ਤੁਸੀਂ ਇਕੱਲੇ ਨਹੀਂ ਹੋ
ਇਹ ਮਰੀਜ਼ ਗਾਈਡ-ਪੁਸਤਿਕਾ ਤੁਹਾਡੇ ਹੀ ਵਰਗੇ ਲੋਕਾਂ ਵੱਲੋਂ ਬਣਾਈ ਗਈ ਸੀ – ਯਾਨੀ ਬਲੈਡਰ ਦੇ ਕੈਂਸਰ ਦੇ ਮਰੀਜ਼ਾਂ ਅਤੇ ਉਹਨਾਂ ਦੇ ਦੇਖਭਾਲ-ਕਰਤਾਵਾਂ ਦੁਆਰਾ। ਇਹ ਤੁਹਾਨੂੰ ਸਹਾਇਤਾ, ਉਤਸ਼ਾਹ ਅਤੇ ਇਸ ਬਾਰੇ ਨੁਕਤਿਆਂ ਦੀ ਪੇਸ਼ਕਸ਼ ਕਰਨ ਲਈ ਡਿਜ਼ਾਈਨ ਕੀਤੀ ਗਈ ਹੈ ਕਿ ਤੁਹਾਡੇ ਬਲੈਡਰ ਦੇ ਕੈਂਸਰ ਵਾਸਤੇ ਪ੍ਰਕਿਰਿਆਵਾਂ ਅਤੇ ਇਲਾਜਾਂ ਨਾਲ ਕਿਵੇਂ ਨਜਿੱਠਣਾ ਹੈ। ਇਹ ਤੁਹਾਨੂੰ ਤੁਹਾਡੀ ਬਿਮਾਰੀ ਅਤੇ ਇਹ ਸਮਝਣ ਵਿੱਚ ਮਦਦ ਕਰ ਸਕਦਾ ਹੈ ਕਿ ਕਿਸ ਚੀਜ਼ ਦੀ ਉਮੀਦ ਕਰਨੀ ਹੈ, ਤੁਹਾਨੂੰ ਕਿਹੜੇ ਇਲਾਜਾਂ ਦੀ ਪੇਸ਼ਕਸ਼ ਕੀਤੀ ਜਾ ਸਕਦੀ ਹੈ ਅਤੇ ਆਉਣ ਵਾਲੇ ਸਾਲਾਂ ਵਿੱਚ ਤੁਹਾਡੀ ਬਿਮਾਰੀ ਦਾ ਪ੍ਰਬੰਧਨ ਕਿਵੇਂ ਕਰਨਾ ਹੈ।
ਅਸੀਂ ਡਾਕਟਰੀ ਪੇਸ਼ੇਵਰ ਨਹੀਂ ਹਾਂ ਅਤੇ ਤੁਹਾਨੂੰ ਹਮੇਸ਼ਾ ਸਲਾਹ ਵਾਸਤੇ ਪਹਿਲਾਂ ਆਪਣੀ ਡਾਕਟਰੀ ਟੀਮ ਕੋਲ ਜਾਣਾ ਚਾਹੀਦਾ ਹੈ। ਪਰ ਅਸੀਂ ਉਸ ਥਾਂ ’ਤੇ ਰਹਿ ਚੁੱਕੇ ਹਾਂ ਜਿੱਥੇ ਤੁਸੀਂ ਹੁਣ ਹੋ ਅਤੇ ਅਸੀਂ ਉਹਨਾਂ ਚੀਜ਼ਾਂ ਨੂੰ ਮਹਿਸੂਸ ਕੀਤਾ ਹੈ ਜੋ ਤੁਸੀਂ ਮਹਿਸੂਸ ਕਰ ਰਹੇ ਹੋ। ਸਟੀਕਤਾ ਨੂੰ ਯਕੀਨੀ ਬਣਾਉਣ ਲਈ, ਇਸ ਗਾਈਡ-ਪੁਸਤਿਕਾ ਦੀ ਸਮੀਖਿਆ ਡਾਕਟਰੀ ਪੇਸ਼ੇਵਰਾਂ ਦੀ ਇੱਕ ਟੀਮ ਵੱਲੋਂ ਕੀਤੀ ਗਈ ਹੈ।
ਇਹ ਗਾਈਡ-ਪੁਸਤਿਕਾ ਗੈਰ-ਮਾਸਪੇਸ਼ੀ-ਧਾਵਕ ਬਲੈਡਰ ਕੈਂਸਰ (NMIBC) ਦਾ ਇਲਾਜ ਕਰਨ ਵਾਸਤੇ ਆਮ ਪਹੁੰਚਾਂ ਬਾਰੇ ਗੱਲਬਾਤ ਕਰੇਗੀ। ਇਹ ਗੱਲ ਦਿਮਾਗ ਵਿੱਚ ਰੱਖੋ ਕਿ ਤੁਹਾਡੀ ਡਾਕਟਰੀ ਟੀਮ ਦੀਆਂ ਪ੍ਰੈਕਟਿਸਾਂ ਅਤੇ ਤੁਹਾਡੀ ਵਿਸ਼ੇਸ਼ ਪ੍ਰਸਥਿਤੀ ’ਤੇ ਨਿਰਭਰ ਕਰਨ ਅਨੁਸਾਰ ਕੁਝ ਅੰਤਰ ਹੋ ਸਕਦੇ ਹਨ। ਅਸੀਂ ਬਹੁਤ ਜ਼ਿਆਦਾ ਡਾਕਟਰੀ ਭਾਸ਼ਾ ਦੀ ਵਰਤੋਂ ਨਹੀਂ ਕਰਾਂਗੇ, ਸਿਵਾਏ ਓਥੇ ਜਿੱਥੇ ਇਹ ਤੁਹਾਡੀ ਡਾਕਟਰੀ ਟੀਮ ਨਾਲ ਬਿਹਤਰ ਸੰਚਾਰ ਕਰਨ ਅਤੇ ਤੁਹਾਡੀ ਬਿਮਾਰੀ ਨੂੰ ਸਮਝਣ ਵਿੱਚ ਮਦਦ ਕਰ ਸਕਦੀ ਹੈ। ਤੁਸੀਂ ਬਲੈਡਰ ਕੈਂਸਰ ਕੈਨੇਡਾ ਦੀ ਵੈੱਬਸਾਈਟ https://bladdercancercanada.org ’ਤੇ ਔਖੇ ਸ਼ਬਦਾਂ ਦੀ ਆਸਾਨੀ ਨਾਲ ਉਪਲਬਧ ਸ਼ਬਦਾਵਲੀ ਦੇਖੋਗੇ।
ਯਾਦ ਰੱਖੋ, ਤੁਸੀਂ ਇਕੱਲੇ ਨਹੀਂ ਹੋ। ਬਲੈਡਰ ਕੈਂਸਰ ਕੈਨੇਡਾ ਵਿਖੇ ਅਸੀਂ ਸਾਰੇ ਤੁਹਾਨੂੰ ਇੱਕ ਭਰਪੂਰ ਅਤੇ ਸੰਤੋਸ਼ਜਨਕ ਜ਼ਿੰਦਗੀ ਜਿਉਣ ਵਿੱਚ ਮਦਦ ਕਰਨ ਨੂੰ ਲੈਕੇ ਜੋਸ਼ ਨਾਲ ਭਰਪੂਰ ਹਾਂ– ਏਥੋਂ ਤੱਕ ਕਿ ਬਲੈਡਰ ਦੇ ਕੈਂਸਰ ਦੀ ਤਸ਼ਖੀਸ ਹੋਣ ਤੋਂ ਬਾਅਦ ਵੀ। ਅਸੀਂ ਇਹ ਕਰ ਰਹੇ ਹਾਂ ਅਤੇ ਤੁਸੀਂ ਵੀ ਇਹ ਕਰ ਸਕਦੇ ਹਾਂ।
ਇਸ ਗਾਈਡ-ਪੁਸਤਿਕਾ ਦਾ ਜਨਮ
ਜੋ ਕੁਝ ਤੁਸੀਂ ਪੜ੍ਹਨ ਵਾਲੇ ਹੋ ਉਹ ਗਰੇਗ ਨੀਲੀ, ਸਾਬਕਾ ਉਪ-ਪ੍ਰਧਾਨ ਬਲੈਡਰ ਕੈਂਸਰ ਕੈਨੇਡਾ, ਜੋ ਖੁਦ ਵੀ ਬਲੈਡਰ ਦੇ ਕੈਂਸਰ ਦੇ ਮਰੀਜ਼ ਸਨ, ਦੀ ਸਿਰਜਣਾਤਮਕ ਦ੍ਰਿਸ਼ਟੀ ਦਾ ਸਿੱਟਾ ਸੀ। ਗਰੇਗ ਨੇ ਕੈਨੇਡੀਅਨ ਬਲੈਡਰ ਕੈਂਸਰ ਮਰੀਜ਼ਾਂ ਅਤੇ ਉਹਨਾਂ ਦੇ ਦੇਖਭਾਲ ਕਰਤਾਵਾਂ ਤੋਂ ਨਜ਼ਰੀਏ ਤੋਂ ਲਿਖੀ ਗਈ ਜਾਣਕਾਰੀ ਦੇ ਇੱਕ ਸਰੋਤ ਦੀ ਲੋੜ ਨੂੰ ਭਾਂਪਿਆ। ਉਹ ਚਾਹੁੰਦਾ ਸੀ ਕਿ ਇਹ ਸਪੱਸ਼ਟ, ਸਰਲ, ਅਤੇ ਸਮਝਣ ਵਿੱਚ ਆਸਾਨ ਹੋਵੇ – ਇਹੋ ਗਰੇਗ ਦੀ ਸ਼ੈਲੀ ਸੀ।
ਸਾਡੇ ਵਿੱਚੋਂ ਕਈਆਂ ਨੂੰ ਸਾਡੀ ਤਸ਼ਖੀਸ ਤੋਂ ਪਹਿਲਾਂ ਕਦੇ ਇਹ ਪਤਾ ਨਹੀਂ ਸੀ ਕਿ ਬਲੈਡਰ ਕੈਂਸਰ ਮੌਜੂਦ ਸੀ। ਪਰ, ਇਹ ਤੁਹਾਡੇ ਸੋਚਣ ਨਾਲੋਂ ਵਧੇਰੇ ਆਮ ਹੈ, ਕਿਉਂਕਿ ਇਹ ਕੈਨੇਡਾ ਵਿੱਚ 5ਵਾਂ ਸਭ ਤੋਂ ਵੱਧ ਆਮ ਕੈਂਸਰ ਹੈ।
ਲਗਭਗ 75% ਬਲੈਡਰ ਕੈਂਸਰ ਉਸ ਕਿਸਮ ਦੇ ਹੁੰਦੇ ਹਨ ਜੋ ਤੁਹਾਨੂੰ ਹੈ – ਯਾਨੀ ਗੈਰ-ਮਾਸਪੇਸ਼ੀ-ਧਾਵਕ। ਅਸੀਂ ਉਮੀਦ ਕਰਦੇ ਹਾਂ ਕਿ ਇਹ ਕਦੇ ਨਾ ਵਾਪਰੇ, ਪਰ ਤੁਹਾਨੂੰ ਇਹ ਵੀ ਪਤਾ ਹੋਣਾ ਚਾਹੀਦਾ ਹੈ ਕਿ ਲਗਭਗ 20% ਬਲੈਡਰ ਕੈਂਸਰ ਜੋ ਮੂਲ ਰੂਪ ਵਿੱਚ ਗੈਰ-ਮਾਸਪੇਸ਼ੀ-ਧਾਵਕ ਵਜੋਂ ਤਸ਼ਖੀਸ ਕੀਤਾ ਗਿਆ ਸੀ, ਉਹ ਪ੍ਰਗਤੀ ਕਰਕੇ ਮਾਸਪੇਸ਼ੀ ਧਾਵਕ ਬਣ ਜਾਂਦਾ ਹੈ। ਮਾਸਪੇਸ਼ੀ-ਧਾਵਕ ਬਲੈਡਰ ਕੈਂਸਰ (MIBC) ਵਾਸਤੇ ਬਲੈਡਰ ਕੈਂਸਰ ਕੈਨੇਡਾ ਦੀ ਇੱਕ ਮਰੀਜ਼ ਗਾਈਡ-ਪੁਸਤਿਕਾ ਵੀ ਉਪਲਬਧ ਹੈ।
ਜਿਵੇਂ ਕਿ ਕੈਂਸਰ ਦੀਆਂ ਕਈ ਕਿਸਮਾਂ ਵਿੱਚ ਹੁੰਦਾ ਹੈ, ਬਿਮਾਰੀ ਦੇ ਮੋਹਰੀ ਜੋਖ਼ਮ ਕਾਰਕਾਂ ਵਿੱਚੋਂ ਇੱਕ ਹੈ ਤੰਬਾਕੂਨੋਸ਼ੀ। ਜਿਹੜੇ ਲੋਕ ਤੰਬਾਕੂਨੋਸ਼ੀ ਕਰਦੇ ਹਨ ਉਹਨਾਂ ਨੂੰ ਬਲੈਡਰ ਦਾ ਕੈਂਸਰ ਹੋਣ ਦੀ ਸੰਭਾਵਨਾ ਚਾਰ ਗੁਣਾਂ ਤੱਕ ਜ਼ਿਆਦਾ ਹੋ ਸਕਦੀ ਹੈ। ਕੁਝ ਵਿਸ਼ੇਸ਼ ਰਾਸਾਇਣਾਂ ਨਾਲ ਕੰਮ ਕਰਨ ਵਾਲੇ ਲੋਕਾਂ ਨੂੰ ਵੀ ਜੋਖ਼ਮ ਹੋ ਸਕਦਾ ਹੈ – ਹੋਰਨਾਂ ਕਿੱਤਿਆਂ ਤੋਂ ਇਲਾਵਾ ਚਮੜੇ ਨਾਲ ਕੰਮ ਕਰਨ ਵਾਲੇ ਵਰਕਰ, ਹੇਅਰਡ੍ਰੈਸਰ, ਮਕੈਨਿਕ ਅਤੇ ਪੇਂਟਰ। ਰੇਡੀਏਸ਼ਨ ਨਾਲ ਸੰਪਰਕ ਨੂੰ ਵੀ ਬਲੈਡਰ ਦੇ ਕੈਂਸਰ ਨਾਲ ਜੋੜਿਆ ਜਾ ਚੁੱਕਾ ਹੈ। ਕਾਕੇਸ਼ੀਅਨ ਪੁਰਸ਼ਾਂ ਨੂੰ ਵੀ ਮੁਕਾਬਲਤਨ ਵਧੇਰੇ ਜੋਖ਼ਮ ਹੋ ਸਕਦਾ ਹੈ।
ਪਰ ਸਰਲ ਸਚਾਈ ਇਹ ਹੈ ਕਿ ਕਈ ਲੋਕਾਂ ਵਿੱਚ ਬਿਨਾਂ ਕਿਸੀ ਗਿਆਤ ਕਾਰਨ ਦੇ ਵੀ ਬਲੈਡਰ ਕੈਂਸਰ ਵਿਕਸਿਤ ਹੋ ਜਾਵੇਗਾ। ਤੁਸੀਂ ਉਹਨਾਂ ਲੋਕਾਂ ਵਿੱਚੋਂ ਇੱਕ ਹੋ ਸਕਦੇ ਹੋ। ਇਸ ਬਿੰਦੂ ’ਤੇ ਆਕੇ, “ਕਿਉਂ” ਪੁੱਛਣਾ ਓਨਾ ਮਦਦਗਾਰੀ ਨਹੀਂ ਹੁੰਦਾ ਜਿਨ੍ਹਾਂ ਇਸ ਚੀਜ਼ ’ਤੇ ਧਿਆਨ-ਕੇਂਦਰਿਤ ਕਰਨਾ ਕਿ “ਹੁਣ ਕੀ”।
ਜਿੰਨਾ ਜਲਦੀ ਬਲੈਡਰ ਦੀ ਤਸ਼ਖੀਸ ਕੀਤੀ ਜਾਂਦੀ ਹੈ, ਓਨਾ ਹੀ ਇਲਾਜ ਦਾ ਸਿੱਟਾ ਬਿਹਤਰ ਹੁੰਦਾ ਹੈ। ਕਿਉਂਕਿ ਇਸ ਸਮੇਂ ਬਲੈਡਰ ਦੇ ਕੈਂਸਰ ਵਾਸਤੇ ਕੋਈ “ਪੂਰਵ-ਪੜਤਾਲ” ਟੈਸਟ ਮੌਜੂਦ ਨਹੀਂ ਹੈ, ਇਸ ਲਈ ਜ਼ਿਆਦਾਤਰ ਲੋਕਾਂ ਵਿੱਚ ਤਸ਼ਖੀਸ ਓਦੋਂ ਕੀਤੀ ਜਾਂਦੀ ਹੈ ਜਦ ਉਹ ਕੋਈ ਲੱਛਣ ਦਿਖਾਉਂਦੇ ਹਨ, ਜਿਵੇਂ ਕਿ ਪਿਸ਼ਾਬ ਵਿੱਚ ਖੂਨ। ਕਿਉਂਕਿ ਪਿਸ਼ਾਬ ਵਿੱਚ ਖੂਨ ਵਰਗੇ ਲੱਛਣ ਹੋਰ ਸਮੱਸਿਆਵਾਂ ਦਾ ਚਿੰਨ੍ਹ ਵੀ ਹੋ ਸਕਦੇ ਹਨ, ਜਿਵੇਂ ਕਿ ਪਿਸ਼ਾਬ-ਮਾਰਗ ਦੀ ਲਾਗ (UTI), ਇਸ ਲਈ ਬਲੈਡਰ ਦੇ ਕੈਂਸਰ ਦੀ ਤਸ਼ਖੀਸ ਕਰਨ ਵਿੱਚ ਦੇਰੀ ਹੋ ਸਕਦੀ ਹੈ।
ਏਥੇ ਕੁਝ ਟੈਸਟਾਂ ਅਤੇ ਪ੍ਰਕਿਰਿਆਵਾਂ ਬਾਰੇ ਦੱਸਿਆ ਜਾ ਰਿਹਾ ਹੈ ਜੋ ਬਲੈਡਰ ਦੇ ਕੈਂਸਰ ਦਾ ਪਤਾ ਲਾਉਣ ਲਈ ਵਰਤੇ ਜਾਂਦੇ ਹਨ। ਕਿਰਪਾ ਕਰਕੇ ਨੋਟ ਕਰੋ ਕਿ ਕਿਉਂਕਿ ਵਿਅਕਤੀਗਤ ਕੇਸ ਅਤੇ ਸੁਵਿਧਾਵਾਂ ਵੱਖ-ਵੱਖ ਹੁੰਦੇ ਹਨ, ਇਸ ਲਈ ਹੋ ਸਕਦਾ ਹੈ ਇਹਨਾਂ ਟੈਸਟਾਂ ਵਿੱਚੋਂ ਸਾਰੇ ਲੋੜੀਂਦੇ ਜਾਂ ਉਪਲਬਧ ਨਾ ਹੋਣ।
ਪਿਸ਼ਾਬ ਦੇ ਇੱਕ ਨਮੂਨੇ ਦਾ ਮੁਆਇਨਾ ਕਿਸੇ ਸੂਖਮਦਰਸ਼ੀ ਹੇਠ ਇਹ ਦੇਖਣ ਲਈ ਕੀਤਾ ਜਾਂਦਾ ਹੈ ਕਿ ਕੀ ਪਿਸ਼ਾਬ ਵਿੱਚ ਕੋਈ ਰਸੌਲੀ ਵਾਲੇ ਸੈੱਲ ਹਨ।
ਲੈਂਜ਼ ਵਾਲੀ ਇੱਕ ਖੋਖਲੀ ਟਿਊਬ ਨੂੰ ਪਿਸ਼ਾਬ-ਮਾਰਗ (ਉਹ ਨਾਲੀ ਜੋ ਬਲੈਡਰ ਵਿੱਚੋਂ ਪਿਸ਼ਾਬ ਬਾਹਰ ਕੱਢਦੀ ਹੈ) ਵਿੱਚ ਪਾਇਆ ਜਾਂਦਾ ਹੈ ਅਤੇ ਹੌਲੀ-ਹੌਲੀ ਬਲੈਡਰ ਵਿੱਚ ਲਿਜਾਇਆ ਜਾਂਦਾ ਹੈ, ਤਾਂ ਜੋ ਡਾਕਟਰ ਰਸੌਲੀਆਂ ਵਾਸਤੇ ਬਲੈਡਰ ਦੀ ਕਿਨਾਰੀ ਦਾ ਮੁਆਇਨਾ ਕਰ ਸਕਣ। ਇਹੀ ਉਹ ਮੁੱਖ ਤਰੀਕਾ ਹੈ ਜਿਸ ਨਾਲ ਬਲੈਡਰ ਕੈਂਸਰ ਕੈਨੇਡਾ ਦਾ ਪਤਾ ਲਾਇਆ ਜਾਂਦਾ ਹੈ। ਇਹ ਪ੍ਰਕਿਰਿਆ ਕਿਸੇ ਡਾਕਟਰ ਦੇ ਦਫਤਰ ਵਿੱਚ ਜਾਂ ਹਸਪਤਾਲ ਸੈਟਿੰਗ ਵਿੱਚ ਕੀਤੀ ਜਾ ਸਕਦੀ ਹੈ। ਜ਼ਿਆਦਾ ਅਕਸਰ ਪਿਸ਼ਾਬ-ਮਾਰਗ ਨੂੰ ਸੁੰਨ ਕਰਨ ਲਈ ਸਥਾਨਕ ਬੇਹੋਸ਼ੀ ਦੀ ਵਰਤੋਂ ਕੀਤੀ ਜਾਂਦੀ ਹੈ, ਪਰ ਕਈ ਵਾਰ ਪ੍ਰਕਿਰਿਆ ਨੂੰ ਨੀਮ-ਬੇਹੋਸ਼ੀ ਦੇ ਨਾਲ ਬਾਹਰੀ-ਮਰੀਜ਼ ਵਜੋਂ ਕੀਤਾ ਜਾਂਦਾ ਹੈ।
ਪਿਸ਼ਾਬ-ਮਾਰਗ ਦੇ ਰਾਹੀਂ ਇੱਕ ਸਰਜਰੀ ਵਾਲੀ ਪ੍ਰਕਿਰਿਆ ਜੋ ਕਿਸੇ ਹਸਪਤਾਲ ਸੈਟਿੰਗ ਵਿੱਚ ਪੂਰਨ ਬੇਹੋਸ਼ੀ ਜਾਂ ਸਥਾਨਕ ਬੇਹੋਸ਼ੀ (ਤੁਹਾਡਾ ਐਨਾਸਥੀਸੀਓਲੋਜਿਸਟ ਨਸਾਂ ਦੇ ਇੱਕ ਸਮੂਹ ਦੇ ਨੇੜੇ ਦਵਾਈ ਦਾ ਟੀਕਾ ਲਾਉਂਦਾ ਹੈ ਤਾਂ ਜੋ ਤੁਹਾਡੇ ਸਰੀਰ ਦੇ ਸਿਰਫ਼ ਉਸ ਖੇਤਰ ਨੂੰ ਸੁੰਨ ਕੀਤਾ ਜਾ ਸਕੇ ਜਿਸ ਨੂੰ ਸਰਜਰੀ ਦੀ ਲੋੜ ਹੈ) ਤਹਿਤ ਕੀਤੀ ਜਾਂਦੀ ਹੈ, ਤਾਂ ਜੋ ਸਿਸਟੋਸਕੋਪੀ ਰਾਹੀਂ ਲੱਭੇ ਗਏ ਕਿਸੇ ਗੈਰ-ਸਾਧਾਰਨ ਟਿਸ਼ੂ ਨੂੰ ਬਾਇਓਪਸੀ ਲਈ ਬਾਹਰ ਕੱਢਿਆ ਜਾ ਸਕੇ। TURBT ਦੌਰਾਨ, ਡਾਕਟਰ ਰਸੌਲੀਆਂ ਅਤੇ ਰਸੌਲੀਆਂ ਦੇ ਨੇੜੇ ਬਲੈਡਰ ਦੀ ਮਾਸਪੇਸ਼ੀ ਦੇ ਨਮੂਨੇ ਬਾਹਰ ਕੱਢੇਗਾ। ਬਾਹਰ ਕੱਢੇ ਪਦਾਰਥ ਨੂੰ ਸੂਖਮਦਰਸ਼ੀ ਹੇਠ ਵਿਸ਼ਲੇਸ਼ਣ ਵਾਸਤੇ ਪ੍ਰਯੋਗਸ਼ਾਲਾ ਨੂੰ ਭੇਜਿਆ ਜਾਂਦਾ ਹੈ। ਵਿਸ਼ਲੇਸ਼ਣ ਦੇ ਨਤੀਜੇ ਨੂੰ ਬਲੈਡਰ ਦੇ ਕੈਂਸਰ ਦੇ ਪੜਾਅ ਅਤੇ ਦਰਜੇ ਦਾ ਪਤਾ ਲਾਉਣ ਲਈ ਵਰਤਿਆ ਜਾਂਦਾ ਹੈ। (“ਤੁਹਾਡੇ ਬਲੈਡਰ ਦੇ ਕੈਂਸਰ ਦਾ ਪੜਾਅ ਅਤੇ ਦਰਜਾ ਪਤਾ ਕਰਨਾ” ਬਾਰੇ ਅੱਗੇ ਦਿੱਤੇ ਸੈਕਸ਼ਨ ਨੂੰ ਦੇਖੋ)
ਇੱਕ ਵਾਰ ਜਦ ਬਲੈਡਰ ਤੁਹਾਡੀ ਤਸ਼ਖੀਸੀ TURBT ਤੋਂ ਠੀਕ ਹੋ ਜਾਂਦਾ ਹੈ, ਤਾਂ ਇੱਕ ਦੂਜੀ TURBT ਨੂੰ ਲਗਭਗ ਛੇ ਹਫਤਿਆਂ ਅੰਦਰ ਕੀਤਾ ਜਾ ਸਕਦਾ ਹੈ ਜੇ ਤੁਹਾਡੀ ਰਸੌਲੀ ਬਹੁਤ ਪ੍ਰਵੇਗਸ਼ੀਲ ਸੀ। ਇਹ ਇਸ ਗੱਲ ਨੂੰ ਯਕੀਨੀ ਬਣਾਉਣ ਵਾਸਤੇ ਕਿ MIBC ਦੀ ਤਸ਼ਖੀਸ ਖੁੰਝਾ ਨਾ ਦਿੱਤੀ ਜਾਵੇ। ਕੈਂਸਰ ਦੇ ਮੁੜ ਵਾਪਰਨ ਅਤੇ/ਜਾਂ ਪ੍ਰਗਤੀ ਕਰਕੇ MIBC ਬਣ ਜਾਣ ਤੋਂ ਰੋਕਣ ਵਿੱਚ ਮਦਦ ਕਰਨ ਲਈ ਤੁਹਾਡਾ ਡਾਕਟਰ ਹੇਠ ਲਿਖੇ ਇਲਾਜਾਂ ਵਿੱਚੋਂ ਕੁਝ ਕੁ ਦੀ ਤਜਵੀਜ਼ ਕਰ ਸਕਦਾ ਹੈ।
ਇੱਕ ਹੋਰ ਪ੍ਰਕਿਰਿਆ ਜੋ TURBT ਦੌਰਾਨ ਅਕਸਰ ਕੀਤੀ ਜਾਂਦੀ ਹੈ ਉਸ ਨੂੰ EUA (ਬੇਹੋਸ਼ੀ ਤਹਿਤ ਮੁਆਇਨਾ) ਕਿਹਾ ਜਾਂਦਾ ਹੈ। ਇਸ ਪ੍ਰਕਿਰਿਆ ਵਿੱਚ, ਯੂਰੋਲੋਜਿਸਟ ਬਲੈਡਰ ਦਾ ਮੁਲਾਂਕਣ ਕਰਦਾ ਹੈ ਤਾਂ ਜੋ ਇਹ ਦੇਖਿਆ ਜਾ ਸਕੇ ਕਿ ਕੀ ਕਿਸੇ ਪੁੰਜਾਂ (masses) ਨੂੰ ਮਹਿਸੂਸ ਕੀਤਾ ਜਾ ਸਕਦਾ ਹੈ।
ਕੁਝ ਸੁਵਿਧਾਵਾਂ ਵਿੱਚ, TURBT ਪ੍ਰਕਿਰਿਆ ਦੌਰਾਨ ਨੀਲੇ ਰੰਗ ਦੀ ਰੋਸ਼ਨੀ ਵਾਲੀ ਸਿਸਟੋਸਕੋਪੀ ਨਾਲ ਸਿਸਵਿਊ (Cysview) (ਹੈਕਸਾਮੀਨੋਲੈਵੂਲੀਨੇਟ HCl) ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਹੈਕਸਾਮੀਨੋਲੈਵੂਲੀਨੇਟ HCl ਵਾਲੇ ਇੱਕ ਘੋਲ਼ (ਜਿਸ ਨੂੰ “ਏਜੰਟ” ਕਿਹਾ ਜਾਂਦਾ ਹੈ) ਨੂੰ TURBT ਤੋਂ ਲਗਭਗ ਇੱਕ ਘੰਟਾ ਪਹਿਲਾਂ ਬਲੈਡਰ ਵਿੱਚ ਦਾਖਲ ਕੀਤਾ ਜਾਂਦਾ ਹੈ। ਇਹ ਏਜੰਟ ਜ਼ਰੂਰੀ ਤੌਰ ’ਤੇ ਰਸੌਲੀ ਦੀ “ਨਿਸ਼ਾਨਦੇਹੀ” ਕਰਦਾ ਹੈ, ਜਿਸ ਨੂੰ ਨੀਲੀ ਰੋਸ਼ਨੀ ਦੀ ਵਰਤੋਂ ਕਰਕੇ ਵਧੇਰੇ ਸਾਫ਼ ਦੇਖਿਆ ਜਾ ਸਕਦਾ ਹੈ। ਇਸ ਪ੍ਰਕਿਰਿਆ ਨੂੰ NMIBC ਬਲੈਡਰ, ਅਤੇ ਖਾਸ ਤੌਰ ’ਤੇ ਕਾਰਸੀਨੋਮਾ ਇਨ ਸੀਟੂ (CIS), ਦਾ ਬਿਹਤਰ ਤਰੀਕੇ ਨਾਲ ਪਤਾ ਲਾਉਣ ਅਤੇ ਦੇਖਣ ਲਈ ਡਿਜ਼ਾਈਨ ਕੀਤਾ ਗਿਆ ਹੈ, ਤਾਂ ਜੋ ਸਾਰੇ ਸ਼ੱਕੀ ਖਰਾਬ-ਖੇਤਰਾਂ (lesions) ਦੀ ਰੀਸੈਕਸ਼ਨਾਂ (ਸਰਜਰੀ ਰਾਹੀਂ ਬਾਹਰ ਕੱਢਣਾ) ਨੂੰ ਯਕੀਨੀ ਬਣਾਉਣ ਵਿੱਚ ਮਦਦ ਕੀਤੀ ਜਾ ਸਕੇ। ਇਹ ਉਹਨਾਂ ਖਰਾਬ-ਖੇਤਰਾਂ ਨੂੰ ਉਘਾੜਦਾ ਹੈ ਜੋ ਮਿਆਰੀ ਸਫੈਦ ਰੋਸ਼ਨੀ ਵਾਲੀ ਸਿਸਟੋਸਕੋਪੀ ਨਾਲ ਨਹੀਂ ਦੇਖੇ ਜਾ ਸਕਦੇ। ਨੋਟ ਕਰੋ ਕਿ ਸਿਸਵਿਊ (Cysview) ਸਾਰੀਆਂ ਡਾਕਟਰੀ ਸੁਵਿਧਾਵਾਂ ਵਿੱਚ ਉਪਲਬਧ ਨਹੀਂ ਹੈ।
ਸਕੈਨ – ਇਹ ਪਤਾ ਲਾਉਣ ਵਿੱਚ ਮਦਦ ਕਰਨ ਲਈ ਕਿ ਕੀ ਕੈਂਸਰ ਫੈਲ ਗਿਆ ਹੈ ਅਤੇ ਪੜਾਅ ਦਾ ਪਤਾ ਲਾਉਣ ਵਿੱਚ ਮਦਦ ਲਈ, ਡਾਕਟਰੀ ਸੁਵਿਧਾ ਕਿਸੇ ਸਕੈਨ ਦੀ ਵਰਤੋਂ ਕਰ ਸਕਦੀ ਹੈ। ਸੁਵਿਧਾ ਅਤੇ ਬਿਮਾਰੀ ਦੀ ਸਥਿਤ ’ਤੇ ਨਿਰਭਰ ਕਰਨ ਅਨੁਸਾਰ, “ਕੰਪਿਊਟਡ ਟੋਮੋਗ੍ਰਾਫੀ” (CT ਜਾਂ CAT) ਸਕੈਨ, “ਮੈਗਨੈਟਿਕ ਰੈਜੋਨੈਂਸ ਇਮੇਜਿੰਗ” (MRI), ਜਾਂ ਇੱਕ “ਪੌਜ਼ੀਟਰੌਨ ਈਮਿਸ਼ਨ ਟੋਮੋਗ੍ਰਾਫੀ” (PET ਜਾਂ PET-CT) ਸਕੈਨ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ।
ਅਲਟ੍ਰਾਸਾਊਂਡ – ਇਸ ਵਿੱਚ ਅੰਦਰੂਨੀ ਅੰਗਾਂ ਦੀ ਇੱਕ ਤਸਵੀਰ ਬਣਾਉਣ ਲਈ ਧੁਨੀ ਤਰੰਗਾਂ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਇਹ ਇਸ ਚੀਜ਼ ਦਾ ਪਤਾ ਲਾਉਣ ਵਿੱਚ ਮਦਦ ਕਰ ਸਕਦਾ ਹੈ ਕਿ ਕੀ ਗੁਰਦੇ ਜਾਂ ਪਿਸ਼ਾਬ-ਨਾਲੀਆਂ ਬਲੌਕ ਤਾਂ ਨਹੀਂ।
ਤਸ਼ਖੀਸੀ ਟੈਸਟ ਕਰ ਲਏ ਜਾਣ ਬਾਅਦ, ਤੁਹਾਡਾ ਡਾਕਟਰ ਸਾਰੇ ਨਤੀਜਿਆਂ ਦੀ ਤੁਹਾਡੇ ਨਾਲ ਮਿਲਕੇ ਸਮੀਖਿਆ ਕਰੇਗਾ। ਜੇ ਤਸ਼ਖੀਸ ਕੈਂਸਰ ਦੀ ਹੋਈ ਹੈ, ਤਾਂ ਇਹ ਨਤੀਜੇ ਡਾਕਟਰ ਨੂੰ ਕੈਂਸਰ ਦਾ ਵਰਣਨ ਕਰਨ ਵਿੱਚ ਵੀ ਮਦਦ ਕਰਦੇ ਹਨ। ਇਸ ਨੂੰ ਪੜਾਅ ਪਤਾ ਕਰਨਾ ਅਤੇ ਦਰਜਾ ਦੇਣਾ (grading and staging) ਕਿਹਾ ਜਾਂਦਾ ਹੈ, ਜਿਸ ਦਾ ਵਰਣਨ ਅਗਲੇ ਸੈਕਸ਼ਨ ਵਿੱਚ ਕੀਤਾ ਗਿਆ ਹੈ।
TURBT ਦੌਰਾਨ ਬਾਹਰ ਕੱਢੇ ਪਦਾਰਥ ਦੇ ਪ੍ਰਯੋਗਸ਼ਾਲਾ ਵਿੱਚ ਕੀਤੇ ਜਾਂਦੇ ਵਿਸ਼ਲੇਸ਼ਣ ਨੂੰ ਕੈਂਸਰ ਦੀ ਕਿਸਮ ਅਤੇ ਇਸ ਦੇ ਪੜਾਅ ਦਾ ਪਤਾ ਲਾਉਣ ਵਿੱਚ ਕਰਨ ਲਈ ਵਰਤਿਆ ਜਾਂਦਾ ਹੈ। ਕੈਨੇਡੀਅਨ ਕੈਂਸਰ ਸੋਸਾਇਟੀ ਦੇ ਅਨੁਸਾਰ, ਪੜਾਅ ਤੈਅ ਕਰਨ (staging) ਦੀ ਪ੍ਰਕਿਰਿਆ ਕੈਂਸਰ ਨੂੰ ਸਰੀਰ ਵਿੱਚ ਇਸਦੇ ਵਿਸਤਾਰ ਦੇ ਆਧਾਰ ’ਤੇ ਸ਼੍ਰੇਣੀਬੱਧ ਕਰਦੀ ਹੈ।
Tis – ਕਾਰਸੀਨੋਮਾ ਇਨ ਸੀਟੂ, ਜਿਸ ਨੂੰ ਕਈ ਵਾਰ CIS ਵੀ ਕਿਹਾ ਜਾਂਦਾ ਹੈ।
Ta – ਗੈਰ-ਧਾਵਕ ਪੈਪਿਲਰੀ ਕਾਰਸੀਨੋਮਾ।
T1 – ਰਸੌਲੀ ਬਲੈਡਰ ਦੀ ਕਿਨਾਰੀ ਦੀ ਪਹਿਲੀ ਪਰਤ ਵਿੱਚ ਹੈ, ਪਰ ਆਸ-ਪਾਸ ਦੀ ਮਾਸਪੇਸ਼ੀ ਵਿੱਚ ਨਹੀਂ।
T2 – ਰਸੌਲੀ ਵਧਕੇ ਮਾਸਪੇਸ਼ੀ ਵਿੱਚ ਚਲੀ ਗਈ ਹੈ।
ਪੜਾਅ T2a ਵਿੱਚ, ਮਾਸਪੇਸ਼ੀ ਦੀ ਪਰਤ ਦੇ ਅੰਦਰੂਨੀ ਅੱਧੇ ਭਾਗ ਵਿੱਚ ਹੁੰਦੀ ਹੈ ਅਤੇ ਪੜਾਅ T2b ਵਿੱਚ ਇਹ ਬਾਹਰਲੇ ਅੱਧੇ ਭਾਗ ਵਿੱਚ ਹੁੰਦੀ ਹੈ।
T3 – ਰਸੌਲੀ ਵਧਕੇ ਬਲੈਡਰ ਦੀ ਮਾਸਪੇਸ਼ੀ ਦੇ ਆਲੇ-ਦੁਆਲੇ ਚਰਬੀਦਾਰ ਪਰਤ ਵਿੱਚ ਫੈਲ ਗਈ ਹੈ। T3a ਇੱਕ ਸੂਖਮ ਆਕਾਰ ਦੀ ਰਸੌਲੀ ਦਾ ਵਰਣਨ ਕਰਦੀ ਹੈ ਅਤੇ T3b ਇੱਕ ਵੱਡੀ ਰਸੌਲੀ ਦਾ ਜਿਸ ਨੂੰ ਦੇਖਿਆ ਜਾਂ ਮਹਿਸੂਸ ਕੀਤਾ ਜਾ ਸਕਦਾ ਹੈ।
T4 – ਰਸੌਲੀ ਬਲੈਡਰ ਤੋਂ ਬਾਹਰੀ ਅੰਗਾਂ ਤੱਕ ਫੈਲ ਗਈ ਹੈ (T4a) ਜਾਂ ਢਿੱਡ ਜਾਂ ਪੇਡੂ (pelvis) ਦੀ ਦੀਵਾਰ ਤੱਕ ਫੈਲ ਗਈ ਹੈ (T4b)।
ਗੈਰ-ਮਾਸਪੇਸ਼ੀ-ਧਾਵਕ ਦਾ ਮਤਲਬ ਇਹ ਹੈ ਕਿ ਰਸੌਲੀ ਨੇ ਬਲੈਡਰ ਦੀ ਮਾਸਪੇਸ਼ੀ (ਮਸਕਿਊਲੈਰਿਸ ਪ੍ਰੋਪਰੀਆ) ’ਤੇ ਹਮਲਾ ਨਹੀਂ ਕੀਤਾ। ਇਹ ਵਧਕੇ ਸੈੱਲਾਂ ਦੀ ਉਸ ਪਰਤ ਵਿੱਚ ਚਲੀ ਗਈ ਹੈ ਜੋ ਬਲੈਡਰ ਦੀ ਕਿਨਾਰੀ ਬਣਾਉਂਦੇ ਹਨ (ਟ੍ਰਾਜਿਸ਼ਨਲ ਐਪੀਥੈਲੀਅਮ) ਅਤੇ ਸ਼ਾਇਦ ਇਸਦੇ ਹੇਠਲੇ ਯੋਜਕ ਟਿਸ਼ੂ (ਲੇਮੀਨਾ ਪ੍ਰੋਪਰੀਆ) ਵਿੱਚ ਵੀ। NMIBC ਦੇ ਪੜਾਵਾਂ ਨੂੰ ਰੋਗ-ਵਿਗਿਆਨਕ ਰਿਪੋਰਟ ਉੱਤੇ ਰਵਾਇਤੀ ਤੌਰ ’ਤੇ Tis, Ta ਅਤੇ T1 ਕਿਹਾ ਜਾਂਦਾ ਹੈ।
ਇਹ ਦਿਖਾਉਣ ਤੋਂ ਇਲਾਵਾ ਕਿ ਤੁਹਾਡਾ ਕੈਂਸਰ ਕਿਸ ਪੜਾਅ ’ਤੇ ਹੈ, ਕੀ ਤੁਹਾਡੀ TURBT ਤੋਂ ਬਾਅਦ ਰੋਗ-ਵਿਗਿਆਨਕ ਰਿਪੋਰਟ (pathology report) ਆਮ ਤੌਰ ’ਤੇ ਇਹ ਵੀ ਦਿਖਾਵੇਗੀ ਕਿ ਕੀ ਤੁਹਾਡੀ ਰਸੌਲੀ “ਉੱਚ ਦਰਜੇ” ਦੀ ਹੈ ਜਾਂ “ਨਿਮਨ ਦਰਜੇ” ਦੀ। ਉੱਚ ਦਰਜੇ ਦੀਆਂ ਰਸੌਲੀਆਂ ਦੇ ਮੁਕਾਬਲੇ ਨਿਮਨ ਦਰਜੇ ਦੀਆਂ ਰਸੌਲੀਆਂ ਦੇ ਫੈਲਣ ਅਤੇ ਮਾਸਪੇਸ਼ੀ ’ਤੇ ਧਾਵਾ ਬੋਲਣ ਦੀ ਸੰਭਾਵਨਾ ਘੱਟ ਹੁੰਦੀ ਹੈ।
ਆਮ ਤੌਰ ’ਤੇ, NMIBC ਦਾ ਇਲਾਜ “ਇੰਟਰਾਵੈਸੀਕਲ ਥੈਰੇਪੀ” ਨਾਲ ਕੀਤਾ ਜਾਂਦਾ ਹੈ। ਇਸਦਾ ਮਤਲਬ ਇਹ ਹੈ ਕਿ ਬਲੈਡਰ ਦੇ ਕੈਂਸਰ ਦਾ ਇਲਾਜ ਕਰਨ ਲਈ ਇੱਕ ਦਵਾਈ ਤੁਹਾਡੇ ਬਲੈਡਰ ਵਿੱਚ ਪਾਈ ਜਾਵੇਗੀ। ਕਈ ਵਾਰ, ਦਵਾਈ ਨੂੰ TURBT ਤੋਂ ਬਾਅਦ ਤੁਰੰਤ ਸਿਰਫ਼ ਇੱਕ ਵਾਰ ਬਲੈਡਰ ਵਿੱਚ ਪਾਇਆ ਜਾਂਦਾ ਹੈ। ਤੁਹਾਡਾ ਡਾਕਟਰ ਇਹ ਵੀ ਸਿਫਾਰਸ਼ ਕਰ ਸਕਦਾ ਹੈ ਕਿ ਦਵਾਈ ਨੂੰ ਤੁਹਾਡੇ ਬਲੈਡਰ ਵਿੱਚ ਸਾਲ ਵਿੱਚ ਕਈ ਵਾਰ 1 ਤੋਂ 3 ਸਾਲਾਂ ਤੱਕ ਪਾਇਆ ਜਾਵੇ। ਅੰਤਰ-ਬਲੈਡਰ ਚਿਕਿਤਸਾਵਾਂ (intravesical therapies) ਦੀਆਂ ਕਈ ਕਿਸਮਾਂ ਹਨ, ਜਿਨ੍ਹਾਂ ਨੂੰ ਕੀਮੋਥੈਰੇਪੀ ਜਾਂ ਈਮਿਊਨੋਥੈਰੇਪੀ ਵਿੱਚ ਵੰਡਿਆ ਜਾ ਸਕਦਾ ਹੈ ਜਿਸ ਨੂੰ ਬੈਕੀਲਸ ਕਾਲਮੈਟੀ–ਗੁਏਰੀਨ (BCG) ਕਿਹਾ ਜਾਂਦਾ ਹੈ। ਇਹਨਾਂ ਬਾਰੇ ਵਧੇਰੇ ਵਿਸਤਾਰ ਵਿੱਚ ਹੇਠਾਂ ਵਿਚਾਰ-ਵਟਾਂਦਰਾ ਕੀਤਾ ਜਾਵੇਗਾ।
ਇਸ ਕਿਸਮ ਦੀ ਅੰਤਰ-ਬਲੈਡਰ ਚਿਕਿਤਸਾ ਅਤੇ ਤੁਹਾਨੂੰ ਮਿਲਣ ਵਾਲੇ ਸੈਸ਼ਨਾਂ ਦੀ ਗਿਣਤੀ ਤੁਹਾਡੀ ਰੋਗ-ਵਿਗਿਆਨਕ ਰਿਪੋਰਟ ਦੇ ਨਤੀਜਿਆਂ ਉੱਤੇ ਨਿਰਭਰ ਕਰੇਗੀ। ਉਦਾਹਰਨ ਲਈ, ਜੇ ਤੁਹਾਡੇ ਵਿੱਚ ਨਿਮਨ ਦਰਜੇ ਦੇ NMIBC ਦੀ ਤਸ਼ਖੀਸ ਕੀਤੀ ਜਾਂਦੀ ਹੈ ਤਾਂ ਤੁਸੀਂ ਅੰਤਰ-ਬਲੈਡਰ ਕੀਮੋਥੈਰੇਪੀ ਪ੍ਰਾਪਤ ਕਰ ਸਕਦੇ ਹੋ। ਜੇ ਤੁਹਾਡੇ ਵਿੱਚ ਉੱਚ ਦਰਜੇ ਦੇ NMIBC ਦੀ ਤਸ਼ਖੀਸ ਕੀਤੀ ਜਾਂਦੀ ਹੈ ਜੋ ਬਲੈਡਰ ਦੀ ਪਹਿਲੀ ਪਰਤ (T1HG) ’ਤੇ ਧਾਵਾ ਬੋਲ ਰਿਹਾ ਹੈ ਤਾਂ ਸੰਭਾਵਨਾ ਹੈ ਕਿ ਤੁਸੀਂ BCG ਪ੍ਰਾਪਤ ਕਰੋਂਗੇ। ਤੁਹਾਡਾ ਡਾਕਟਰ ਤੁਹਾਡੇ ਲਈ ਉਸ ਚਿਕਿਤਸਾ ਦੀ ਤਜਵੀਜ਼ ਕਰੇਗਾ ਜੋ ਤੁਹਾਡੇ ਲਈ ਸਹੀ ਹੈ।
BCG (ਬੈਕੀਲਸ ਕਾਲਮੈਟੀ–ਗੁਏਰੀਨ) ਕਹੀ ਜਾਂਦੀ ਇੱਕ ਦਵਾਈ ਨੂੰ ਤੁਹਾਡੇ ਬਲੈਡਰ ਵਿੱਚ ਪਾਇਆ ਜਾ ਸਕਦਾ ਹੈ। ਇਹ ਟਿਊਬਰਕੁਲੋਸਿਸ ਮਾਈਕੋਬੈਕਟੀਰੀਅਮ ਦੀ ਕਮਜ਼ੋਰ ਕੀਤੀ ਕਿਸਮ ਹੈ ਜੋ ਕੈਂਸਰ ਸੈੱਲਾਂ ਨੂੰ ਨਸ਼ਟ ਕਰਨ ਲਈ ਬਲੈਡਰ ਦੇ ਅੰਦਰ ਪ੍ਰਤੀਰੋਧਤਾ ਪ੍ਰਤੀਕਿਰਿਆਵਾਂ ਨੂੰ ਉਤੇਜਿਤ ਕਰਦੀ ਹੈ। ਇਸ ਨੂੰ ਹਫਤੇ ਵਿੱਚ ਇੱਕ ਵਾਰ ਲਗਭਗ ਛੇ ਹਫਤਿਆਂ ਲਈ ਇੱਕ ਕੈਥੀਟਰ ਰਾਹੀਂ ਦਾਖਲ ਕੀਤਾ ਜਾਂਦਾ ਹੈ।
ਇਸ ਨੂੰ ਇਲਾਜ ਦਾ “ਪ੍ਰਵੇਸ਼ ਦੌਰ” (induction phase) ਕਿਹਾ ਜਾਂਦਾ ਹੈ। ਜੇ ਤੁਸੀਂ ਪ੍ਰਵੇਸ਼ ਦੌਰ ਦਾ ਵਧੀਆ ਹੁੰਗਾਰਾ ਭਰਦੇ ਹੋ, ਤਾਂ ਤੁਹਾਡਾ ਡਾਕਟਰ ਇੱਕ “ਦੇਖਰੇਖ ਦੌਰ” (maintenance phase) ਦੀ ਤਜਵੀਜ਼ ਕਰ ਸਕਦਾ ਹੈ, ਜਿੱਥੇ ਦਵਾਈ ਨੂੰ ਤਿੰਨ ਸਾਲਾਂ ਤੱਕ ਲਈ ਹਰ ਤਿੰਨ ਤੋਂ 6 ਮਹੀਨੇ ਬਾਅਦ, 3 ਹਫਤਿਆਂ ਵਾਸਤੇ ਹਫਤੇ ਵਿੱਚ ਇੱਕ ਵਾਰ ਤੁਹਾਡੇ ਬਲੈਡਰ ਵਿੱਚ ਪਾਇਆ ਜਾਂਦਾ ਹੈ। ਇਸ ਨਾਲ ਕੈਂਸਰ ਦੇ ਦੁਬਾਰਾ ਹੋਣ ਜਾਂ ਪ੍ਰਗਤੀ ਕਰਨ ਦਾ ਜੋਖ਼ਮ ਘਟ ਜਾਂਦਾ ਹੈ। ਜਿਵੇਂ ਕਿ ਉੱਪਰ ਜ਼ਿਕਰ ਕੀਤਾ ਗਿਆ ਹੈ, BCG ਨੂੰ NMIBC ਵਾਲੇ ਸਾਰੇ ਮਰੀਜ਼ਾਂ ਵਾਸਤੇ ਨਹੀਂ ਵਰਤਿਆ ਜਾਂਦਾ।
ਤੁਸੀਂ BCG ਨੂੰ ਆਪਣੇ ਬਲੈਡਰ ਵਿੱਚ ਦੋ ਘੰਟੇ ਤੱਕ ਰੋਕ ਕੇ ਰੱਖੋਂਗੇ। ਡਾਕਟਰੀ ਸੁਵਿਧਾਵਾਂ ਦੇ ਵੱਖ-ਵੱਖ ਪ੍ਰੋਟੋਕੋਲ ਹੁੰਦੇ ਹਨ, ਪਰ ਤੁਹਾਨੂੰ ਲੇਟੇ ਹੋਏ ਅਤੇ ਸ਼ਾਇਦ ਹਰੇਕ ਪਾਸੇ ’ਤੇ ਅਤੇ ਅੱਗੇ ਅਤੇ ਪਿੱਛੇ ਵੱਲ ਲੇਟੇ ਮਾਰਦੇ ਹੋਏ ਸਮਾਂ ਬਤੀਤ ਕਰਨ ਨੂੰ ਕਿਹਾ ਜਾ ਸਕਦਾ ਹੈ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਰਾਸਾਇਣ ਸਮੁੱਚੇ ਬਲੈਡਰ ਦੀ ਕਿਨਾਰੀ ਨਾਲ ਸੰਪਰਕ ਕਰਦਾ ਹੈ।
ਰਸੌਲੀ ਦੇ ਮੁੜ ਵਾਪਰਨ ਦੇ ਜੋਖ਼ਮ ਨੂੰ ਘਟਾਉਣ ਲਈ BCG ਦੇ ਦੇਖਰੇਖ ਵਾਲੇ ਇਲਾਜਾਂ (maintenance treatments) ਦੀ ਤਜਵੀਜ਼ ਕੀਤੀ ਜਾ ਸਕਦੀ ਹੈ। ਇਸ ਵਿੱਚ ਅਕਸਰ ਤਿੰਨ-ਹਫਤੇ ਦੀ ਇਲਾਜ ਯੋਜਨਾ ਸ਼ਾਮਲ ਹੁੰਦੀ ਹੈ ਜੋ ਹਰ ਤਿੰਨ ਤੋਂ ਛੇ ਮਹੀਨੇ ਲਈ ਤਿੰਨ ਸਾਲ ਤੱਕ ਚਲਦੀ ਹੈ।
ਸ਼ੁਰੂਆਤੀ ਇਲਾਜ ਆਮ ਤੌਰ ’ਤੇ ਜੇ ਕੋਈ ਅਣਚਾਹੇ ਅਸਰ ਪੈਦਾ ਕਰਦੇ ਵੀ ਹਨ ਤਾਂ ਬਹੁਤ ਘੱਟ ਕਰਦੇ ਹਨ, ਪਰ ਜਿਉਂ-ਜਿਉਂ ਇਲਾਜ ਪ੍ਰਗਤੀ ਕਰਦੇ ਹਨ, ਤੁਸੀਂ ਪਿਸ਼ਾਬ ਕਰਦੇ ਸਮੇਂ ਜਲਣ, ਪਿਸ਼ਾਬ ਕਰਨ ਦੀ ਤਾਂਘ ਜਾਂ ਵਧੇਰੇ ਵਾਰ-ਵਾਰ ਪਿਸ਼ਾਬ ਕਰਨ ਦੀ ਲੋੜ ਅਨੁਭਵ ਕਰ ਸਕਦੇ ਹੋ। ਕੁਝ ਲੋਕ ਥਕਾਵਟ ਅਤੇ ਹਲਕੇ ਬੁਖਾਰ, ਪੀੜ ਅਤੇ ਜੀਅ ਮਤਲਾਉਣ ਦੀ ਰਿਪੋਰਟ ਕਰਦੇ ਹਨ। ਗੰਭੀਰ ਪ੍ਰਤੀਕਿਰਿਆਵਾਂ ਹੋ ਸਕਦੀਆਂ ਹਨ, ਜਿਵੇਂ ਕਿ ਦਰਦ, ਜਲੂਣ ਅਤੇ ਖੂਨ ਵਗਣਾ, ਪਰ ਇਹ ਆਮ ਵਰਤਾਰੇ ਨਹੀਂ ਹਨ ਅਤੇ ਇਹਨਾਂ ਅਣਚਾਹੇ ਅਸਰਾਂ ਨਾਲ ਲੜਨ ਵਿੱਚ ਮਦਦ ਲਈ BCG ਦੀਆਂ ਪਤਲੀਆਂ ਜਾਂ ਘਟਾਈਆਂ ਗਈਆਂ ਮਾਤਰਾਵਾਂ ਦਿੱਤੀਆਂ ਜਾ ਸਕਦੀਆਂ ਹਨ। ਦੁਰਲੱਭ ਮੌਕਿਆਂ ’ਤੇ, ਕਈ ਲੋਕਾਂ ਨੂੰ BCG ਚਿਕਿਤਸਾ ਤੋਂ ਗੰਭੀਰ ਅਣਚਾਹੇ ਅਸਰ ਹੋ ਜਾਂਦੇ ਹਨ ਅਤੇ ਸਿੱਟੇ ਵਜੋਂ ਚਿਕਿਤਸਾ ਨੂੰ ਬੰਦ ਕਰਨਾ ਪੈ ਸਕਦਾ ਹੈ।
ਬਹੁਤ ਸਾਰੀਆਂ ਕੀਮੋਥੈਰੇਪੀਆਂ ਹਨ ਜਿਨ੍ਹਾਂ ਦੀ ਵਰਤੋਂ NMIBC ਦਾ ਇਲਾਜ ਕਰਨ ਲਈ ਕੀਤੀ ਜਾ ਸਕਦੀ ਹੈ। ਇਹ ਕੀਮੋਥੈਰੇਪੀਆਂ ਬਲੈਡਰ ਦੇ ਅੰਦਰ ਦਿੱਤੀਆਂ ਜਾਂਦੀਆਂ ਹਨ, ਬਿਲਕੁੱਲ BCG ਵਾਂਗ। NMIBC ਦਾ ਇਲਾਜ ਕਰਨ ਲਈ ਵਰਤੀਆਂ ਜਾਂਦੀਆਂ ਆਮ ਕੀਮੋਥੈਰੇਪੀਆਂ ਇਹ ਹਨ: ਮਾਈਟੋਮਾਈਸੀਨ ਸੀ., ਐਪੀਰੂਬੀਸੀਨ, ਪੀਰਾਰੂਬੀਸੀਨ, ਜੈੱਮਸੀਟਾਬੀਨ, ਡੌਕਸੇਟੈਕਸਲ ਜਾਂ ਇਹਨਾਂ ਦਾ ਕੋਈ ਸੁਮੇਲ। BCG ਦੇ ਕਾਰਜਕ੍ਰਮ ਦੀ ਤਰ੍ਹਾਂ ਹੀ, ਕੀਮੋਥੈਰੇਪੀ ਨੂੰ ਵੀ ਛੇ ਹਫਤਿਆਂ ਵਾਸਤੇ ਹਫਤੇ ਵਿੱਚ ਇੱਕ ਵਾਰ (ਸ਼ੁਰੂਆਤੀ ਦੌਰ) ਦਿੱਤਾ ਜਾਂਦਾ ਹੈ, ਜਿਸ ਦੇ ਬਾਅਦ ਇੱਕ ਸਾਲ ਤੱਕ ਲਈ ਦੇਖਰੇਖ ਦੌਰ ਹੁੰਦਾ ਹੈ (ਜੋ ਕਿ ਮਾਸਿਕ ਹੋ ਸਕਦਾ ਹੈ)।
ਅੰਤਰ-ਬਲੈਡਰ ਕੀਮੋਥੈਰੇਪੀ ਇਲਾਜਾਂ ਦੇ ਅਣਚਾਹੇ ਅਸਰ ਬਹੁਤ ਜ਼ਿਆਦਾ ਉਹਨਾਂ ਅਣਚਾਹੇ ਅਸਰਾਂ ਵਰਗੇ ਹੁੰਦੇ ਹਨ ਜੋ BCG ਇਲਾਜਾਂ ਨਾਲ ਅਨੁਭਵ ਕੀਤੇ ਜਾਂਦੇ ਹਨ।
ਪੇਮਬਰੋਲਿਜ਼ੂਮੈਬ ਇੱਕ ਦਵਾਈ ਹੈ ਜੋ ਅੰਤਰਨਸੀ ਰੂਟ (IV) (ਤੁਹਾਡੀਆਂ ਨਸਾਂ ਦੇ ਰਾਹੀਂ) ਰਾਹੀਂ ਦਿੱਤੀ ਜਾਂਦੀ ਹੈ। ਤੁਹਾਡੇ ਡਾਕਟਰ ਵੱਲੋਂ ਇਸ ਦੀ ਤਜਵੀਜ਼ ਕੀਤੀ ਜਾ ਸਕਦੀ ਜੇ ਤੁਹਾਨੂੰ NMIBC ਹੈ ਜਿਸ ਨੇ BCG ਚਿਕਿਤਸਾ ਦਾ ਹੁੰਗਾਰਾ ਨਹੀਂ ਭਰਿਆ।
ਇਹ ਈਮਿਊਨੋਥੈਰੇਪੀ ਦੀ ਇੱਕ ਕਿਸਮ ਹੈ ਜਿਸ ਨੂੰ ਨਾ ਸਿਰਫ਼ ਬਲੈਡਰ ਸਗੋਂ ਕਈ ਵੱਖ-ਵੱਖ ਕਿਸਮਾਂ ਦੇ ਕੈਂਸਰ ਦਾ ਇਲਾਜ ਕਰਨ ਲਈ ਵਰਤਿਆ ਜਾਂਦਾ ਹੈ। ਇਹ ਕੈਂਸਰ ਸੈੱਲਾਂ ਨੂੰ ਮਾਰਨ ਲਈ ਤੁਹਾਡੇ ਸਰੀਰ ਦੀ ਯੋਗਤਾ ਵਧਾਉਣ ਦੁਆਰਾ ਕੈਂਸਰ ਦਾ ਇਲਾਜ ਕਰਦੀ ਹੈ। ਦੂਜੇ ਸ਼ਬਦਾਂ ਵਿੱਚ, ਇਹ ਕੈਂਸਰ ’ਤੇ ਹਮਲਾ ਕਰਨ ਲਈ ਤੁਹਾਡੇ ਸਰੀਰ ਦੀ ਪ੍ਰਤੀਰੋਧਤਾ ਪ੍ਰਣਾਲੀ ਨੂੰ ਉਤੇਜਿਤ ਕਰਦੀ ਹੈ। ਇਹ ਹਰ ਤਿੰਨ ਹਫਤੇ ਬਾਅਦ ਲਗਭਗ ਦੋ ਸਾਲਾਂ ਤੱਕ ਦਿੱਤੀ ਜਾਂਦੀ ਹੈ। ਕਿਉਂਕਿ ਪੇਮਬਰੋਲਿਜ਼ੂਮੈਬ ਨੂੰ ਇੱਕ ਅੰਤਰਨਸੀ ਲਾਈਨ ਰਾਹੀਂ ਦਿੱਤਾ ਜਾਂਦਾ ਹੈ, ਇਸ ਲਈ ਇਹ ਤੁਹਾਡੇ ਬਲੈਡਰ ਤੋਂ ਇਲਾਵਾ ਹੋਰ ਅੰਗਾਂ ਨੂੰ ਵੀ ਪ੍ਰਭਾਵਿਤ ਕਰ ਸਕਦੀ ਹੈ (ਜਿਸ ਵਿੱਚ ਆਂਤੜੀਆਂ, ਚਮੜੀ, ਫੇਫੜੇ, ਜਿਗਰ, ਗੁਰਦੇ, ਅਤੇ ਹੋਰ ਸ਼ਾਮਲ ਹਨ) ਇਸ ਕਰਕੇ, ਅਣਚਾਹੇ ਅਸਰਾਂ ਵਿੱਚ ਇਹ ਸ਼ਾਮਲ ਹੋ ਸਕਦੇ ਹਨ: ਦਸਤ, ਖਾਂਸੀ, ਸਾਹ ਲੈਣ ਵਿੱਚ ਸਮੱਸਿਆਵਾਂ, ਜਾਂ ਰਕਤ-ਪਿੱਤੀ। ਜ਼ਿਆਦਾਤਰ ਸਮਾਂ ਅਣਚਾਹੇ ਅਸਰ ਹਲਕੇ ਹੁੰਦੇ ਹਨ, ਪਰ ਕੁਝ ਕੇਸਾਂ ਵਿੱਚ, ਇਹ ਤੀਬਰ ਹੋ ਸਕਦੇ ਹਨ ਅਤੇ ਇਹਨਾਂ ਲਈ ਅਤੀ ਜ਼ਰੂਰੀ ਤੌਰ ’ਤੇ ਇਲਾਜ ਦੀ ਲੋੜ ਪੈ ਸਕਦੀ ਹੈ। ਜੇ ਤੁਸੀਂ ਇਸ ਕਿਸਮ ਦੀ ਚਿਕਿਤਸਾ ਪ੍ਰਾਪਤ ਕਰਦੇ ਹੋ, ਤਾਂ ਤੁਹਾਨੂੰ ਨੇੜੇ ਤੋਂ ਨਿਗਰਾਨੀ ਕੀਤੇ ਜਾਣ ਦੀ ਲੋੜ ਪਵੇਗੀ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਤੁਹਾਡੇ ਵਿੱਚ ਕੋਈ ਗੰਭੀਰ ਪ੍ਰਤੀਕਿਰਿਆ ਵਿਕਸਿਤ ਨਹੀਂ ਹੁੰਦੀ।
ਅੰਤਰ-ਬਲੈਡਰ ਚਿਕਿਤਸਾਵਾਂ ਤੋਂ ਇਲਾਵਾ, ਤੁਹਾਡਾ ਡਾਕਟਰ ਤੁਹਾਡੇ ਨਾਲ ਹੋਰ ਵਿਕਲਪਾਂ ਬਾਰੇ ਵਿਚਾਰ-ਵਟਾਂਦਰਾ ਕਰ ਸਕਦਾ ਹੈ, ਜਿਸ ਵਿੱਚ ਸਰਜਰੀ ਰਾਹੀਂ ਤੁਹਾਡੇ ਬਲੈਡਰ ਨੂੰ ਕੱਢਣਾ (ਰੈਡੀਕਲ ਸਿਸਟੈਕਟਮੀ) ਸ਼ਾਮਲ ਹੈ। ਇਹ ਵਿਕਲਪ ਉਹਨਾਂ ਲੋਕਾਂ ਵਾਸਤੇ ਰਾਖਵਾਂ ਰੱਖਿਆ ਜਾਂਦਾ ਹੈ ਜਿਨ੍ਹਾਂ ਦੀ ਰੋਗ-ਵਿਗਿਆਨਕ ਰਿਪੋਰਟ ਉੱਤੇ ਚਿੰਤਾਜਨਕ ਵਿਸ਼ੇਸ਼ਤਾਵਾਂ ਹੁੰਦੀਆਂ ਹਨ ਜਾਂ ਉਹਨਾਂ ਲੋਕਾਂ ਵਾਸਤੇ ਜੋ BCG ਨਾਲ ਇਲਾਜ ਦਾ ਹੁੰਗਾਰਾ ਨਹੀਂ ਭਰਦੇ। ਪੂਰਾ ਬਲੈਡਰ ਕਢਵਾਉਣ ਦੀ ਸਰਜਰੀ ਬਾਰੇ ਹੋਰ ਜਾਣਕਾਰੀ ਨੂੰ ‘ਪੂਰਾ ਬਲੈਡਰ ਕਢਵਾਉਣ ਦੀ ਸਰਜਰੀ ਦਾ ਸਾਹਮਣਾ ਕਰ ਰਹੇ ਮਰੀਜ਼ਾਂ ਵਾਸਤੇ ਮਰੀਜ਼ ਗਾਈਡ-ਪੁਸਤਿਕਾ’ ਵਿੱਚ ਦੇਖਿਆ ਜਾ ਸਕਦਾ ਹੈ।
ਬਲੈਡਰ ਦੇ ਕੈਂਸਰ ਅਤੇ ਇਸ ਦੇ ਇਲਾਜ ਬਾਬਤ ਖੋਜ ਦੁਨੀਆਂ ਭਰ ਵਿੱਚ ਨਿਰੰਤਰ ਚੱਲ ਰਹੀ ਹੈ। ਇਹ ਯਾਦ ਰੱਖਣਾ ਅਹਿਮ ਹੈ ਕਿ BCG, NMIBC ਵਾਸਤੇ “ਮਿਆਰੀ ਦੇਖਭਾਲ” ਇਲਾਜ ਬਣੀ ਹੋਈ ਹੈ, ਅਤੇ ਇਹ ਕਿ ਜ਼ਿਆਦਾਤਰ ਅਧਿਐਨ ਉਹਨਾਂ ਲੋਕਾਂ ਵਾਸਤੇ ਨਵੇਂ ਇਲਾਜ ਤਲਾਸ਼ ਰਹੇ ਹਨ ਜੋ BCG ਦਾ ਹੁੰਗਾਰਾ ਨਹੀਂ ਭਰਦੇ। ਅਧਿਐਨ ਹੁਣ ਹੇਠ ਲਿਖਿਆਂ ਦੀ ਘੋਖ ਕਰ ਰਹੇ ਹਨ:
ਵਰਤਮਾਨ ਖੋਜ ਦੀ ਇੱਕ ਵਧੀਆ ਰੂਪ-ਰੇਖਾ ਅਮੈਰਿਕਨ ਕੈਂਸਰ ਸੋਸਾਇਟੀ ਦੀ ਵੈੱਬਸਾਈਟ ’ਤੇ ਉਪਲਬਧ ਹੈ: https://www.cancer.org/research/currently-funded-cancer-research.html
ਹੈਲਥ ਕੈਨੇਡਾ ਵੱਲੋਂ ਮਨਜ਼ੂਰਸ਼ੁਦਾ ਚਿਕਿਤਸਾਵਾਂ ਤੋਂ ਇਲਾਵਾ, ਤੁਸੀਂ ਇੱਕ ਕਲੀਨਿਕੀ ਪਰਖ ਦੇ ਰਾਹੀਂ ਹੋਰ ਬਲੈਡਰ ਕੈਂਸਰ ਸੰਬੰਧੀ ਚਿਕਿਤਸਾਵਾਂ ਤੱਕ ਪਹੁੰਚ ਕਰਨ ਦੇ ਯੋਗ ਹੋ ਸਕਦੇ ਹੋ।
ਕਲੀਨਿਕੀ ਪਰਖ ਇੱਕ ਖੋਜ ਅਧਿਐਨ ਹੁੰਦੀ ਹੈ ਜਿਸ ਵਿੱਚ ਇਹ ਟੈਸਟ ਕੀਤਾ ਜਾਂਦਾ ਹੈ ਕਿ ਇੱਕ ਨਵੀਂ ਡਾਕਟਰੀ ਪਹੁੰਚ ਲੋਕਾਂ ਵਿੱਚ ਕਿੰਨ੍ਹੀ ਕੁ ਚੰਗੀ ਤਰ੍ਹਾਂ ਕੰਮ ਕਰਦੀ ਹੈ। ਹਰ ਅਧਿਐਨ ਵਿਗਿਆਨਕ ਸਵਾਲਾਂ ਦੇ ਜਵਾਬ ਦਿੰਦਾ ਹੈ ਅਤੇ ਕਿਸੇ ਬਿਮਾਰੀ, ਜਿਵੇਂ ਕਿ ਬਲੈਡਰ ਕੈਂਸਰ, ਦੀ ਰੋਕਥਾਮ ਕਰਨ, ਇਸ ਦੀ ਪੂਰਵ-ਪੜਤਾਲ ਕਰਨ, ਤਸ਼ਖੀਸ ਕਰਨ ਜਾਂ ਇਲਾਜ ਕਰਨ ਦੇ ਬਿਹਤਰ ਤਰੀਕੇ ਲੱਭਣ ਦੀ ਕੋਸ਼ਿਸ਼ ਕਰਦਾ ਹੈ। ਕਿਸੇ ਕਲੀਨਿਕੀ ਪਰਖ ਵਿੱਚ ਭਾਗ ਲੈਣ ਦੁਆਰਾ, ਤੁਸੀਂ ਖੋਜ ਕਰਤਾਵਾਂ ਨੂੰ ਅਹਿਮ ਸਵਾਲਾਂ ਦਾ ਜਵਾਬ ਦੇਣ ਵਿੱਚ ਮਦਦ ਕਰੋਂਗੇ ਜਿਸ ਨਾਲ ਨਵੇਂ ਅਸਰਦਾਰ ਇਲਾਜਾਂ ਦਾ ਵਿਕਾਸ ਅੱਗੇ ਵਧੇਗਾ। ਕਲੀਨਿਕੀ ਪਰਖਾਂ ਤੁਹਾਨੂੰ ਤੁਹਾਡੀ ਇਲਾਜ ਯੋਜਨਾ ਵਿੱਚ ਕੋਈ ਹੋਰ ਵਿਕਲਪ ਵੀ ਪ੍ਰਦਾਨ ਕਰਾ ਸਕਦੀਆਂ ਹਨ।
ਕਲੀਨਿਕੀ ਪਰਖ ਸੰਬੰਧੀ ਵੈੱਬਸਾਈਟਾਂ ਤੁਹਾਨੂੰ ਉਹ ਕਲੀਨਿਕੀ ਪਰਖਾਂ ਲੱਭਣ ਵਿੱਚ ਮਦਦ ਕਰਨਗੀਆਂ ਜੋ ਤੁਹਾਡੇ ਖੇਤਰ ਵਿੱਚ ਉਪਲਬਧ ਹੋ ਸਕਦੀਆਂ ਹਨ। ਇਹ ਹੈ ਇੱਕ ਵੈੱਬਸਾਈਟ ਜੋ ਤੁਸੀਂ ਦੇਖ ਸਕਦੇ ਹੋ: www.canadiancancertrials.ca. ਇਹ ਸਾਈਟ ਸਿਰਫ਼ ਕੈਨੇਡੀਅਨ ਪਰਖਾਂ ਦੀ ਹੀ ਸੂਚੀ ਦਿੰਦੀ ਹੈ। ਤੁਸੀਂ ‘ਕੈਂਸਰ ਦੀ ਕਿਸਮ ਚੁਣੋ’ ਤਹਿਤ ਬਲੈਡਰ ਕੈਂਸਰ ਦੀ ਚੋਣ ਕਰਨ ਦੁਆਰਾ ਆਪਣੀ ਤਲਾਸ਼ ਦਾ ਘੇਰਾ ਤੰਗ ਕਰ ਸਕਦੇ ਹੋ। ਜੇ ਤੁਹਾਡੇ ਵੱਲੋਂ ਦੇਖੀ ਜਾਂਦੀ ਸੂਚੀ ਉੱਤੇ ਬਲੈਡਰ ਕੈਂਸਰ ਦਿਖਾਈ ਨਹੀਂ ਦਿੰਦਾ ਤਾਂ ਤੁਹਾਨੂੰ “ਹੋਰ ਦਿਖਾਓ” ਦੀ ਚੋਣ ਕਰਨ ਦੀ ਲੋੜ ਪੈ ਸਕਦੀ ਹੈ। ਤੁਸੀਂ ਪ੍ਰਾਂਤ, ਸ਼ਹਿਰ ਜਾਂ ਪਰਖ ਕੇਂਦਰ ਮੁਤਾਬਿਕ ਵੀ ਤਲਾਸ਼ ਕਰ ਸਕਦੇ ਹੋ।
ਇਹ ਬਹੁਤ ਅਹਿਮ ਹੈ ਕਿ ਤੁਸੀਂ ਆਪਣੀ ਡਾਕਟਰੀ ਟੀਮ ਨਾਲ ਇਹ ਵਿਚਾਰ-ਵਟਾਂਦਰਾ ਕਰੋ ਕਿ ਕੀ ਕੋਈ ਕਲੀਨਿਕੀ ਪਰਖ ਤੁਹਾਡੇ ਲਈ ਸਹੀ ਹੈ।
ਚੌਕਸ ਰਹੋ
ਕਿਸੇ ਵੀ ਦਵਾਈ ਜਾਂ ਇਲਾਜ ਦੇ ਨਾਲ, ਜੇ ਗੰਭੀਰ ਸ਼ੰਕੇ ਖੜ੍ਹੇ ਹੋ ਜਾਂਦੇ ਹਨ ਤਾਂ ਤੁਹਾਨੂੰ ਤੁਰੰਤ ਡਾਕਟਰੀ ਧਿਆਨ ਦੀ ਮੰਗ ਕਰਨੀ ਚਾਹੀਦੀ ਹੈ। ਤੁਸੀਂ ਆਪਣੇ ਡਾਕਟਰ ਨੂੰ ਇਸ ਚੀਜ਼ ਤੋਂ ਜਾਣੂੰ ਰੱਖਣਾ ਚਾਹੋਂਗੇ ਕਿ ਤੁਸੀਂ ਇਲਾਜਾਂ ਦਾ ਹੁੰਗਾਰਾ ਕਿਵੇਂ ਭਰਦੇ ਹੋ ਅਤੇ ਜੇ ਵੱਡੇ ਅਣਚਾਹੇ ਅਸਰ ਸਮੱਸਿਆ ਬਣ ਜਾਂਦੇ ਹਨ ਤਾਂ ਤੁਸੀਂ ਵਾਧੂ ਦਵਾਈ ਲੈਣ ਲਈ ਤਿਆਰ ਰਹੋਂਗੇ। ਆਪਣੇ ਡਾਕਟਰ ਦੀ ਮਨਜ਼ੂਰੀ ਤੋਂ ਬਿਨਾਂ ਇਲਾਜ ਨਾ ਛੱਡੋ, ਕਿਉਂਕਿ ਦਵਾਈ ਲੈਣ ਦੇ ਲਾਭਾਂ ਦੀ ਤੁਲਨਾ ਵਿੱਚ ਅਣਚਾਹੇ ਅਸਰ ਮਾਮੂਲੀ ਹੋ ਸਕਦੇ ਹਨ।
ਕਿਸੇ ਅਜਿਹੇ ਵਿਅਕਤੀ ਨੂੰ ਕਾਲ ਕਰਨਾ ਮਦਦ ਕਰ ਸਕਦਾ ਹੈ ਜਿਸ ਨੇ ਇਹੋ ਇਲਾਜ ਕਰਵਾਇਆ ਹੋਵੇ। ਬਲੈਡਰ ਕੈਂਸਰ ਕੈਨੇਡਾ ਤੁਹਾਨੂੰ ਕਿਸੇ ਅਜਿਹੇ ਵਿਅਕਤੀ ਦੇ ਸੰਪਰਕ ਵਿੱਚ ਲਿਆ ਸਕਦਾ ਹੈ ਜੋ ਤੁਹਾਡੇ ਵਾਲੀ ਯਾਤਰਾ ਕਰ ਚੁੱਕਾ ਹੈ। ਬੱਸ ਸਾਨੂੰ ਕਾਲ ਕਰੋ ਜਾਂ ਈਮੇਲ ਕਰੋ।
ਬਿਨਾਂ ਸ਼ੱਕ, ਆਪਰੇਸ਼ਨ ਤੋਂ ਬਾਅਦ ਤੁਹਾਡੀ ਪਹਿਲੀ ਸਿਸਟੋਸਕੋਪੀ ਤੋਂ ਬਾਅਦ ਆਪਣੇ ਡਾਕਟਰ ਕੋਲੋਂ “ਸਭ ਠੀਕ ਹੈ” ਵਰਗੇ ਸ਼ਬਦ ਸੁਣਨਾ ਬਹੁਤ ਰਾਹਤ ਦਿੰਦਾ ਹੈ। ਹਾਲਾਂਕਿ, ਇਹ ਤੁਹਾਡੀ ਜ਼ਿੰਦਗੀ ਦੇ ਇਸ ਅਧਿਆਏ ਦਾ ਅੰਤ ਨਹੀਂ ਹੁੰਦਾ। ਤੁਹਾਡਾ ਡਾਕਟਰ ਤੁਹਾਨੂੰ ਦੱਸੇਗਾ ਕਿ ਕਿੰਨ੍ਹੇ ਕੁ ਵਕਫੇ ਬਾਅਦ ਸਿਸਟੋਸਕੋਪੀਆਂ ਨੂੰ ਦੁਹਰਾਉਣਾ ਚਾਹੀਦਾ ਹੈ। “ਸਭ ਠੀਕ ਹੈ” ਤੋਂ ਬਾਅਦ ਪਹਿਲੇ ਦੋ ਸਾਲਾਂ ਵਾਸਤੇ ਹਰ ਤਿੰਨ ਮਹੀਨੇ ਬਾਅਦ ਰਵਾਇਤੀ ਹੈ ਤਾਂ ਜੋ ਕੈਂਸਰ ਦੇ ਵਾਪਸ ਮੁੜ ਆਉਣ ਦੀ ਸੂਰਤ ਵਿੱਚ ਜਲਦੀ ਪਤਾ ਲਾਇਆ ਜਾ ਸਕੇ।
ਆਪਣੀ ਜੀਵਨਸ਼ੈਲੀ ਵੱਲ ਉਚੇਚਾ ਧਿਆਨ ਦੇਕੇ, ਤੁਸੀਂ ਇੱਕ ਸਿਹਤਮੰਦ ਜ਼ਿੰਦਗੀ ਜੀ ਸਕਦੇ ਹੋ। ਚੜ੍ਹਦੀ ਕਲਾ ਵਿੱਚ ਰਹੋ। ਸਮਝਦਾਰ ਬਣੋ। ਅਤੇ ਇਸੇ ਤਸ਼ਖੀਸ ਦਾ ਸਾਹਮਣਾ ਕਰ ਰਹੇ ਕਿਸੇ ਹੋਰ ਵਿਅਕਤੀ ਦੀ ਮਦਦ ਕਰਨਾ ਚੁਣੋ ਤਾਂ ਜੋ ਉਹ ਉਸਾਰੂ ਰਵੱਈਏ ਨਾਲ ਭਵਿੱਖ ਵੱਲ ਦੇਖ ਸਕੇ।
ਬਲੈਡਰ ਕੈਂਸਰ ਕੈਨੇਡਾ ਦੀ ਵੈੱਬਸਾਈਟ (www.bladdercancercanada.org) ’ਤੇ ਜਾਣਕਾਰੀ ਦਾ ਖਜਾਨਾ ਹੈ, ਜਿਸ ਵਿੱਚ ਹੋਰ ਭਰੋਸੇਯੋਗ ਵੈੱਬਸਾਈਟਾਂ ਲਈ ਲਿੰਕ ਵੀ ਸ਼ਾਮਲ ਹਨ।
ਇੰਟਰਨੈੱਟ ਢੇਰ ਸਾਰੀ ਜਾਣਕਾਰੀ ਪ੍ਰਦਾਨ ਕਰਾਉਂਦਾ ਹੈ, ਇਸ ਵਿੱਚੋਂ ਕੁਝ ਸਟੀਕ ਅਤੇ ਮਦਦਗਾਰੀ ਹੁੰਦੀ ਹੈ ਅਤੇ ਕੁਝ ਕੁ ਗਲਤ ਅਤੇ ਹੋਰ ਸਭ ਕੁਝ ਹੁੰਦੀ ਹੈ ਪਰ ਮਦਦਗਾਰੀ ਨਹੀਂ। ਹਾਲਾਂਕਿ, ਕਈ ਵਿਸ਼ਵ-ਸ਼੍ਰੇਣੀ ਦੇ ਕੈਂਸਰ ਕੇਂਦਰ ਔਨਲਾਈਨ ਜਾਣਕਾਰੀ ਪ੍ਰਦਾਨ ਕਰਦੇ ਹਨ ਜਿਸ ਤੋਂ ਤੁਹਾਨੂੰ ਮਦਦ ਮਿਲ ਸਕਦੀ ਹੈ। ਪਰ ਤੁਹਾਡੇ ਵਿਸ਼ੇਸ਼ ਕੇਸ ਵਿੱਚ ਜਾਣਕਾਰੀ ਦਾ ਸਭ ਤੋਂ ਵਧੀਆ ਸਰੋਤ ਤੁਹਾਡੀ ਖੁਦ ਦੀ ਡਾਕਟਰੀ ਟੀਮ ਹੁੰਦੀ ਹੈ।
ਜੇ ਤੁਸੀਂ ਆਪਣੇ ਡਾਕਟਰ ਦੀ ਸਲਾਹ ਬਾਰੇ ਨਿਸ਼ਚਿਤ ਨਹੀਂ ਹੋ, ਤਾਂ ਤੁਹਾਨੂੰ ਦੂਜਾ ਨਜ਼ਰੀਆ ਲੈਣ ਦਾ ਹੱਕ ਹੈ। ਤੁਹਾਡੀ ਸਿਫਾਰਸ਼ ਕਿਸ ਕੋਲ ਕੀਤੀ ਜਾ ਸਕਦੀ ਹੈ, ਕਿਰਪਾ ਕਰਕੇ ਇਸ ਬਾਰੇ ਆਪਣੇ ਪਰਿਵਾਰਕ ਡਾਕਟਰ ਜਾਂ ਬਲੈਡਰ ਕੈਂਸਰ ਕੈਨੇਡਾ ਨਾਲ ਗੱਲ ਕਰੋ।
ਬਲੈਡਰ ਕੈਂਸਰ ਸੰਬੰਧੀ ਮਸਲਿਆਂ ਲਈ ਸਮਰਪਿਤ ਪਹਿਲੇ ਅਤੇ ਇੱਕੋ ਇੱਕ ਕੈਨੇਡੀਅਨ ਮਰੀਜ਼ ਵਕਾਲਤ ਸੰਗਠਨ ਹੋਣ ਵਜੋਂ, ਬਲੈਡਰ ਕੈਂਸਰ ਕੈਨੇਡਾ ਨੂੰ ਮਰੀਜ਼ਾਂ, ਉਹਨਾਂ ਦੇ ਦੇਖਭਾਲ ਕਰਤਾਵਾਂ ਅਤੇ ਪਰਿਵਾਰਾਂ ਨੂੰ ਸਹਾਇਤਾ ਅਤੇ ਸਰੋਤ ਪ੍ਰਦਾਨ ਕਰਾਉਣ ’ਤੇ ਮਾਣ ਹੈ ਤਾਂ ਜੋ ਬਲੈਡਰ ਦੇ ਕੈਂਸਰ ਦੀ ਤਸ਼ਖੀਸ ਹੋਣ ਨਾਲ ਸਿੱਝਣ ਵਿੱਚ ਮਦਦ ਕੀਤੀ ਜਾ ਸਕੇ। ਬਲੈਡਰ ਕੈਂਸਰ ਕੈਨੇਡਾ ਨੂੰ ਕੋਈ ਸਰਕਾਰੀ ਫ਼ੰਡ ਸਹਾਇਤਾ ਨਹੀਂ ਮਿਲਦੀ ਅਤੇ ਇਹ ਮਰੀਜ਼ਾਂ ਅਤੇ ਉਹਨਾਂ ਦੇ ਪਰਿਵਾਰਾਂ ਨੂੰ ਇਸ ਮੁਫ਼ਤ ਗਾਈਡ-ਪੁਸਤਿਕਾ ਵਰਗੇ ਪ੍ਰੋਗਰਾਮਾਂ ਅਤੇ ਸੇਵਾਵਾਂ ਦੀ ਪੇਸ਼ਕਸ਼ ਕਰਨ ਲਈ ਦਾਨਾਂ ’ਤੇ ਨਿਰਭਰ ਕਰਦੀ ਹੈ।
ਵਿਅਕਤੀਗਤ ਦਾਨਾਂ ਦੀ ਬੇਹੱਦ ਸ਼ਲਾਘਾ ਕੀਤੀ ਜਾਂਦੀ ਹੈ, ਅਤੇ ਇਹਨਾਂ ਨੂੰ ਔਨਲਾਈਨ bladdercancercanada.org ’ਤੇ ਜਾਂ 1-866-674-8889 ’ਤੇ ਕਾਲ ਕਰਕੇ ਕੀਤਾ ਜਾ ਸਕਦਾ ਹੈ। ਤੁਹਾਡੇ ਵੱਲੋਂ ਦਿੱਤੀ ਸਹਾਇਤਾ ਬਲੈਡਰ ਕੈਂਸਰ ਕੈਨੇਡਾ ਨੂੰ ਸਾਡੇ ਪ੍ਰੋਗਰਾਮਾਂ ਅਤੇ ਸੇਵਾਵਾਂ ਨੂੰ ਜਾਰੀ ਰੱਖਣ ਅਤੇ ਇਹਨਾਂ ਦਾ ਵਿਸਤਾਰ ਕਰਨ ਵਿੱਚ ਮਦਦ ਕਰੇਗੀ ਤਾਂ ਜੋ ਹੋਰ ਵਧੇਰੇ ਮਰੀਜ਼ਾਂ ਅਤੇ ਦੇਖਭਾਲ ਕਰਤਾਵਾਂ ਦੀ ਮਦਦ ਕੀਤੀ ਜਾ ਸਕੇ।
ਹਰ ਸਤੰਬਰ, ਸਮੁੱਚੇ ਦੇਸ਼ ਦੇ ਸ਼ਹਿਰਾਂ ਵਿੱਚ ਅਸੀਂ ਆਪਣੇ ਸਾਲਾਨਾ ਮਾਰਚ, ‘ਕੈਨੇਡਾ ਵਾਕਸ ਫਾਰ ਬਲੈਡਰ ਕੈਂਸਰ’ ਦੀ ਮੇਜ਼ਬਾਨੀ ਕਰਦੇ ਹਾਂ। ਇਹ ਇਵੈਂਟ ਸਮੁੱਚੇ ਕੈਨੇਡਾ ਵਿਚਲੇ ਭਾਈਚਾਰਿਆਂ ਵਿੱਚ ਬਲੈਡਰ ਕੈਂਸਰ ਬਾਰੇ ਚੇਤਨਾ ਜਗਾਉਣ ਲਈ, ਬਲੈਡਰ ਕੈਂਸਰ ਦੇ ਮਰੀਜ਼ਾਂ ਨੂੰ ਸਹਾਇਤਾ ਦੇਣ ਲਈ ਅਤੇ ਕਾਢਕਾਰੀ ਖੋਜ ਵਾਸਤੇ ਫ਼ੰਡ ਜੁਟਾਉਣ ਦੇ ਸਾਡੇ ਮਿਸ਼ਨ ਵਿੱਚ ਇੱਕ ਅਹਿਮ ਭੂਮਿਕਾ ਨਿਭਾਉਂਦੀ ਹੈ। ਇਸ ਇਵੈਂਟ ਤੋਂ ਇਕੱਤਰ ਕੀਤੀ ਧਨ ਰਾਸ਼ੀ ਸਾਡੀ ਸਾਲਾਨਾ ਆਮਦਨ ਦਾ ਲਗਭਗ ਦੋ-ਤਿਹਾਈ ਹਿੱਸਾ ਬਣਦੀ ਹੈ।
ਅਜਿਹਾ ਸੰਸਾਰ ਸਿਰਜਣ ਵਿੱਚ ਮਦਦ ਕਰੋ ਜਿੱਥੇ ਬਲੈਡਰ ਕੈਂਸਰ ਇੱਕ ਯਾਦਦਾਸ਼ਤ ਬਣਕੇ ਰਹਿ ਜਾਵੇ। ਸਾਡੇ ਨਾਲ ਜੁੜੋ: BCCwalk.ca.
ਆਪਣੇ ਦੋਸਤਾਂ, ਪਰਿਵਾਰ ਅਤੇ ਸਿਹਤ-ਸੰਭਾਲ ਪ੍ਰਦਾਨਕਾਂ ਨੂੰ ਬਲੈਡਰ ਕੈਂਸਰ ਅਤੇ ਬਲੈਡਰ ਕੈਂਸਰ ਕੈਨੇਡਾ ਬਾਰੇ ਦੱਸੋ। ਤੁਸੀਂ ਇਸੇ ਯਾਤਰਾ ’ਤੇ ਚੱਲ ਰਹੇ ਹੋਰ ਲੋਕਾਂ ਨਾਲ ਗੱਲ ਕਰ ਸਕਦੇ ਹੋ ਅਤੇ ਉਹਨਾਂ ਵਾਸਤੇ ਉਤਸ਼ਾਹ ਅਤੇ ਜੀਵਨ-ਰੇਖਾ ਬਣ ਸਕਦੇ ਹੋ। ਇਹ ਪਤਾ ਲਾਉਣ ਲਈ ਕਿ ਤੁਸੀਂ ਕਿਵੇਂ ਮਦਦ ਕਰ ਸਕਦੇ ਹੋ—ਜਾਂ ਖੁਦ ਮਦਦ ਲੈਣ ਲਈ—ਬਲੈਡਰ ਕੈਂਸਰ ਕੈਨੇਡਾ ਦੀ ਵੈੱਬਸਾਈਟ www.bladdercancercanada.org’ਤੇ ਜਾਓ। ਸਾਡੀ ਵੈੱਬਸਾਈਟ ਵਿੱਚ ਸ਼ਾਨਦਾਰ, ਭਰੋਸੇਯੋਗ, ਅਤੇ ਸਰਗਰਮ ਵਿਚਾਰ-ਵਟਾਂਦਰਾ ਫੋਰਮਾਂ ਹਨ ਜਿੱਥੇ ਤੁਸੀਂ ਸਵਾਲ ਪੁੱਛ ਸਕਦੇ ਹੋ ਜਾਂ ਆਪਣੀ ਕਹਾਣੀ ਸਾਂਝੀ ਕਰ ਸਕਦੇ ਹੋ। ਤੁਸੀਂ ਵੀ ਵਲੰਟੀਅਰ ਬਣਨ ਬਾਰੇ ਜਾਣਕਾਰੀ ਲੱਭ ਸਕਦੇ ਹੋ ਜਾਂ ਆਉਣ ਵਾਲੇ ਸਮਾਗਮਾਂ ਅਤੇ ਖੋਜ ਸੰਬੰਧੀ ਖ਼ਬਰਾਂ ਬਾਰੇ ਤਾਜ਼ਾ ਜਾਣਕਾਰੀ ਪ੍ਰਾਪਤ ਕਰਦੇ ਰਹਿਣ ਲਈ ਸਾਡੇ ਈ-ਨਿਊਜ਼ਲੈਟਰ ਵਾਸਤੇ ਸਾਈਨ ਅੱਪ ਕਰ ਸਕਦੇ ਹੋ।
ਬਲੈਡਰ ਕੈਂਸਰ ਨਾਲ ਤੁਹਾਡੀ ਯਾਤਰਾ ਵਿੱਚ ਅਸੀਂ ਤੁਹਾਡੇ ਲਈ ਹਰੇਕ ਸਫਲਤਾ ਦੀ ਕਾਮਨਾ ਕਰਦੇ ਹਾਂ।
ਬਲੈਡਰ ਕੈਂਸਰ ਕੈਨੇਡਾ ਦੀ ਸਥਾਪਨਾ 2009 ਵਿੱਚ ਬਲੈਡਰ ਕੈਂਸਰ ਦੇ ਬਚ ਗਏ ਪੀੜਤਾਂ (survivors) ਵੱਲੋਂ ਕੀਤੀ ਗਈ ਸੀ। ਅਸੀਂ ਇੱਕ ਕੌਮੀ ਪੱਧਰ ਦੀ ਚੈਰਿਟੀ ਹਾਂ ਅਤੇ ਸਾਡਾ ਮਿਸ਼ਨ ਇਹ ਹੈ:
ਕਾਬਲਤਨ ਸ਼ੁਰੂਆਤੀ ਪੜਾਅ ’ਤੇ ਕੈਨੇਡੀਅਨਾਂ ਵਿਚਕਾਰ ਬਲੈਡਰ ਦੇ ਕੈਂਸਰ ਬਾਰੇ ਚੇਤਨਾ। ਇਸ ਬਿਮਾਰੀ ਦੇ ਲੱਛਣਾਂ ਬਾਰੇ ਜਨਤਾ ਵਿੱਚ ਬਹੁਤ ਘੱਟ ਜਾਗਰੁਕਤਾ ਹੈ ਅਤੇ, ਜਦੋਂ ਤੱਕ ਲੋਕਾਂ ਵਿੱਚ ਇਸ ਕੈਂਸਰ ਦੀ ਤਸ਼ਖੀਸ ਨਹੀਂ ਹੁੰਦੀ, ਜ਼ਿਆਦਾਤਰ ਲੋਕ ਇਸ ਬਾਰੇ ਚੰਗੀ ਤਰ੍ਹਾਂ ਨਹੀਂ ਜਾਣਦੇ ਹੁੰਦੇ।
ਬਲੈਡਰ ਕੈਂਸਰ ਕੈਨੇਡਾ ਇਸ ਕੈਂਸਰ ਬਾਰੇ ਜਾਗਰੁਕਤਾ ਪੈਦਾ ਕਰਦੀ ਹੈ ਕਿਉਂਕਿ ਜਲਦੀ ਤਸ਼ਖੀਸ ਕਰ ਲੈਣਾ ਆਮ ਤੌਰ ’ਤੇ ਬਿਹਤਰ ਸਿੱਟਾ ਦਿੰਦਾ ਹੈ।
ਵਧੇਰੇ ਜਾਣਕਾਰੀ ਲਈ, ਦੇਖੋ www.bladdercancercanada.org.
ਸਾਡੇ ਨਾਲ ਸੰਪਰਕ ਕਰੋ:
Bladder Cancer Canada
4936 Yonge St, Suite 1000 | Toronto, ON M2N 6S3
info@bladdercancercanada.org ਜਾਂ ਸਾਨੂੰ 1-866-674-8889 ’ਤੇ ਕਾਲ ਕਰੋ
ਏਥੇ ਸਾਡਾ ਅਨੁਸਰਣ ਕਰੋ:
Facebook: /BladderCancerCanada
Twitter: /BladderCancerCA
YouTube: /BladderCancerCA
Instagram: /bladdercancercanada/
ਅਸੀਂ ਉਹਨਾਂ ਲੋਕਾਂ ਦਾ ਧੰਨਵਾਦ ਕਰਨਾ ਚਾਹਾਂਗੇ ਜਿਨ੍ਹਾਂ ਨੇ ਇਸ ਗਾਈਡ-ਪੁਸਤਿਕਾ ਦੀ ਪ੍ਰਕਾਸ਼ਨਾ ਅਤੇ ਸਮੀਖਿਆ ਵਿੱਚ ਭਾਗ ਲਿਆ: ਗਰੇਗ ਨੀਲੀ, ਜੈਕ ਮੂਨ, ਈਵਾ ਫ੍ਰੇਜ਼ਰ, ਇਡ ਮੋਫਟ, ਐਲਿਜ਼ਾਬੇਥ ਮੋਫਟ, ਵੈਲੇਰੀ ਮੈਕਲੀਓਡ, ਕਾਈਲ ਮੈਕਕੇਨਾ, ਡੇਵਿਡ ਗਟਮੈਨ, ਡਾ. ਐਂਡੀਆ ਕੋਕੋਰੋਵਿਕ ਅਤੇ ਡਾ. ਰਾਬਰਟ ਸੀਮੈੱਨਜ਼
ਪ੍ਰੋਜੈਕਟ ਮੈਨੇਜਰ ਅਤੇ ਮਰੀਜ਼ ਗਾਈਡ-ਪੁਸਤਿਕਾ ਲੜੀ ਦੇ ਸੰਪਾਦਕ ਸਟੀਫਨ ਵਿਲਸਨ ਹਨ।
ਅਸੀਂ AstraZeneca, Merck, Roche ਅਤੇ Verity ਦੇ ਅਹਿਸਾਨਮੰਦ ਹਾਂ ਜਿਨ੍ਹਾਂ ਦੀ ਦਿਆਲੂ ਵਿੱਤੀ ਸਹਾਇਤਾ ਨੇ ਇਸ ਗਾਈਡ-ਪੁਸਤਿਕਾ ਨੂੰ ਸੰਭਵ ਬਣਾਇਆ।
ਇਸ ਗਾਈਡ-ਪੁਸਤਿਕਾ ਦੇ ਅਨੁਵਾਦ ਵਾਸਤੇ Verity Pharmaceuticals , Janssen , Merck Canada ਅਤੇ ਹੋਰ ਦਿਆਲੂ ਦਾਨੀਆਂ ਵੱਲੋਂ ਸਹਾਇਤਾ ਦਿੱਤੀ ਗਈ ਸੀ।
ਚੈਰੀਟੇਬਲ ਰਜਿਸਟ੍ਰੇਸ਼ਨ ਨੰਬਰ: 83612 6060 RR0001
ਜੂਨ 2023 ਵਿੱਚ ਸੋਧਿਆ ਗਿਆ
