਆਉਣ ਦੀਆਂ ਬਹੁਤ ਸਾਰੀਆਂ ਸਮੱਸਿਆਵਾਂ ਹਨ, ਤਾਂ ਹੋ ਸਕਦਾ ਹੈ TMT ਉਚਿਤ ਨਾ ਹੋਵੇ।
25% ਤੱਕ ਮਰੀਜ਼ਾਂ ਵਿੱਚ, TMT ਦੇ ਬਾਵਜੂਦ ਕੈਂਸਰ ਬਲੈਡਰ ਵਿੱਚ ਹੀ ਰਹਿੰਦਾ ਹੈ। ਇਸ ਕੇਸ ਵਿੱਚ, ਫੇਰ ਬਲੈਡਰ ਨੂੰ ਪੂਰੀ ਤਰ੍ਹਾਂ ਬਾਹਰ ਕੱਢਣ ਦੀ ਲੋੜ ਪੈਂਦੀ ਹੈ ਅਤੇ ਪਿਸ਼ਾਬ ਨੂੰ ਸਰੀਰ ਵਿੱਚੋਂ ਬਾਹਰ ਕੱਢਣ ਲਈ ਇੱਕ ਰਸਤਾ ਬਣਾਇਆ ਜਾਂਦਾ ਹੈ।
ਜੇ ਬਲੈਡਰ ਨੂੰ ਪੂਰੀ ਤਰ੍ਹਾਂ ਬਾਹਰ ਕੱਢਣ ਦੀ ਲੋੜ ਪੈਂਦੀ ਹੈ, ਤਾਂ ਬਲੈਡਰ ਦੀ ਥਾਂ ਲੈਣ ਲਈ ਇੱਕ “ਨਵਾਂ ਬਲੈਡਰ” (neobladder) ਜਟਿਲਤਾਵਾਂ ਦੀ ਵਧੇਰੇ ਉੱਚੀ ਦਰ ਨਾਲ ਜੁੜਿਆ ਹੋਵੇਗਾ ਅਤੇ ਬਹੁਤ ਸਾਰੇ ਯੂਰੋਲੋਜਿਸਟ (ਪਿਸ਼ਾਬ-ਮਾਰਗ ਦੇ ਮਾਹਰ ਡਾਕਟਰ) ਕਿਸੇ ਮਰੀਜ਼ ਨੂੰ ਇਸ ਦੀ ਪੇਸ਼ਕਸ਼ ਕਰਨ ਤੋਂ ਝਿਜਕਣਗੇ। ਅਜਿਹਾ ਇਸ ਲਈ ਹੈ ਕਿਉਂਕਿ TMT ਦੌਰਾਨ ਦਿੱਤੀ ਜਾਂਦੀ ਰੇਡੀਏਸ਼ਨ ਛੋਟੀ ਆਂਤੜੀ ਅਤੇ ਸਫਿੰਕਟਰ (ਉਹ ਵਾਲਵ ਜੋ ਪਿਸ਼ਾਬ ਨੂੰ ਸਰੀਰ ਵਿੱਚੋਂ ਬਾਹਰ ਨਿਕਲਣ ਦੇਣ ਲਈ ਖੁੱਲ੍ਹਦਾ ਅਤੇ ਬੰਦ ਹੁੰਦਾ ਹੈ) ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ, ਏਥੋਂ ਤੱਕ ਕਿ ਖੁਰਾਕ ਅਤੇ ਟੀਚੇ ਦੀ ਸਭ ਤੋਂ ਵਧੀਆ ਚੋਣ ਕਰਨ ਨਾਲ ਵੀ। ਸਿੱਟੇ ਵਜੋਂ, ਪਿਸ਼ਾਬ ’ਤੇ ਕੰਟਰੋਲ ਨਾ ਰਹਿਣ ਦਾ ਜੋਖ਼ਮ ਵਧ ਜਾਂਦਾ ਹੈ, ਹਾਲਾਂਕਿ ਕੁਝ ਮਰੀਜ਼ ਜੋ ਨਵਾਂ ਬਲੈਡਰ ਪ੍ਰਾਪਤ ਕਰਦੇ ਹਨ ਉਹਨਾਂ ਦਾ ਰੇਡੀਏਸ਼ਨ ਤੋਂ ਬਾਅਦ ਵੀ ਪਿਸ਼ਾਬ ’ਤੇ ਕੰਟਰੋਲ ਰਹਿ ਸਕਦਾ ਹੈ।
ਕਿਰਪਾ ਕਰਕੇ ਨਵੇਂ ਬਲੈਡਰਾਂ ਅਤੇ ਪਿਸ਼ਾਬ ਮਾਰਗ ਬਦਲਣ ਦੀਆਂ ਹੋਰ ਪ੍ਰਕਿਰਿਆਵਾਂ ਬਾਰੇ ਜਾਣਕਾਰੀ ਵਾਸਤੇ ਕਿਰਪਾ ਕਰਕੇ ਸਾਡੀ ‘ਪੂਰਾ ਬਲੈਡਰ ਕਢਵਾਉਣ ਦੀ ਸਰਜਰੀ ਦਾ ਸਾਹਮਣਾ ਕਰ ਰਹੇ ਮਰੀਜ਼ਾਂ ਵਾਸਤੇ ਮਰੀਜ਼ ਗਾਈਡ-ਪੁਸਤਿਕਾ’ ਦੇਖੋ। ਇਹ ਬਲੈਡਰ ਕੈਂਸਰ ਕੈਨੇਡਾ ਦੀ ਵੈੱਬਸਾਈਟ (www.bladdercancercanada.org) ਤੋਂ ਡਾਊਨਲੋਡ ਕਰਨ ਲਈ ਉਪਲਬਧ ਹੈ।
ਥੋੜ੍ਹੀ ਜਿਹੀ ਗਿਣਤੀ ਦੇ ਮਰੀਜ਼ਾਂ ਵਿੱਚ ਬਹੁਤ ਹੀ ਖਾਸ ਪ੍ਰਸਥਿਤੀਆਂ ਵਿੱਚ ਬਲੈਡਰ ਦਾ ਸਿਰਫ਼ ਕੁਝ ਭਾਗ ਕੱਢਣਾ ਹੀ ਵਾਜਬ ਹੋ ਸਕਦਾ ਹੈ (ਜਿਸ ਨੂੰ “ਅੰਸ਼ਕ ਤੌਰ ’ਤੇ ਬਲੈਡਰ ਕਢਵਾਉਣ ਦੀ ਸਰਜਰੀ” ਕਿਹਾ ਜਾਂਦਾ ਹੈ)। ਹਾਲਾਂਕਿ ਬਲੈਡਰ ਦੇ ਕੁਝ ਭਾਗ ਨੂੰ ਕੱਢੇ ਜਾਣ ਨਾਲ ਸਰਜਰੀ ਨਾਲ ਜੁੜੇ ਸਾਧਾਰਨ ਜੋਖ਼ਮ ਹੁੰਦੇ ਹਨ, ਪਰ ਇਸ ਨਾਲ ਪਿਸ਼ਾਬ ਮਾਰਗ ਅਤੇ ਜਿਨਸੀ ਪ੍ਰਕਾਰਜ ਦਾ ਬਚਾਅ ਹੋ ਜਾਂਦਾ ਹੈ ਅਤੇ ਬਲੈਡਰ ਨੂੰ ਆਂਤੜੀ ਦੇ ਇੱਕ ਸੈਕਸ਼ਨ ਨਾਲ ਬਦਲਣ ਦੀ ਲੋੜ ਤੋਂ ਬਚਿਆ ਜਾ ਸਕਦਾ ਹੈ। ਇਸ ਕਿਸਮ ਦੀ ਸਰਜਰੀ ਤੋਂ ਬਾਅਦ ਮੁੜ-ਸਿਹਤਯਾਬ ਹੋਣਾ ਬਲੈਡਰ ਨੂੰ ਪੂਰੀ ਤਰ੍ਹਾਂ ਕੱਢੇ ਜਾਣ ਤੋਂ ਬਾਅਦ ਨਾਲੋਂ ਬਹੁਤ ਵਧੇਰੇ ਆਸਾਨ ਹੁੰਦਾ ਹੈ।
ਬਲੈਡਰ ਮੋਟੇ ਤੌਰ ’ਤੇ ਤਿਕੋਣੇ ਆਕਾਰ ਦਾ ਹੁੰਦਾ ਹੈ। ਬਲੈਡਰ ਦੇ ਸਿਖਰ ’ਤੇ ਇੱਕ “ਛੱਤ” ਜਾਂ “ਗੁੰਬਦ” ਹੁੰਦਾ ਹੈ, ਅਤੇ ਪਾਸਿਆਂ ਵਾਲੀਆਂ ਦੀਵਾਰਾਂ ਤਿਰਛੇ ਤਰੀਕੇ ਨਾਲ ਹੇਠਾਂ “ਗਰਦਨ” ਤੱਕ ਆਉਂਦੀਆਂ ਹਨ ਜਿੱਥੇ ਪਿਸ਼ਾਬ ਇੱਕ ਅਜਿਹੀ ਟਿਊਬ ਰਾਹੀਂ ਸਰੀਰ ਵਿੱਚੋਂ ਬਾਹਰ ਨਿਕਲਦਾ ਹੈ ਜਿਸ ਨੂੰ “ਪਿਸ਼ਾਬ ਨਾਲੀ” (urethra) ਕਿਹਾ ਜਾਂਦਾ ਹੈ। ਅੰਸ਼ਕ ਤੌਰ ’ਤੇ ਬਲੈਡਰ ਕਢਵਾਉਣ ਦੀ ਸਰਜਰੀ ਨੂੰ ਆਮ ਤੌਰ ’ਤੇ ਧਿਆਨ ਪੂਰਵਕ ਚੁਣੇ ਮਰੀਜ਼ਾਂ ਵਿੱਚ ਹੀ ਵਿਚਾਰਿਆ ਜਾਂਦਾ ਹੈ ਜਿਨ੍ਹਾਂ ਵਿੱਚ ਇੱਕੋ ਇੱਕ ਰਸੌਲੀ ਗੁੰਬਦ ਉੱਤੇ ਜਾਂ ਪਾਸਿਆਂ ਵਾਲਿਆਂ ਦੀਵਾਰਾਂ ਉੱਤੇ ਕਾਫੀ ਉੱਪਰ ਜਾਕੇ ਸਥਿਤ ਹੁੰਦੀ ਹੈ।
ਰਸੌਲੀ 3 ਸੈਂਟੀਮੀਟਰ (1 ਇੰਚ ਤੋਂ ਥੋੜ੍ਹੀ ਵੱਧ) ਤੋਂ ਵੱਧ ਨਹੀਂ ਹੋਣੀ ਚਾਹੀਦੀ, ਅਤੇ ਕੋਈ ‘ਕਾਰਸੀਨੋਮਾ ਇਨ ਸੀਟੂ’ (ਕੈਂਸਰ ਦਾ ਇੱਕ ਪੜਾਅ ਜਿਸ ਨੂੰ Cis ਜਾਂ Tis ਕਿਹਾ ਜਾਂਦਾ ਹੈ) ਨਹੀਂ ਹੋਣਾ ਚਾਹੀਦਾ। ਇਹ ਚਪਟੀਆਂ ਰਸੌਲੀਆਂ ਹੁੰਦੀਆਂ ਹਨ (ਉਪਰੋਕਤ ਦ੍ਰਿਸ਼ਟਾਂਤ ਦੇਖੋ)। ਜੇ ਤੁਹਾਨੂੰ ਅੰਸ਼ਕ ਤੌਰ ’ਤੇ ਬਲੈਡਰ ਕਢਵਾਉਣ ਦੀ ਸਰਜਰੀ ਲਈ ਵਿਚਾਰਿਆ ਜਾ ਰਿਹਾ ਹੈ ਤਾਂ ਤੁਹਾਡੇ ਬਲੈਡਰ ਦੀ ਸਮਰੱਥਾ ਵਧੀਆ ਹੋਣੀ ਚਾਹੀਦੀ ਹੈ। ਬਲੈਡਰ ਦੀ ਸਾਧਾਰਨ ਸਮਰੱਥਾ 400 ਤੋਂ 600 ਮਿਲਲੀਟਰ (ਲਗਭਗ 14 ਤੋਂ 21 ਆਊਂਸ) ਹੁੰਦੀ ਹੈ।
ਰੇਡੀਏਸ਼ਨ ਚਿਕਿਤਸਾ ਵਿੱਚ ਉੱਚ-ਊਰਜਾ ਵਾਲੀ ਰੇਡੀਏਸ਼ਨ (ਜ਼ਿਆਦਾਤਰ ਕਰਕੇ ਐਕਸ-ਕਿਰਨਾਂ) ਦੀ ਵਰਤੋਂ ਕੀਤੀ ਜਾਂਦੀ ਹੈ ਤਾਂ ਜੋ ਰਸੌਲੀਆਂ ਨੂੰ ਸੁੰਗੇੜਿਆ ਜਾ ਸਕੇ ਅਤੇ ਕੈਂਸਰ ਦੇ ਸੈੱਲਾਂ ਨੂੰ ਮਾਰਿਆ ਜਾ ਸਕੇ। ਰੇਡੀਏਸ਼ਨ ਕੈਂਸਰ ਦੇ ਸੈੱਲਾਂ ਦੇ DNA ਨੂੰ ਨੁਕਸਾਨ ਪਹੁੰਚਾਕੇ ਉਹਨਾਂ ਨੂੰ ਮਾਰਦੀ ਹੈ। ਉਹ ਕੈਂਸਰ ਸੈੱਲ ਜਿਨ੍ਹਾਂ ਦਾ DNA ਏਨਾ ਕੁ ਨੁਕਸਾਨ-ਗ੍ਰਸਤ ਹੋ ਜਾਂਦਾ ਹੈ ਕਿ ਮੁਰੰਮਤ ਨਹੀਂ ਹੋ ਸਕਦਾ, ਉਹ ਵਧਣਾ ਬੰਦ ਕਰ ਦਿੰਦੇ ਹਨ ਜਾਂ ਮਰ ਜਾਂਦੇ ਹਨ। ਜਦ ਨੁਕਸਾਨਗ੍ਰਸਤ ਸੈੱਲ ਮਰ ਜਾਂਦੇ ਹਨ, ਤਾਂ ਸਰੀਰ ਦੀਆਂ ਕੁਦਰਤੀ ਪ੍ਰਕਿਰਿਆਵਾਂ ਦੁਆਰਾ ਉਹਨਾਂ ਦਾ ਵਿਘਟਨ ਕਰ ਦਿੱਤਾ ਜਾਂਦਾ ਹੈ ਅਤੇ ਖਤਮ ਕਰ ਦਿੱਤਾ ਜਾਂਦਾ ਹੈ।
ਹਾਲਾਂਕਿ ਰੇਡੀਏਸ਼ਨ ਚਿਕਿਤਸਾ ਸਾਧਾਰਨ ਸੈੱਲਾਂ ਨੂੰ ਵੀ ਨੁਕਸਾਨ ਪਹੁੰਚਾ ਸਕਦੀ ਹੈ, ਪਰ ਤੁਹਾਡੀ ਡਾਕਟਰੀ ਟੀਮ ਰੇਡੀਏਸ਼ਨ ਚਿਕਿਤਸਾ ਦੇ ਕੋਰਸ ਦੀ ਯੋਜਨਾਬੰਦੀ ਬਣਾਉਂਦੇ ਸਮੇਂ ਸਾਧਾਰਨ ਸੈੱਲਾਂ ਨੂੰ ਹੋਣ ਵਾਲੇ ਸੰਭਾਵੀ ਨੁਕਸਾਨ ਨੂੰ ਗਿਣਤੀ-ਮਿਣਤੀ ਵਿੱਚ ਲਵੇਗੀ। ਡਾਕਟਰ ਜਾਣਦੇ ਹਨ ਕਿ ਸਾਧਾਰਨ ਟਿਸ਼ੂ ਕਿੰਨ੍ਹੀ ਕੁ ਰੇਡੀਏਸ਼ਨ ਸੁਰੱਖਿਅਤ ਤਰੀਕੇ ਨਾਲ ਪ੍ਰਾਪਤ ਕਰ ਸਕਦਾ ਹੈ। ਉਹ ਇਸ ਜਾਣਕਾਰੀ ਦੀ ਵਰਤੋਂ ਰੇਡੀਏਸ਼ਨ ਦੇ ਪਾਸਾਰ ਅਤੇ ਮਾਤਰਾ ਬਾਰੇ ਫੈਸਲਾ ਕਰਨ ਵਿੱਚ ਮਦਦ ਕਰਨ ਲਈ ਕਰਦੇ ਹਨ।
ਕੁਝ ਮਾਮਲਿਆਂ ਵਿੱਚ, ਤੁਹਾਡੀ ਡਾਕਟਰੀ ਟੀਮ ਪਹਿਲਾਂ ਬਲੈਡਰ ਵਿੱਚ ਇੱਕ “ਫੀਡੂਸ਼ੀਅਲ ਮਾਰਕਰ” (fiducial marker) ਦਾ ਪ੍ਰਤੀਰੋਪਣ ਕਰ ਸਕਦੀ ਹੈ। ਇਹ ਇੱਕ ਵਸਤੂ ਜਾਂ ਇੱਕ ਵਿਸ਼ੇਸ਼ ਦ੍ਰਵ ਹੁੰਦਾ ਹੈ ਜੋ ਬਲੈਡਰ ਦੇ ਸਕੈਨਾਂ ਉੱਤੇ ਨਜ਼ਰ ਆਉਂਦਾ ਹੈ, ਅਤੇ ਇਹ ਰਸੌਲੀ ਦੀ ਥਾਂ ਨੂੰ ਪਰਿਭਾਸ਼ਿਤ ਕਰਨ ਅਤੇ ਵਧੇਰੇ ਸਟੀਕਤਾ ਨਾਲ ਇਸ ਨੂੰ ਨਿਸ਼ਾਨਾ ਬਣਾਉਣ ਵਿੱਚ ਮਦਦ ਕਰ ਸਕਦਾ ਹੈ।
ਰੇਡੀਏਸ਼ਨ ਚਿਕਿਤਸਾ ਹਸਪਤਾਲ ਦੇ ਰੇਡੀਓਚਿਕਿਤਸਾ ਵਿਭਾਗ ਵਿੱਚ ਥੋੜ੍ਹੀ ਮਿਆਦ ਦੇ ਰੋਜ਼ਾਨਾ ਇਲਾਜਾਂ ਦੀ ਲੜੀ ਵਜੋਂ ਦਿੱਤੀ ਜਾਂਦੀ ਹੈ ਜਿਸ ਨੂੰ ਤੁਸੀਂ ਇੱਕ ਬਾਹਰੀ-ਮਰੀਜ਼ (outpatient) ਵਜੋਂ ਪ੍ਰਾਪਤ ਕਰਦੇ ਹੋ। ਹਰ ਇਲਾਜ ਨੂੰ 10 ਤੋਂ 15 ਮਿੰਟ ਲਗਦੇ ਹਨ, ਅਤੇ ਇਸ ਨੂੰ ਆਮ ਤੌਰ ’ਤੇ ਸੋਮਵਾਰ ਤੋਂ ਸ਼ੁੱਕਰਵਾਰ ਤੱਕ ਦਿੱਤਾ ਜਾਂਦਾ ਹੈ, ਜਦਕਿ ਵੀਕਇੰਡ ’ਤੇ ਆਰਾਮ ਕਰਨਾ ਹੁੰਦਾ ਹੈ। ਬਲੈਡਰ ਦੇ ਕੈਂਸਰ ਵਾਸਤੇ ਰੇਡੀਓਚਿਕਿਤਸਾ ਦਾ ਕੋਰਸ ਚਾਰ ਤੋਂ ਸੱਤ ਹਫਤੇ ਤੱਕ ਚੱਲ ਸਕਦਾ ਹੈ।
ਤੁਸੀਂ ਰੇਡੀਓਚਿਕਿਤਸਾ ਦੇ ਕੋਰਸ ਤੋਂ ਪਹਿਲਾਂ ਜਾਂ ਇਸਦੇ ਦੌਰਾਨ ਕੀਮੋਥੈਰੇਪੀ, ਜਾਂ ਦੋਨੋਂ ਕਰਵਾ ਸਕਦੇ ਹੋ, ਤਾਂ ਜੋ ਰੇਡੀਓਚਿਕਿਤਸਾ ਨੂੰ ਵਧੇਰੇ ਅਸਰਦਾਰ ਬਣਾਉਣ ਵਿੱਚ ਮਦਦ ਕੀਤੀ ਜਾ ਸਕੇ। ਵਧੇਰੇ ਜਾਣਕਾਰੀ ਲਈ “ਕੀਮੋਥੈਰੇਪੀ” ਸੈਕਸ਼ਨ ਦੇਖੋ।
ਬਾਹਰੀ ਰੇਡੀਓਚਿਕਿਤਸਾ ਤੁਹਾਨੂੰ ਰੇਡੀਓਐਕਟਿਵ ਨਹੀਂ ਬਣਾਉਂਦੀ ਅਤੇ ਹਰ ਇਲਾਜ ਸੈਸ਼ਨ ਦੇ ਬਾਅਦ, ਤੁਹਾਡੇ ਵਾਸਤੇ ਹੋਰ ਲੋਕਾਂ ਦੇ ਨਾਲ ਰਹਿਣਾ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ, ਜਿਸ ਵਿੱਚ ਬੱਚੇ ਵੀ ਸ਼ਾਮਲ ਹਨ। ਅਣਚਾਹੇ ਅਸਰ (side effects) ਵਿਆਪਕ ਤੌਰ ’ਤੇ ਵੱਖ-ਵੱਖ ਹੁੰਦੇ ਹਨ ਅਤੇ ਤੁਹਾਡਾ ਡਾਕਟਰ ਇਹਨਾਂ ਬਾਰੇ ਤੁਹਾਡੇ ਨਾਲ ਵਿਚਾਰ-ਵਟਾਂਦਰਾ ਕਰੇਗਾ। ਤੁਹਾਨੂੰ ਹੋ ਸਕਦੇ ਕਿਸੇ ਵੀ ਅਣਚਾਹੇ ਅਸਰਾਂ ਦੀ ਰਿਪੋਰਟ ਆਪਣੇ ਡਾਕਟਰ ਨੂੰ ਛੇਤੀ ਤੋਂ ਛੇਤੀ ਕਰਨਾ ਯਕੀਨੀ ਬਣਾਓ, ਕਿਉਂਕਿ ਕੁਝ ਇਲਾਜ ਹਨ ਜੋ ਮਦਦ ਕਰ ਸਕਦੇ ਹਨ। ਵਧੇਰੇ ਜਾਣਕਾਰੀ ਵਾਸਤੇ “ਇਲਾਜਾਂ ਦੇ ਅਣਚਾਹੇ ਅਸਰ” ਸੈਕਸ਼ਨ ਦੇਖੋ।
ਰੇਡੀਏਸ਼ਨ ਚਿਕਿਤਸਾ ਕਰਵਾਉਣ ਤੋਂ ਬਾਅਦ ਵਾਲੇ ਸਾਲਾਂ ਵਿੱਚ, ਮਰੀਜ਼ਾਂ ਦਾ ਨੇੜੇ ਤੋਂ ਅਨੁਸਰਣ ਕਰਨ ਦੀ ਲੋੜ ਹੁੰਦੀ ਹੈ – ਬਲੈਡਰ ਵਿੱਚ ਕੈਂਸਰ ਦੇ ਪੁਨਰ ਵਰਤਾਰੇ ਦੀ ਸੰਭਾਵਨਾ ਵਾਸਤੇ ਵੀ ਜਿਸ ਲਈ ਸਰਜਰੀ ਦੀ ਲੋੜ ਪੈ ਸਕਦੀ ਹੈ, ਅਤੇ ਇਸ ਲਈ ਵੀ ਕਿਉਂਕਿ ਕੁਝ ਮਰੀਜ਼ਾਂ ਵਿੱਚ ਰੇਡੀਏਸ਼ਨ ਕਰਕੇ ਬਲੈਡਰ ਜਾਂ ਆਂਤੜੀ ਦੀਆਂ ਜਟਿਲਤਾਵਾਂ ਵਿਕਸਿਤ ਹੋ ਸਕਦੀਆਂ ਹਨ।
ਕੀਮੋਥੈਰੇਪੀ (ਜਾਂ “ਕੀਮੋ”) ਵਿੱਚ ਕੈਂਸਰ ਦੇ ਸੈੱਲਾਂ ਨੂੰ ਨਸ਼ਟ ਕਰਨ ਲਈ ਦਵਾਈਆਂ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਇਸ ਅਰਥ ਤੋਂ, ਕੀਮੋਥੈਰੇਪੀ ਦਾ ਪ੍ਰਭਾਵ ਉਹੀ ਹੁੰਦਾ ਹੈ ਜੋ ਰੇਡੀਏਸ਼ਨ ਚਿਕਿਤਸਾ ਦਾ ਹੁੰਦਾ ਹੈ। ਕੁਝ ਕੀਮੋਥੈਰੇਪੀ ਦਵਾਈਆਂ ਇਕੱਲੇ ਤੌਰ ’ਤੇ ਦਿੱਤੀਆਂ ਜਾਂਦੀਆਂ ਹਨ ਜਾਂ ਕਈ ਕੀਮੋਥੈਰੇਪੀ ਦਵਾਈਆਂ ਨੂੰ ਇਕੱਠਿਆਂ ਵੀ ਦਿੱਤਾ ਜਾ ਸਕਦਾ ਹੈ।
ਕੁਝ ਵਿਸ਼ੇਸ਼ ਕੀਮੋਥੈਰੇਪੀ ਦਵਾਈਆਂ ਨੂੰ ਕੈਂਸਰ ਸੈੱਲਾਂ ਨੂੰ ਰੇਡੀਏਸ਼ਨ ਚਿਕਿਤਸਾ ਪ੍ਰਤੀ ਵਧੇਰੇ ਪ੍ਰਤੀਕਿਰਿਆ ਦਿਖਾਉਣ ਵਾਲੇ ਬਣਾਉਂਦੀਆਂ ਦਿਖਾਇਆ ਜਾ ਚੁੱਕਾ ਹੈ। ਇਸੇ ਕਾਰਨ ਕਰਕੇ, ਰੇਡੀਏਸ਼ਨ ਚਿਕਿਤਸਾ ਅਤੇ ਕੀਮੋਥੈਰੇਪੀ ਨੂੰ ਅਕਸਰ ਇਕੱਠਿਆਂ ਕੀਤਾ ਜਾਂਦਾ ਹੈ (ਜਿਸ ਨੂੰ “ਸਮਵਰਤੀ” ਜਾਂ “ਨਾਲੋ-ਨਾਲ” ਚਿਕਿਤਸਾ ਕਿਹਾ ਜਾਂਦਾ ਹੈ)। ਕੁਝ ਕੇਸਾਂ ਵਿੱਚ, ਕੀਮੋਥੈਰੇਪੀ ਨੂੰ ਕਈ ਹਫਤਿਆਂ ਦੌਰਾਨ ਰੇਡੀਏਸ਼ਨ ਨਾਲ ਇਲਾਜ ਸ਼ੁਰੂ ਹੋਣ ਤੋਂ ਪਹਿਲਾਂ ਕੀਤਾ ਜਾਂਦਾ ਹੈ (ਇਸ ਨੂੰ “ਨੀਓਐਡਜੂਵੈਂਟ” ਕਿਹਾ ਜਾਂਦਾ ਹੈ)।
ਰੇਡੀਏਸ਼ਨ ਅਤੇ ਕੀਮੋਥੈਰੇਪੀ ਦਾ ਸੁਮੇਲ ਕਰਨਾ ਤੁਹਾਨੂੰ ਆਪਣੇ ਸਰੀਰ ਵਿੱਚ ਬਲੈਡਰ ਦੇ ਕੈਂਸਰ ਦੇ ਸੈੱਲਾਂ ਨੂੰ ਮਾਰਨ ਦਾ ਸਭ ਤੋਂ ਵਧੀਆ ਮੌਕਾ ਦਿੰਦਾ ਹੈ।
ਜ਼ਿਆਦਾਤਰ ਕੀਮੋਥੈਰੇਪੀ ਦਵਾਈਆਂ ਨੂੰ “ਨਸ ਦੇ ਰਾਹੀਂ ਦਿੱਤੇ” (IV) ਇਲਾਜ ਰਾਹੀਂ ਲਹੂ ਦੇ ਗੇੜ ਵਿੱਚ ਪਾਇਆ ਜਾਂਦਾ ਹੈ। ਹਰੇਕ ਇਲਾਜ ਕੁਝ ਮਿੰਟਾਂ ਤੋਂ ਲੈਕੇ ਕੁਝ ਘੰਟੇ ਤੱਕ ਚੱਲ ਸਕਦਾ ਹੈ।
ਜਿਵੇਂ ਕਿ ਰੇਡੀਏਸ਼ਨ ਚਿਕਿਤਸਾ ਨਾਲ ਹੁੰਦਾ ਹੈ, ਕੀਮੋਥੈਰੇਪੀ ਦੇ ਵੀ ਅਣਚਾਹੇ ਅਸਰ ਹੋ ਸਕਦੇ ਹਨ, ਜਿਨ੍ਹਾਂ ਬਾਰੇ ਤੁਹਾਨੂੰ ਆਪਣੇ ਡਾਕਟਰ ਨਾਲ ਵਿਚਾਰ-ਵਟਾਂਦਰਾ ਕਰਨਾ ਚਾਹੀਦਾ ਹੈ। ਅਣਚਾਹੇ ਅਸਰ ਵਿਆਪਕ ਤੌਰ ’ਤੇ ਵੱਖ-ਵੱਖ ਹੁੰਦੇ ਹਨ ਅਤੇ ਤੁਹਾਨੂੰ ਹੋ ਸਕਦੇ ਕਿਸੇ ਵੀ ਅਣਚਾਹੇ ਅਸਰਾਂ ਵਾਸਤੇ ਅਕਸਰ ਇਲਾਜ ਉਪਲਬਧ ਹੁੰਦੇ ਹਨ। ਵਧੇਰੇ ਜਾਣਕਾਰੀ ਵਾਸਤੇ “ਇਲਾਜਾਂ ਦੇ ਅਣਚਾਹੇ ਅਸਰ” ਸੈਕਸ਼ਨ ਦੇਖੋ। ਅਣਚਾਹੇ ਅਸਰਾਂ ਦੇ ਜੋਖ਼ਮ ਕਰਕੇ ਕੁਝ ਮਰੀਜ਼ ਕੀਮੋਥੈਰੇਪੀ ਪ੍ਰਾਪਤ ਕਰਨ ਦੇ ਯੋਗ ਨਹੀਂ ਹੋਣਗੇ, ਅਤੇ ਇਹ ਮਰੀਜ਼ ਸਿਰਫ਼ ਰੇਡੀਏਸ਼ਨ ਕਰਵਾ ਸਕਦੇ ਹਨ।
ਜਦ ਤੁਸੀਂ ਬਲੈਡਰ ਦਾ ਬਚਾਅ ਕਰਨ ਵਾਲੀ ਚਿਕਿਤਸਾ ਕਰਵਾ ਰਹੇ ਹੁੰਦੇ ਹੋ, ਤਾਂ ਕੀਮੋਥੈਰੇਪੀ ਅਤੇ ਰੇਡੀਏਸ਼ਨ ਸ਼ੁਰੂ ਕਰਨ ਤੋਂ ਪਹਿਲਾਂ ਤੁਹਾਨੂੰ ਬਲੈਡਰ ਦੀ ਰਸੌਲੀ ਦਾ ਵੱਧ ਤੋਂ ਵੱਧ ਸੰਭਵ ਭਾਗ ਕੱਢਣ ਲਈ TURBT ਦੁਹਰਾਉਣ ਦੀ ਲੋੜ ਪੈ ਸਕਦੀ ਹੈ।
ਜਦ ਇਲਾਜ ਅੱਗੇ ਵਧਦਾ ਹੈ ਤਾਂ TURBTs ਨੂੰ ਦੁਹਰਾਇਆ ਜਾ ਸਕਦਾ ਹੈ ਤਾਂ ਜੋ ਉਹਨਾਂ ਕਿਸੇ ਵਾਧੂ ਰਸੌਲੀਆਂ ਨੂੰ ਬਾਹਰ ਕੱਢਿਆ ਜਾ ਸਕੇ ਜੋ ਵਧ ਗਈਆਂ ਹਨ। ਇਹਨਾਂ ਰਸੌਲੀਆਂ ਦੀ ਪਛਾਣ “ਸਿਸਟੋਸਕੋਪੀ” ਦੀ ਵਰਤੋਂ ਕਰਕੇ ਕੀਤੀ ਜਾਂਦੀ ਹੈ (ਪਿਸ਼ਾਬ-ਨਾਲੀ ਵਿੱਚ ਇੱਕ ਟਿਊਬ ਦਾਖਲ ਕਰਨ ਅਤੇ ਇੱਕ ਛੋਟੇ ਕੈਮਰੇ ਦੀ ਵਰਤੋਂ ਕਰਕੇ ਬਲੈਡਰ ਦੇ ਅੰਦਰ ਦੇਖਣ ਦੀ ਪ੍ਰਕਿਰਿਆ)ਜੋ ਸੰਭਵ ਤੌਰ ’ਤੇ ਤੁਸੀਂ ਪਹਿਲਾਂ ਹੀ ਕਰਵਾਈ ਹੋਵੇਗੀ।
ਅਣਚਾਹੇ ਅਸਰ ਕਿਸੇ ਵੀ ਇਲਾਜ ਨਾਲ ਵਾਪਰ ਸਕਦੇ ਹਨ, ਪਰ ਇਹ ਹਰ ਕਿਸੇ ਨੂੰ ਨਹੀਂ ਹੁੰਦੇ ਜਾਂ ਹਰ ਕੋਈ ਇਹਨਾਂ ਨੂੰ ਸਮਾਨ ਤਰੀਕੇ ਨਾਲ ਅਨੁਭਵ ਨਹੀਂ ਕਰਦਾ। ਹਾਲਾਂਕਿ ਅਣਚਾਹੇ ਅਸਰ ਖੁਸ਼ਗਵਾਰ ਨਹੀਂ ਹੁੰਦੇ, ਪਰ ਇਹਨਾਂ ਦੀ ਤੁਲਨਾ ਤੁਹਾਡੇ ਕੈਂਸਰ ਨੂੰ ਘਟਾਉਣ ਜਾਂ ਖਤਮ ਕਰਨ ਦੇ ਲਾਭ ਦੇ ਮੱਦੇ ਨਜ਼ਰ ਕੀਤੀ ਜਾਣੀ ਚਾਹੀਦੀ ਹੈ।
ਕੀਮੋਥੈਰੇਪੀ ਦੇ ਅਣਚਾਹੇ ਅਸਰ ਵਰਤੀ ਗਈ ਦਵਾਈ ਦੀ ਕਿਸਮ ਅਤੇ ਖੁਰਾਕ, ਦਵਾਈ ਕਿਵੇਂ ਦਿੱਤੀ ਜਾਂਦੀ ਹੈ ਅਤੇ ਤੁਹਾਡੀ ਸਮੁੱਚੀ ਸਿਹਤ ’ਤੇ ਨਿਰਭਰ ਕਰਨਗੇ। ਇਹ ਕੀਮੋਥੈਰੇਪੀ ਦੇ ਦੌਰਾਨ ਜਾਂ ਬਾਅਦ ਵਿੱਚ ਕਦੇ ਵੀ ਵਾਪਰ ਸਕਦੇ ਹਨ। ਜ਼ਿਆਦਾਤਰ ਅਣਚਾਹੇ ਅਸਰ ਕੀਮੋਥੈਰੇਪੀ ਖਤਮ ਹੋਣ ਤੋਂ ਬਾਅਦ ਚਲੇ ਜਾਂਦੇ ਹਨ, ਹਾਲਾਂਕਿ ਕੁਝ ਅਣਚਾਹੇ ਅਸਰ ਲੰਬੇ ਸਮੇਂ ਤੱਕ ਚੱਲਣ ਵਾਲੇ ਜਾਂ ਏਥੋਂ ਤੱਕ ਕਿ ਸਥਾਈ ਵੀ ਹੋ ਸਕਦੇ ਹਨ।
ਕੀਮੋਥੈਰੇਪੀ ਦਵਾਈਆਂ ਦੇ ਕੁਝ ਸਭ ਤੋਂ ਵੱਧ ਆਮ ਅਣਚਾਹੇ ਅਸਰਾਂ ਵਿੱਚ ਸ਼ਾਮਲ ਹਨ ਥਕਾਵਟ, ਜੀਅ ਮਤਲਾਉਣਾ, ਖੂਨ ਵਿੱਚ ਸੈੱਲਾਂ ਦੀ ਗਿਣਤੀ ਵਿੱਚ ਤਬਦੀਲੀਆਂ, ਭੁੱਖ ਘੱਟ ਲੱਗਣੀ, ਟੱਟੀ-ਪਿਸ਼ਾਬ ਉੱਤੇ ਅਸਰ, ਅਤੇ ਵਾਲ਼ਾਂ ਦਾ ਝੜਨਾ। ਤੁਹਾਡੇ ਵੱਲੋਂ ਅਨੁਭਵ ਕੀਤੇ ਜਾਂਦੇ ਕਿਸੇ ਵੀ ਅਣਚਾਹੇ ਅਸਰਾਂ ਬਾਰੇ ਆਪਣੀ ਡਾਕਟਰੀ ਟੀਮ ਨੂੰ ਦੱਸਣਾ ਅਹਿਮ ਹੈ, ਕਿਉਂਕਿ ਇਹਨਾਂ ਵਿੱਚੋਂ ਕਈਆਂ ਦਾ ਇਲਾਜ ਕੀਤਾ ਜਾ ਸਕਦਾ ਹੈ। ਇਲਾਜ ਬੰਦ ਕਰਨ ਤੋਂ ਬਾਅਦ ਵਾਲ਼ ਆਮ ਤੌਰ ’ਤੇ ਵਾਪਸ ਉੱਗ ਆਉਂਦੇ ਹਨ।
ਰੇਡੀਏਸ਼ਨ ਚਿਕਿਤਸਾ ਦੇ ਕੁਝ ਵਧੇਰੇ ਆਮ ਅਣਚਾਹੇ ਅਸਰ ਹਨ ਥਕਾਵਟ; ਪਿਸ਼ਾਬ ਦੇ ਪ੍ਰਕਾਰਜ ਉੱਤੇ ਅਸਰ, ਜਿਵੇਂ ਕਿ ਬਾਰੰਬਾਰਤਾ, ਤਾਂਘ, ਪਿਸ਼ਾਬ ਕਰਦੇ ਸਮੇਂ ਹਲਕੀ ਜਲਣ ਦੀ ਸੰਵੇਦਨਾ; ਅਤੇ ਟੱਟੀ ਆਉਣ ਉੱਤੇ ਅਸਰ। ਅਣਚਾਹੇ ਅਸਰ ਜ਼ਿਆਦਾਤਰ ਇਲਾਜਾਂ ਦੇ ਖਤਮ ਹੋਣ ਤੋਂ ਬਾਅਦ ਚਲੇ ਜਾਂਦੇ ਹਨ, ਪਰ ਰੇਡੀਏਸ਼ਨ ਦੇ ਬਲੈਡਰ ਉੱਤੇ ਅਤੇ ਆਂਤੜੀ ਦੇ ਪ੍ਰਕਾਰਜ ਉੱਤੇ ਕੁਝ ਲੰਬੀ-ਮਿਆਦ ਦੇ ਪ੍ਰਭਾਵ ਹੋ ਸਕਦੇ ਹਨ।
ਇੱਕ ਵਾਰ ਫੇਰ, ਕਿਸੇ ਵੀ ਅਣਚਾਹੇ ਅਸਰਾਂ ਬਾਰੇ ਆਪਣੀ ਮੈਡੀਕਲ ਟੀਮ ਨਾਲ ਵਿਚਾਰ-ਵਟਾਂਦਰਾ ਕਰਨਾ ਅਹਿਮ ਹੈ, ਕਿਉਂਕਿ ਉਹ ਇਹਨਾਂ ਨੂੰ ਹਲਕੇ ਕਰਨ ਦੇ ਤਰੀਕਿਆਂ ਦਾ ਸੁਝਾਅ ਦੇ ਸਕਦੇ ਹਨ।
ਹੈਲਥ ਕੈਨੇਡਾ ਵੱਲੋਂ ਮਨਜ਼ੂਰਸ਼ੁਦਾ ਚਿਕਿਤਸਾਵਾਂ ਤੋਂ ਇਲਾਵਾ, ਤੁਸੀਂ ਇੱਕ ਕਲੀਨਿਕੀ ਪਰਖ ਦੇ ਰਾਹੀਂ ਹੋਰ ਬਲੈਡਰ ਕੈਂਸਰ ਸੰਬੰਧੀ ਚਿਕਿਤਸਾਵਾਂ ਤੱਕ ਪਹੁੰਚ ਕਰਨ ਦੇ ਯੋਗ ਹੋ ਸਕਦੇ ਹੋ।
ਕਲੀਨਿਕੀ ਪਰਖ ਇੱਕ ਖੋਜ ਅਧਿਐਨ ਹੁੰਦੀ ਹੈ ਜਿਸ ਵਿੱਚ ਇਹ ਟੈਸਟ ਕੀਤਾ ਜਾਂਦਾ ਹੈ ਕਿ ਇੱਕ ਨਵੀਂ ਡਾਕਟਰੀ ਪਹੁੰਚ ਲੋਕਾਂ ਵਿੱਚ ਕਿੰਨ੍ਹੀ ਕੁ ਚੰਗੀ ਤਰ੍ਹਾਂ ਕੰਮ ਕਰਦੀ ਹੈ। ਹਰ ਅਧਿਐਨ ਵਿਗਿਆਨਕ ਸਵਾਲਾਂ ਦੇ ਜਵਾਬ ਦਿੰਦਾ ਹੈ ਅਤੇ ਕਿਸੇ ਬਿਮਾਰੀ, ਜਿਵੇਂ ਕਿ ਬਲੈਡਰ ਕੈਂਸਰ, ਦੀ ਰੋਕਥਾਮ ਕਰਨ, ਇਸ ਦੀ ਪੂਰਵ-ਪੜਤਾਲ ਕਰਨ, ਤਸ਼ਖੀਸ ਕਰਨ ਜਾਂ ਇਲਾਜ ਕਰਨ ਦੇ ਬਿਹਤਰ ਤਰੀਕੇ ਲੱਭਣ ਦੀ ਕੋਸ਼ਿਸ਼ ਕਰਦਾ ਹੈ। ਕਿਸੇ ਕਲੀਨਿਕੀ ਪਰਖ ਵਿੱਚ ਭਾਗ ਲੈਣ ਦੁਆਰਾ, ਤੁਸੀਂ ਖੋਜ ਕਰਤਾਵਾਂ ਨੂੰ ਅਹਿਮ ਸਵਾਲਾਂ ਦਾ ਜਵਾਬ ਦੇਣ ਵਿੱਚ ਮਦਦ ਕਰੋਂਗੇ ਜਿਸ ਨਾਲ ਨਵੇਂ ਅਸਰਦਾਰ ਇਲਾਜਾਂ ਦਾ ਵਿਕਾਸ ਅੱਗੇ ਵਧੇਗਾ। ਕਲੀਨਿਕੀ ਪਰਖਾਂ ਤੁਹਾਨੂੰ ਤੁਹਾਡੀ ਇਲਾਜ ਯੋਜਨਾ ਵਿੱਚ ਕੋਈ ਹੋਰ ਵਿਕਲਪ ਵੀ ਪ੍ਰਦਾਨ ਕਰਾ ਸਕਦੀਆਂ ਹਨ।
ਕਲੀਨਿਕੀ ਪਰਖ ਸੰਬੰਧੀ ਵੈੱਬਸਾਈਟਾਂ ਤੁਹਾਨੂੰ ਉਹ ਕਲੀਨਿਕੀ ਪਰਖਾਂ ਲੱਭਣ ਵਿੱਚ ਮਦਦ ਕਰਨਗੀਆਂ ਜੋ ਤੁਹਾਡੇ ਖੇਤਰ ਵਿੱਚ ਉਪਲਬਧ ਹੋ ਸਕਦੀਆਂ ਹਨ। ਇਹ ਹੈ ਇੱਕ ਵੈੱਬਸਾਈਟ ਜੋ ਤੁਸੀਂ ਦੇਖ ਸਕਦੇ ਹੋ: www.canadiancancertrials.ca. ਇਹ ਸਾਈਟ ਸਿਰਫ਼ ਕੈਨੇਡੀਅਨ ਪਰਖਾਂ ਦੀ ਹੀ ਸੂਚੀ ਦਿੰਦੀ ਹੈ। ਤੁਸੀਂ ‘ਕੈਂਸਰ ਦੀ ਕਿਸਮ ਚੁਣੋ’ ਤਹਿਤ ਬਲੈਡਰ ਕੈਂਸਰ ਦੀ ਚੋਣ ਕਰਨ ਦੁਆਰਾ ਆਪਣੀ ਤਲਾਸ਼ ਦਾ ਘੇਰਾ ਤੰਗ ਕਰ ਸਕਦੇ ਹੋ। ਜੇ ਤੁਹਾਡੇ ਵੱਲੋਂ ਦੇਖੀ ਜਾਂਦੀ ਸੂਚੀ ਉੱਤੇ ਬਲੈਡਰ ਕੈਂਸਰ ਦਿਖਾਈ ਨਹੀਂ ਦਿੰਦਾ ਤਾਂ ਤੁਹਾਨੂੰ “ਹੋਰ ਦਿਖਾਓ” ਦੀ ਚੋਣ ਕਰਨ ਦੀ ਲੋੜ ਪੈ ਸਕਦੀ ਹੈ। ਤੁਸੀਂ ਪ੍ਰਾਂਤ, ਸ਼ਹਿਰ ਜਾਂ ਪਰਖ ਕੇਂਦਰ ਮੁਤਾਬਿਕ ਵੀ ਤਲਾਸ਼ ਕਰ ਸਕਦੇ ਹੋ।
ਇਹ ਬਹੁਤ ਅਹਿਮ ਹੈ ਕਿ ਤੁਸੀਂ ਆਪਣੀ ਡਾਕਟਰੀ ਟੀਮ ਨਾਲ ਇਹ ਵਿਚਾਰ-ਵਟਾਂਦਰਾ ਕਰੋ ਕਿ ਕੀ ਕੋਈ ਕਲੀਨਿਕੀ ਪਰਖ ਤੁਹਾਡੇ ਲਈ ਸਹੀ ਹੈ।
ਤੁਹਾਡੀਆਂ ਭਾਵਨਾਵਾਂ ਦਾ ਸਭ ਤੋਂ ਵਧੀਆ ਵਰਣਨ “ਰੋਲਰਕੋਸਟਰ” ਵਜੋਂ ਕੀਤਾ ਜਾ ਸਕਦਾ ਹੈ। ਇਹ ਪੂਰੀ ਤਰ੍ਹਾਂ ਸਾਧਾਰਨ ਗੱਲ ਹੈ – ਆਖਰਕਾਰ, ਤੁਹਾਡੇ ਵਿੱਚ ਕੈਂਸਰ ਦੀ ਤਸ਼ਖੀਸ ਕੀਤੀ ਗਈ ਹੈ। ਆਪਣੇ ਆਸਪਾਸ ਸਹਾਇਤਾ ਕਰਨ ਵਾਲੇ ਪਰਿਵਾਰ ਅਤੇ ਦੋਸਤਾਂ ਨੂੰ ਰੱਖਣ ਨਾਲ ਮਦਦ ਮਿਲਦੀ ਹੈ। ਜਿਸ ਚੀਜ਼ ਵਿੱਚੋਂ ਤੁਸੀਂ ਗੁਜ਼ਰ ਰਹੇ ਹੋ ਉਸ ਵਿੱਚੋਂ ਗੁਜ਼ਰੇ ਹੋਰ ਲੋਕਾਂ ਨਾਲ ਗੱਲ ਕਰਨ ਦੁਆਰਾ ਆਪਣੀਆਂ ਭਾਵਨਾਵਾਂ ਜ਼ਾਹਰ ਕਰਨ ਤੋਂ ਡਰੋ ਨਾ।
ਬਲੈਡਰ ਕੈਂਸਰ ਕੈਨੇਡਾ ਵਿਖੇ ਸਾਡੇ ਨਾਲ ਸੰਪਰਕ ਕਰੋ ਅਤੇ ਅਸੀਂ ਤੁਹਾਡਾ ਸੰਪਰਕ ਕਿਸੇ ਨਾਲ ਕਰਵਾ ਸਕਦੇ ਹਾਂ। ਸਾਡੀ ਸੰਪਰਕ ਜਾਣਕਾਰੀ ਇਸ ਗਾਈਡ-ਪੁਸਤਿਕਾ ਦੇ ਪਿਛਲੇ ਕਵਰ ’ਤੇ ਹੈ।
ਆਪਣੇ ਕੰਮ ’ਤੇ ਧਿਆਨ-ਕੇਂਦਰਿਤ ਕਰੋ – ਮੁੜ-ਸਿਹਤਯਾਬੀ ਅਤੇ ਇੱਕ ਨਵੀਂ ਜੀਵਨਸ਼ੈਲੀ ਦੀ ਸਿਰਜਣਾ ਕਰਨਾ। ਯਾਦ ਰੱਖੋ, ਤੁਹਾਡਾ ਉਸਾਰੂ ਰਵੱਈਆ ਤੁਹਾਡੀ ਮੁੜ-ਸਿਹਤਯਾਬੀ ਵਿੱਚ ਇੱਕ ਮੁੱਖ ਤੱਤ ਹੋਵੇਗਾ।
ਬਲੈਡਰ ਕੈਂਸਰ ਕੈਨੇਡਾ ਦੀ ਵੈੱਬਸਾਈਟ (www.bladdercancercanada.org) ’ਤੇ ਜਾਣਕਾਰੀ ਦਾ ਖਜਾਨਾ ਹੈ, ਜਿਸ ਵਿੱਚ ਹੋਰ ਭਰੋਸੇਯੋਗ ਵੈੱਬਸਾਈਟਾਂ ਲਈ ਲਿੰਕ ਵੀ ਸ਼ਾਮਲ ਹਨ।
ਇੰਟਰਨੈੱਟ ਢੇਰ ਸਾਰੀ ਜਾਣਕਾਰੀ ਪ੍ਰਦਾਨ ਕਰਾਉਂਦਾ ਹੈ, ਇਸ ਵਿੱਚੋਂ ਕੁਝ ਸਟੀਕ ਅਤੇ ਮਦਦਗਾਰੀ ਹੁੰਦੀ ਹੈ ਅਤੇ ਕੁਝ ਕੁ ਗਲਤ ਅਤੇ ਹੋਰ ਸਭ ਕੁਝ ਹੁੰਦੀ ਹੈ ਪਰ ਮਦਦਗਾਰੀ ਨਹੀਂ। ਹਾਲਾਂਕਿ, ਕਈ ਵਿਸ਼ਵ-ਸ਼੍ਰੇਣੀ ਦੇ ਕੈਂਸਰ ਕੇਂਦਰ ਔਨਲਾਈਨ ਜਾਣਕਾਰੀ ਪ੍ਰਦਾਨ ਕਰਦੇ ਹਨ ਜਿਸ ਤੋਂ ਤੁਹਾਨੂੰ ਮਦਦ ਮਿਲ ਸਕਦੀ ਹੈ। ਪਰ ਤੁਹਾਡੇ ਵਿਸ਼ੇਸ਼ ਕੇਸ ਵਿੱਚ ਜਾਣਕਾਰੀ ਦਾ ਸਭ ਤੋਂ ਵਧੀਆ ਸਰੋਤ ਤੁਹਾਡੀ ਖੁਦ ਦੀ ਡਾਕਟਰੀ ਟੀਮ ਹੁੰਦੀ ਹੈ।
ਜੇ ਤੁਸੀਂ ਆਪਣੇ ਡਾਕਟਰ ਦੀ ਸਲਾਹ ਬਾਰੇ ਨਿਸ਼ਚਿਤ ਨਹੀਂ ਹੋ, ਤਾਂ ਤੁਹਾਨੂੰ ਦੂਜਾ ਨਜ਼ਰੀਆ ਲੈਣ ਦਾ ਹੱਕ ਹੈ। ਤੁਹਾਡੀ ਸਿਫਾਰਸ਼ ਕਿਸ ਕੋਲ ਕੀਤੀ ਜਾ ਸਕਦੀ ਹੈ, ਕਿਰਪਾ ਕਰਕੇ ਇਸ ਬਾਰੇ ਆਪਣੇ ਪਰਿਵਾਰਕ ਡਾਕਟਰ ਜਾਂ ਬਲੈਡਰ ਕੈਂਸਰ ਕੈਨੇਡਾ ਨਾਲ ਗੱਲ ਕਰੋ।
ਬਲੈਡਰ ਕੈਂਸਰ ਸੰਬੰਧੀ ਮਸਲਿਆਂ ਲਈ ਸਮਰਪਿਤ ਪਹਿਲੇ ਅਤੇ ਇੱਕੋ ਇੱਕ ਕੈਨੇਡੀਅਨ ਮਰੀਜ਼ ਵਕਾਲਤ ਸੰਗਠਨ ਹੋਣ ਵਜੋਂ, ਬਲੈਡਰ ਕੈਂਸਰ ਕੈਨੇਡਾ ਨੂੰ ਮਰੀਜ਼ਾਂ, ਉਹਨਾਂ ਦੇ ਦੇਖਭਾਲ ਕਰਤਾਵਾਂ ਅਤੇ ਪਰਿਵਾਰਾਂ ਨੂੰ ਸਹਾਇਤਾ ਅਤੇ ਸਰੋਤ ਪ੍ਰਦਾਨ ਕਰਾਉਣ ’ਤੇ ਮਾਣ ਹੈ ਤਾਂ ਜੋ ਬਲੈਡਰ ਦੇ ਕੈਂਸਰ ਦੀ ਤਸ਼ਖੀਸ ਹੋਣ ਨਾਲ ਸਿੱਝਣ ਵਿੱਚ ਮਦਦ ਕੀਤੀ ਜਾ ਸਕੇ। ਬਲੈਡਰ ਕੈਂਸਰ ਕੈਨੇਡਾ ਨੂੰ ਕੋਈ ਸਰਕਾਰੀ ਫ਼ੰਡ ਸਹਾਇਤਾ ਨਹੀਂ ਮਿਲਦੀ ਅਤੇ ਇਹ ਮਰੀਜ਼ਾਂ ਅਤੇ ਉਹਨਾਂ ਦੇ ਪਰਿਵਾਰਾਂ ਨੂੰ ਇਸ ਮੁਫ਼ਤ ਗਾਈਡ-ਪੁਸਤਿਕਾ ਵਰਗੇ ਪ੍ਰੋਗਰਾਮਾਂ ਅਤੇ ਸੇਵਾਵਾਂ ਦੀ ਪੇਸ਼ਕਸ਼ ਕਰਨ ਲਈ ਦਾਨਾਂ ’ਤੇ ਨਿਰਭਰ ਕਰਦੀ ਹੈ।
ਵਿਅਕਤੀਗਤ ਦਾਨਾਂ ਦੀ ਬੇਹੱਦ ਸ਼ਲਾਘਾ ਕੀਤੀ ਜਾਂਦੀ ਹੈ, ਅਤੇ ਇਹਨਾਂ ਨੂੰ ਔਨਲਾਈਨ bladdercancercanada.org ’ਤੇ ਜਾਂ 1-866-674-8889 ’ਤੇ ਕਾਲ ਕਰਕੇ ਕੀਤਾ ਜਾ ਸਕਦਾ ਹੈ। ਤੁਹਾਡੇ ਵੱਲੋਂ ਦਿੱਤੀ ਸਹਾਇਤਾ ਬਲੈਡਰ ਕੈਂਸਰ ਕੈਨੇਡਾ ਨੂੰ ਸਾਡੇ ਪ੍ਰੋਗਰਾਮਾਂ ਅਤੇ ਸੇਵਾਵਾਂ ਨੂੰ ਜਾਰੀ ਰੱਖਣ ਅਤੇ ਇਹਨਾਂ ਦਾ ਵਿਸਤਾਰ ਕਰਨ ਵਿੱਚ ਮਦਦ ਕਰੇਗੀ ਤਾਂ ਜੋ ਹੋਰ ਵਧੇਰੇ ਮਰੀਜ਼ਾਂ ਅਤੇ ਦੇਖਭਾਲ ਕਰਤਾਵਾਂ ਦੀ ਮਦਦ ਕੀਤੀ ਜਾ ਸਕੇ।
ਹਰ ਸਤੰਬਰ, ਸਮੁੱਚੇ ਦੇਸ਼ ਦੇ ਸ਼ਹਿਰਾਂ ਵਿੱਚ ਅਸੀਂ ਆਪਣੇ ਸਾਲਾਨਾ ਮਾਰਚ, ‘ਕੈਨੇਡਾ ਵਾਕਸ ਫਾਰ ਬਲੈਡਰ ਕੈਂਸਰ’ ਦੀ ਮੇਜ਼ਬਾਨੀ ਕਰਦੇ ਹਾਂ। ਇਹ ਇਵੈਂਟ ਸਮੁੱਚੇ ਕੈਨੇਡਾ ਵਿਚਲੇ ਭਾਈਚਾਰਿਆਂ ਵਿੱਚ ਬਲੈਡਰ ਕੈਂਸਰ ਬਾਰੇ ਚੇਤਨਾ ਜਗਾਉਣ ਲਈ, ਬਲੈਡਰ ਕੈਂਸਰ ਦੇ ਮਰੀਜ਼ਾਂ ਨੂੰ ਸਹਾਇਤਾ ਦੇਣ ਲਈ ਅਤੇ ਕਾਢਕਾਰੀ ਖੋਜ ਵਾਸਤੇ ਫ਼ੰਡ ਜੁਟਾਉਣ ਦੇ ਸਾਡੇ ਮਿਸ਼ਨ ਵਿੱਚ ਇੱਕ ਅਹਿਮ ਭੂਮਿਕਾ ਨਿਭਾਉਂਦੀ ਹੈ। ਇਸ ਇਵੈਂਟ ਤੋਂ ਇਕੱਤਰ ਕੀਤੀ ਧਨ ਰਾਸ਼ੀ ਸਾਡੀ ਸਾਲਾਨਾ ਆਮਦਨ ਦਾ ਲਗਭਗ ਦੋ-ਤਿਹਾਈ ਹਿੱਸਾ ਬਣਦੀ ਹੈ।
ਅਜਿਹਾ ਸੰਸਾਰ ਸਿਰਜਣ ਵਿੱਚ ਮਦਦ ਕਰੋ ਜਿੱਥੇ ਬਲੈਡਰ ਕੈਂਸਰ ਇੱਕ ਯਾਦਦਾਸ਼ਤ ਬਣਕੇ ਰਹਿ ਜਾਵੇ। ਸਾਡੇ ਨਾਲ ਜੁੜੋ: BCCwalk.ca.
ਆਪਣੇ ਦੋਸਤਾਂ, ਪਰਿਵਾਰ ਅਤੇ ਸਿਹਤ-ਸੰਭਾਲ ਪ੍ਰਦਾਨਕਾਂ ਨੂੰ ਬਲੈਡਰ ਕੈਂਸਰ ਅਤੇ ਬਲੈਡਰ ਕੈਂਸਰ ਕੈਨੇਡਾ ਬਾਰੇ ਦੱਸੋ। ਤੁਸੀਂ ਇਸੇ ਯਾਤਰਾ ’ਤੇ ਚੱਲ ਰਹੇ ਹੋਰ ਲੋਕਾਂ ਨਾਲ ਗੱਲ ਕਰ ਸਕਦੇ ਹੋ ਅਤੇ ਉਹਨਾਂ ਵਾਸਤੇ ਉਤਸ਼ਾਹ ਅਤੇ ਜੀਵਨ-ਰੇਖਾ ਬਣ ਸਕਦੇ ਹੋ। ਇਹ ਪਤਾ ਲਾਉਣ ਲਈ ਕਿ ਤੁਸੀਂ ਕਿਵੇਂ ਮਦਦ ਕਰ ਸਕਦੇ ਹੋ—ਜਾਂ ਖੁਦ ਮਦਦ ਲੈਣ ਲਈ—ਬਲੈਡਰ ਕੈਂਸਰ ਕੈਨੇਡਾ ਦੀ ਵੈੱਬਸਾਈਟ www.bladdercancercanada.org’ਤੇ ਜਾਓ। ਸਾਡੀ ਵੈੱਬਸਾਈਟ ਵਿੱਚ ਸ਼ਾਨਦਾਰ, ਭਰੋਸੇਯੋਗ, ਅਤੇ ਸਰਗਰਮ ਵਿਚਾਰ-ਵਟਾਂਦਰਾ ਫੋਰਮਾਂ ਹਨ ਜਿੱਥੇ ਤੁਸੀਂ ਸਵਾਲ ਪੁੱਛ ਸਕਦੇ ਹੋ ਜਾਂ ਆਪਣੀ ਕਹਾਣੀ ਸਾਂਝੀ ਕਰ ਸਕਦੇ ਹੋ। ਤੁਸੀਂ ਵੀ ਵਲੰਟੀਅਰ ਬਣਨ ਬਾਰੇ ਜਾਣਕਾਰੀ ਲੱਭ ਸਕਦੇ ਹੋ ਜਾਂ ਆਉਣ ਵਾਲੇ ਸਮਾਗਮਾਂ ਅਤੇ ਖੋਜ ਸੰਬੰਧੀ ਖ਼ਬਰਾਂ ਬਾਰੇ ਤਾਜ਼ਾ ਜਾਣਕਾਰੀ ਪ੍ਰਾਪਤ ਕਰਦੇ ਰਹਿਣ ਲਈ ਸਾਡੇ ਈ-ਨਿਊਜ਼ਲੈਟਰ ਵਾਸਤੇ ਸਾਈਨ ਅੱਪ ਕਰ ਸਕਦੇ ਹੋ।
ਬਲੈਡਰ ਕੈਂਸਰ ਨਾਲ ਤੁਹਾਡੀ ਯਾਤਰਾ ਵਿੱਚ ਅਸੀਂ ਤੁਹਾਡੇ ਲਈ ਹਰੇਕ ਸਫਲਤਾ ਦੀ ਕਾਮਨਾ ਕਰਦੇ ਹਾਂ।
ਬਲੈਡਰ ਕੈਂਸਰ ਕੈਨੇਡਾ ਦੀ ਸਥਾਪਨਾ 2009 ਵਿੱਚ ਬਲੈਡਰ ਕੈਂਸਰ ਦੇ ਬਚ ਗਏ ਪੀੜਤਾਂ (survivors) ਵੱਲੋਂ ਕੀਤੀ ਗਈ ਸੀ। ਅਸੀਂ ਇੱਕ ਕੌਮੀ ਪੱਧਰ ਦੀ ਚੈਰਿਟੀ ਹਾਂ ਅਤੇ ਸਾਡਾ ਮਿਸ਼ਨ ਇਹ ਹੈ:
ਕਾਬਲਤਨ ਸ਼ੁਰੂਆਤੀ ਪੜਾਅ ’ਤੇ ਕੈਨੇਡੀਅਨਾਂ ਵਿਚਕਾਰ ਬਲੈਡਰ ਦੇ ਕੈਂਸਰ ਬਾਰੇ ਚੇਤਨਾ। ਇਸ ਬਿਮਾਰੀ ਦੇ ਲੱਛਣਾਂ ਬਾਰੇ ਜਨਤਾ ਵਿੱਚ ਬਹੁਤ ਘੱਟ ਜਾਗਰੁਕਤਾ ਹੈ ਅਤੇ, ਜਦੋਂ ਤੱਕ ਲੋਕਾਂ ਵਿੱਚ ਇਸ ਕੈਂਸਰ ਦੀ ਤਸ਼ਖੀਸ ਨਹੀਂ ਹੁੰਦੀ, ਜ਼ਿਆਦਾਤਰ ਲੋਕ ਇਸ ਬਾਰੇ ਚੰਗੀ ਤਰ੍ਹਾਂ ਨਹੀਂ ਜਾਣਦੇ ਹੁੰਦੇ।
ਬਲੈਡਰ ਕੈਂਸਰ ਕੈਨੇਡਾ ਇਸ ਕੈਂਸਰ ਬਾਰੇ ਜਾਗਰੁਕਤਾ ਪੈਦਾ ਕਰਦੀ ਹੈ ਕਿਉਂਕਿ ਜਲਦੀ ਤਸ਼ਖੀਸ ਕਰ ਲੈਣਾ ਆਮ ਤੌਰ ’ਤੇ ਬਿਹਤਰ ਸਿੱਟਾ ਦਿੰਦਾ ਹੈ।
ਵਧੇਰੇ ਜਾਣਕਾਰੀ ਲਈ, ਦੇਖੋ www.bladdercancercanada.org.
ਸਾਡੇ ਨਾਲ ਸੰਪਰਕ ਕਰੋ:
Bladder Cancer Canada
4936 Yonge St, Suite 1000 | Toronto, ON M2N 6S3
info@bladdercancercanada.org ਜਾਂ ਸਾਨੂੰ 1-866-674-8889 ’ਤੇ ਕਾਲ ਕਰੋ
ਏਥੇ ਸਾਡਾ ਅਨੁਸਰਣ ਕਰੋ:
Facebook: /BladderCancerCanada
Twitter: /BladderCancerCA
YouTube: /BladderCancerCA
Instagram: /bladdercancercanada/
ਅਸੀਂ ਇਸ ਗਾਈਡ-ਪੁਸਤਿਕਾ ਵਾਸਤੇ ਡਾਕਟਰੀ ਸਮੀਖਿਆ ਪੈਨਲ ਦੀ ਵਿਸ਼ੇਸ਼ ਸ਼ਲਾਘਾ ਕਰਦੇ ਹਾਂ, ਜਿਨ੍ਹਾਂ ਨੇ ਬਹੁਮੁੱਲੀ ਫੀਡਬੈਕ ਪ੍ਰਦਾਨ ਕੀਤੀ ਅਤੇ ਸਟੀਕਤਾ ਯਕੀਨੀ ਬਣਾਈ:
ਡਾ. ਪੀਟਰ ਬਲੈਕ MD, FRCSC, ਵੈਨਕੂਵਰ ਜਨਰਲ ਹਸਪਤਾਲ | ਡਾ. ਪੀਟਰ ਚੁੰਗ MBChB, FRCPC, ਪ੍ਰਿੰਸੈੱਸ ਮਾਰਗਾਰੇਟ ਕੈਂਸਰ ਸੈਂਟਰ | ਡਾ. ਲਿਬਨੀ ਈਪੈੱਨ MD, FRCPC, ਓਟਾਵਾ ਹਸਪਤਾਲ ਕੈਂਸਰ ਸੈਂਟਰ | ਡਾ. ਵਾਸੀਮ ਕਾਸਾਊਫ MD, CM, FRCSC, ਮੈਕਗਿੱਲ ਯੂਨੀਵਰਸਿਟੀ ਹੈਲਥ ਸੈਂਟਰ | ਡਾ. ਬੌਬੀ ਸ਼ਾਯੇਗਾਨ MD, FRCSC, ਸੇਂਟ ਜੋਸੈਫ’ਜ਼ ਹੈਮਿਲਟਨ ਹੈਲਥ ਸੈਂਟਰ | ਡਾ ਪਾਡਰੇਗ ਵਾਰਡੇ MBChB BAO, FRCPC, ਪ੍ਰਿੰਸੈੱਸ ਮਾਰਗਾਰੇਟ ਕੈਂਸਰ ਸੈਂਟਰ | ਡਾ. ਅਲੈਗਜ਼ੈਂਡਰ ਜ਼ਲੋਟਾ MD, FRSCS, ਮਾਊਂਟ ਸਿਨਾਈ ਹਸਪਤਾਲ
ਬਲੈਡਰ ਕੈਂਸਰ ਕੈਨੇਡਾ ਦੇ ਹੇਠ ਲਿਖੇ ਸਮੀਖਿਆਕਾਰਾਂ ਦੀ ਸਾਡੇ ਵੱਲੋਂ ਭਰਪੂਰ ਸ਼ਲਾਘਾ ਕੀਤੀ ਜਾਂਦੀ ਹੈ:
ਕੈਰੀ ਐਬਟ | ਕੇਨ ਬਾਗਸ਼ਾਅ | ਡੇਵਿਡ ਗਟਮੈਨ | ਜੈਕ ਮੂਨ | ਟੈਮੀ ਨੋਰਦੈਮ |ਰੈਂਡੀ ਸਮਿਥ
ਪ੍ਰੋਜੈਕਟ ਮੈਨੇਜਰ ਅਤੇ ਮਰੀਜ਼ ਗਾਈਡ-ਪੁਸਤਿਕਾ ਲੜੀ ਦੇ ਸੰਪਾਦਕ ਸਟੀਫਨ ਵਿਲਸਨ ਹਨ।
ਅਸੀਂ AstraZeneca Canada, Merck Canada ਅਤੇ Roche Canada ਦੇ ਅਹਿਸਾਨਮੰਦ ਹਾਂ ਜਿਨ੍ਹਾਂ ਦੀ ਦਿਆਲੂ ਵਿੱਤੀ ਸਹਾਇਤਾ ਨੇ ਇਸ ਗਾਈਡ-ਪੁਸਤਿਕਾ ਨੂੰ ਸੰਭਵ ਬਣਾਇਆ।
ਇਸ ਗਾਈਡ-ਪੁਸਤਿਕਾ ਦੇ ਅਨੁਵਾਦ ਵਾਸਤੇ Verity Pharmaceuticals, Merck Canada, Janssen, ਅਤੇ ਹੋਰ ਦਿਆਲੂ ਦਾਨੀਆਂ ਵੱਲੋਂ ਸਹਾਇਤਾ ਦਿੱਤੀ ਗਈ ਸੀ।
ਚੈਰੀਟੇਬਲ ਰਜਿਸਟ੍ਰੇਸ਼ਨ ਨੰਬਰ: 83612 6060 RR0001
ਜੂਨ 2023 ਵਿੱਚ ਸੋਧਿਆ ਗਿਆ
